پەنجاو دووھەمەمین كۆنفرانسی سیاسەتی ئاسایشی نێودەوڵەتیی لە میونشن بە یاداشتێكی بێ ئەنجام كۆتاییھات، سەرۆكی كۆنفرانسەکەش رایگەیاند داھاتووی ئاسایشی جیھان نا روونە.

وۆڵف گانگ ئیشینگەر، سەرۆكی كۆنفرانسی میونشن لە ئەڵمانیا راشیگەیاند: "بێ ھیوام لە چارەكردنی ئەو كێشانەی کە كۆمەڵگەی نێودەوڵەتیی بە دەستینانەوە دەناڵێنن".

سەرۆكی كۆنفرانسی میونشن هاوکات ھۆشداریدا لە چارەسەرنەبوونی قەیرانەكان و ئاشكرایكرد، كە چیترناتوانن پێشبینیی بكەن كۆمەڵگەی نێودەوڵەتیی دووچاری چەند قەیرانی دیكە دەبێتەوە و گوتی: "داھاتووی ئاسایشی جیھان نا روونە".

وۆڵف گانگ ئیشینگەر راشیگەیاند: "بێ باوەڕییەكی زۆر باڵی بەسەر گفتوگۆكانی میونشن كێشاوە، سەركردەی وڵاتانی زلھێز متمانەیان بە یەكدی نییە".

بە درێژایی سێ رۆژی رابردوو قەیرانی سووریا گەرمترین و سەرەكیترین بابەتی كۆنفرانسی میونشن بوو، دواتر لە رێکەوتی 12 ئەم مانگە وەزیرانی دەرەوەی وڵاتانی گرووپی ھاوكاری سووریا گەیشتنە رێككەوتن لەبارەی راگەیاندنی ئاگربەست لە سووریا، بەڵام رووسیا و ئەمریكا یەكتر تۆمەتبار دەكەن بەوەی نەیانتوانیوە تا ئێستا شەڕی سووریا رابگرن.

بە رای چاودێران بەهۆی قەیرانی كۆچبەران كە راستەوخۆ پەیوەندیی بە دۆخی سووریاوە ھەیە و وڵاتانی رۆژئاوا بە دەست زۆری پەنابەرانەوە دەناڵێنن، ئەم وڵاتانە دەیانەوێ چارەسەرێكی خێرا بۆ شەڕی سووریا بدۆزنەوە، لە کاتێکدا شەڕی سووریا وا پێنج ساڵە بەردەوامە.












K24