شه‌ڕوپێكدادان و بۆردومانكردن له یه‌مه‌ن به‌رده‌وامه
هاوكات فڕۆكه‌خانه‌ى سه‌ربازی عه‌ته‌ق له پارێزگه‌ى شه‌بوه و ناوچه‌ى غیل له پارێزگه‌ى جۆف و سه‌ربازگه‌یه‌كى گاردى كۆماری سه‌ر به عه‌لى عه‌بدوڵڵا سالح له ناوچه‌ى ئه‌زره‌قه‌ین له باكووری سه‌نعا بۆردومان كران و سه‌رچاوه‌كانیش ئاماژه به‌وه ده‌كه‌ن كه له‌و هێرشه ئاسمانیانه‌دا ژماره‌یه‌ك له سه‌رانی حووسییه‌كان كوژراون و چه‌ندان كامیۆنی سه‌ربازی و زرێپۆش و چه‌كی قورس تێكشكێنراون .
هاوكات له ئاكامی بۆردومانكردنی ناوچه‌ی جفینه له پارێزگه‌ى مه‌ئره‌ب ژماره‌یه‌ك له چه‌كداره حووسییه‌كان كوژران و برینداربوون.
لاى خۆیانه‌وه هێزه‌كانی به‌رگری میللی هێرشێكی فراوانیان كرده سه‌ر چه‌كداره حووسییه‌كان و هێزه‌كانی عه‌لی عه‌بدوڵڵا سالح له باشووری رۆژئاوای شاری ته‌عز .
حووسییه‌كانیش به شێوه‌یه‌كی هه‌ڕه‌مه‌كی گه‌ڕه‌كه‌كانی شارى عه‌ده‌نیان بۆردومان كردو چوار هاووڵاتی كوژران و پتر له 20 كه‌سی دیكه‌ش برینداربوون.
