توركیا رایگه‌یاند به‌وه‌ی ئاماده‌یه‌ هه‌موو رێو شوێنێكی به‌ په‌له‌ وه‌ربگرێت بۆ كۆنترۆڵكردنی سنووری هاوبه‌شی له‌گه‌ڵ سوریا ، ئه‌مه‌ هاوكاته‌ له‌گه‌ڵ ئه‌و راپۆرتانه‌ی كه‌ ئاماژه‌ به‌وه‌ ده‌ده‌ن كۆبوونه‌وه‌یه‌كی ئه‌منی چاوه‌روانكراو له‌ ئارادایه‌ له‌ نێوان گه‌وره‌ به‌رپرسانی تورك بۆ تاوتۆی كردنی ئه‌نجامدانی كرده‌وه‌ی سه‌ربازی له‌ناو خاكی سوریا .

به‌پێی سه‌رچاوه‌كانی هه‌واڵ بڕیاره‌ ئه‌مڕۆ ئه‌نجوومه‌نی ئاسایشی توركیا كۆبوونه‌وه‌یه‌ك ئه‌نجام بدات بۆ تاوتۆی كردنی چۆنیه‌تی ئه‌نجامدانی ئۆپراسیۆنێكی سه‌ربازی له‌ باكوری سوریا ئه‌ویش بۆ دامه‌زراندنی ناوچه‌یه‌كی دابراو له‌ ناوچه‌كه‌ .

رۆژنامه‌ی حورییه‌تی توركی بڵاویكرده‌وه‌ كه‌ دوازده‌ هه‌زار سه‌ربازی تورك ئاماده‌ كراون بۆ چوونه‌ ناو سوریا بۆ دامه‌زراندنی ناوچه‌یه‌كی پارێزراو بۆ پاراستنی سنووری توركیا له‌ هه‌ره‌شه‌ی كه‌سانی توندره‌و . ئه‌حمه‌د داوود ئۆغلو سه‌رۆك وه‌زیرانی توركیا له‌لای خۆیه‌وه‌ رایگه‌یاند كه‌ وڵاته‌كه‌ی ئاماده‌یه‌ له‌ وه‌رگرتنی هه‌ر رێو شوێنێك له‌ پێناو پاراستنی سنووره‌كانی .