رۆژی شه‌ممه‌ میلیشیا حووسییه‌كان پاڵاوتگه‌ی نه‌وتی به‌نده‌ری عه‌ده‌نیان بۆردومان كرد كه‌ له‌ژێر كۆنترۆڵی هێزه‌ ده‌ریاییه‌كانی هاوپه‌یمانی عه‌ره‌بیدایه‌و له‌ ئاكامی ئه‌و بۆردومانه‌دا ئاگرێكی گه‌وره‌ له‌ پالوتگه‌كه‌ به‌ربووه‌. له‌لایه‌كی دیكه‌وه‌ میلیشیا حووسییه‌كان و هێزه‌كانی عه‌لی عه‌بدوڵڵا سالح به‌ تۆپی قورس و به‌ تانك له‌هه‌موو به‌ره‌كانی ڕوو به‌ ڕوو بوونه‌وه‌دا له‌ ته‌عز چیای جه‌ڕه‌و ده‌وروبه‌رو گه‌ڕه‌كه‌كانی شاره‌كه‌یان بۆردومان كردو چه‌ندان ته‌قینه‌وه‌ له‌ چیای جه‌ڕه‌و گه‌ڕه‌كی وادی جه‌دیدو عه‌صێفره‌و شه‌قامی چلی و ته‌پۆڵكه‌ى برایان له‌ شاره‌كه‌ روویان دا.

له‌ شاری یه‌ریمیش هێزه‌كانی به‌ره‌نگاری میللی له‌ بۆسه‌یه‌كدا هێرشیان كرده‌ سه‌ر كاروانێكی میلیشیا حووسییه‌كان كه‌ به‌ره‌و شاری ته‌عز ده‌ڕۆیشتن و له‌ ئاكامدا حه‌وت چه‌كداری حووسی كوژران و پێنجی دیكه‌یش برینداربوون و كامیۆنێك به‌ چه‌كه‌وه‌ سووتێنرا.

لاى خۆیانه‌وه‌ فڕۆكه‌كانی هاوپه‌یمانی عه‌ره‌بی هێرشیان كرده‌ سه‌ر خانووى چه‌ند سه‌ركرده‌یه‌كی میلیشیا حووسییه‌كان و یاریده‌ده‌رانی عه‌لی عه‌بدوڵلا سالح له‌ شاری عه‌ده‌ن و سه‌ربازگه‌ى ماس له‌ باشووری مه‌ئره‌ب. هاوكات فه‌رمانده‌یه‌كی حووسییه‌كان له‌ پارێزگه‌ى حوده‌دیه‌ له‌لایه‌ن چه‌ند چه‌كدارێكی نه‌ناسراوه‌وه‌ كوژرا.