دادگای لاهای، مالیكی و چه‌ند هاوكارێكی دادگایی ده‌كات
ژماره‌یه‌ك له ماڵپه‌ڕه عیراقییه‌كان له‌سه‌ر زاری محه‌ممه‌د كه‌عبی، وته‌بێژی دادگای لاهای بۆ ناوچه‌ی خۆرهه‌ڵاتی ناوه‌ڕاست، ئه‌وه‌یان بڵاوكرده‌وه، كه نوری مالیكی، سه‌رۆكی پێشووی حكومه‌تی فیڕاڵ و ژماره‌یه‌ك له هاوكارانی، له دادگاكه‌یان سكاڵایان له‌سه‌ر تۆماركراوه و به‌تۆمه‌تی كۆمه‌ڵكوژی، دادگا داوایان ده‌كات.
وته‌بێژه‌كه روونیكرده‌وه، كه جگه له مالیكی، هه‌ر یه‌ك له فه‌ریق روكن فاروق ئه‌عره‌جی، به‌ڕێوه‌به‌ری نووسینگه‌ی سه‌ربازی و فه‌ریق روكن عه‌لی غه‌یدان، فه‌رمانده‌ی هێزه وشكانییه‌كانی و سه‌عدون دلێمی، وه‌زیری به‌وه‌كاله‌تی به‌رگری و عه‌دنان ئه‌سه‌دی، وه‌كیلی پێشكه‌وتووی وه‌زاره‌تی ناوخۆ و زوهێر غه‌رباوی، سه‌رۆكی ده‌زگای هه‌واڵگری و فه‌ریق قاسم عه‌تا، به‌ڕێوه‌به‌ری پرۆسه‌كان له ده‌زگای هه‌واڵگری و فه‌ریق تاڵب شه‌غاتی، سه‌رۆكی ده‌زگای دژه تیرۆری عیراق، كه سه‌رجه‌میان له‌سه‌رده‌می حكومه‌ته‌كه‌ی مالیكی ئه‌و پۆستانه‌یان بووه، بانگهێشتی دادگا ده‌كرێن.
ئاماژه‌ی به‌وه‌شدا، كه دادگا دۆسیه‌ی ته‌واوی له‌به‌رده‌سته به‌و تاوانانه‌ی مالیكی و هاوكاره‌كانی ئه‌نجامیانداوه، كه بریتین له كۆمه‌ڵكوژی له‌هه‌ریه‌ك له پارێزگاكانی كه‌ركوك، و ئه‌نبار، ئه‌مه جگه له ئه‌شكه‌نجه‌دان و پێشێلكردنی مافه‌كانی مرۆڤ و په‌یڕه‌وكردنی چه‌ندین جۆری ئه‌شكه‌نجه‌دان و پێشێلكردنی ئازادییه‌كانی رۆژنامه‌گه‌ری، كه پێچه‌وانه‌ی رێكه‌وتنه‌كانی جنێف و په‌یماننامه‌كانی نه‌ته‌وه یه‌كگرتووه‌كان و یاسای نێوده‌وڵه‌تین.
سه‌رچاوه‌یه‌كی تایبه‌تیش به خه‌ندانی راگه‌یاند :" پێشتر پیاوێك به‌ناوی عوده‌ی روبه‌یعی، كه كوڕێكی له‌سه‌رده‌می حوكمی مالیكیدا رفێندراو تائێستا چاره‌نووسی دیار نییه، هه‌زاران ئیمزای له‌سه‌ر به‌دادگایی گه‌یاندنی سه‌رۆك وه‌زیرانی پێشوو، كۆكرده‌وه و پێشكه‌شی دادگای لاهای كرد".
xendan
