ئه‌مینداری گشتیی ئه‌نجومه‌نی دیاریكردنی به‌رژه‌وه‌ندییه‌كانی كۆماری ئیسلامی ئێران به‌توندی هه‌ڕه‌شه‌ ده‌كات له‌وه‌ی ناوی ناوه‌ سه‌ره‌ ڕۆییه‌كی تازه‌ی سعودیه‌. موحسین ڕه‌زایی گوتی: سعودیه‌ پلانی سه‌ره‌ڕۆیییه‌كی تازه‌ی به‌ده‌سته‌وه‌یه‌ بۆ گه‌یاندنی گرژی به‌سنوره‌كانی ڕۆژئاوا و ڕۆژهه‌ڵاتی ئێران.

ئه‌مه‌ش به‌هاوكاریی ئه‌مریكا و زایۆنیزم ئه‌كات. بۆیه‌ داوا ده‌كه‌ین سوپای پاسداران و هه‌موو جه‌نگاوه‌ره‌كانی به‌ره‌ی ئیسلام، ئاماده‌بن بۆ ئه‌وه‌ی وه‌ڵامه‌كه‌مان یه‌كلاكه‌ره‌وه‌ بێت. ڕه‌زایی گوتیشی: هه‌نگاوه‌كانی سعودیه‌ له‌یه‌مه‌ن و سوریا وبه‌حره‌ین به‌رده‌وام ئه‌بن پێشی وایه‌: “ئه‌گه‌ری هه‌یه‌ سعودیه‌ سه‌ره‌ڕۆیییه‌كی تازه‌ له‌ناوچه‌كه‌دا بكات. بێگومان ئێستا ناتوانین به‌وردی جۆری ئه‌و سه‌ره‌ڕۆیییه‌ دیاری بكه‌ین. به‌ڵام پێده‌چێت له‌شوێنێكی تر، سیناریۆكه‌ی یه‌مه‌ن دووباره‌ بكاته‌وه‌.

ڕه‌زایی له‌درێژه‌ی لێدوانه‌كانیدا بۆ فارسنیوز گوتی: سیاسه‌تی ئه‌مریكا و زایۆنیزم ئه‌وه‌یه‌ عه‌ره‌به‌كان بده‌ن به‌گژی یه‌كتردا، هه‌روه‌ها هه‌مووشیان بده‌ن به‌گژی كۆماری ئیسلامیدا.

ڕوونیشی كرده‌وه‌: ئێمه‌ تێبینی نمونه‌ی ئه‌و جوڵه‌یه‌ ده‌كه‌ین له‌ عێراق و سوریا و یه‌مه‌ن، ئێستاش ئه‌وان پلان داده‌نێن بۆ ئه‌وه‌ی ئاڵۆزی بۆ سنوره‌كانی ڕۆژهه‌ڵات وڕۆژئاوای ئێران بگوازنه‌وه‌.