ئه‌مه‌ریكا: ئێران به‌رده‌وامه له پشتگیریكردنی گروپه تیرۆریستییه‌كان
رۆژی هه‌ینی ؛ وه‌زاره‌تی ده‌ره‌وه‌ی ئه‌مه‌ریكا راپۆرتی تایبه‌تیی خۆی له‌باره‌ی چالاكییه‌كانی گروپه تیرۆریستییه‌كان له ساڵی 2014 بڵاوكرده‌وه و له به‌شێكی راپۆرته‌كه‌دا ئاماژه به‌وه كراوه كه ئێران به‌رده‌وامه له پشتگیریكردنی گروپه توندڕه‌وه‌كانی وه‌ك حزبولڵای لوبنان و بزووتنه‌وه‌ی حه‌ماس.
به‌پێی راپۆرتی وه‌زاره‌تی ده‌ره‌وه‌ی ئه‌مه‌ریكا؛ ئێران به‌رده‌وامیشه له هاوكاریكردنی میلیشیا شیعه‌كانی عێراق كه له دژی داعش شه‌ڕ ده‌كه‌ن و رایگه‌یاندووه كه‌یه‌كێك له‌و گروپانه‌ی ئێران هاوكاریی ده‌كات له لیستی گروپه‌كانی تیرۆریستی دایه .
هه‌ر به پێی راپۆڕته‌كه؛ له ساڵی 2014 زیاتر له 13 هه‌زار هێرشی تیرۆریستی له 5 وڵات ئه‌نجام دراون و له‌و ساڵه‌دا مانگانه 1122 هێرشی تیرۆریستی روویانداوه.
زۆربه‌ی ئه‌و هێرشانه له عێراق؛ ئه‌فغانستان و پاكستان روویانداوه و زیاتر له 7500 كه‌س كوژراون. هه‌ر به پێی راپۆرته‌كه له ئه‌نجامی 3360 هێرشی تیرۆریستی له عێراق؛ زیاتر له 10 هه‌زار كه‌س كوژراون.
