ژماره‌یه‌كى زۆر له‌ سه‌ركرده‌كانى وڵاتانى كه‌نداو ئاماده‌یى و به‌شدارییان له‌ لوتكه‌ى ئه‌مه‌ریكا و كه‌نداو كه‌ بڕیاره‌ رۆژانى چوارشه‌ممه‌ و پێنجشه‌ممه‌ له‌ كامپ ده‌یڤێد به‌ڕێوه‌بچێت، دووپات كرده‌وه‌ . له‌مباره‌یه‌وه‌ باراك ئۆباما سه‌رۆكى ئه‌مه‌ریكا له‌ په‌یوه‌ندیه‌كى ته‌له‌فۆنیدا له‌گه‌ڵ شا سه‌لمان بن عه‌بدولعه‌زیز شاى سعودیه‌ تاوتوێى ئاماده‌كاریه‌كانى لوتكه‌كه‌یان كرد.

رۆژى یه‌كشه‌ممه‌ شاى سعودیه‌ رایگه‌یاندبوو كه‌ له‌ لوتكه‌ى كامپ ده‌یڤێد ئاماده‌ نابێت و جێنشینه‌كه‌ى ده‌نێرێت . هاوكات جۆش ئایرنست گوته‌بێژى كۆشكى سپى له‌ لێدوانێكدا رایگه‌یاند، تا ئێستا سعودیه‌ هیچ نیگه‌رانیه‌كى به‌رامبه‌ر خشته‌ و كاره‌كانى لوتكه‌كه‌ ده‌رنه‌بڕیوه‌. واش بڕیاره‌ له‌ لوتكه‌ى كامپ ده‌یڤێد، ئه‌مه‌ریكا هاوپه‌یمانه‌كانى له‌ كه‌نداو له‌ زۆر پرسدا دڵنیا بكاته‌وه‌ له‌وانه‌ش وتوێژه‌كان له‌باره‌ى به‌رنامه‌ ئه‌تۆمیه‌كه‌ى ئێران.