وه‌زاره‌تی‌ ده‌ره‌وه‌ی‌ ئه‌مه‌ریكا، له‌ راپۆرتی‌ ساڵانه‌ی‌ خۆیدا سه‌باره‌ت به‌ بارودۆخی‌ تیرۆریزم له‌ جیهاندا، ئاماژه‌ به‌وه‌ ده‌كات كه‌ كۆماری‌ ئیسلامیی‌ ئێران، هه‌تا ئێستاش چالاكترین حكوومه‌تی‌ پشتیوانی‌ تیرۆریزمه‌ له‌ جیهاندا.

راپۆرتی‌ ساڵانه‌ی‌ وه‌زاره‌تی‌ ده‌ره‌وه‌ی‌ ئه‌مه‌ریكا ده‌ڵێت له‌ ساڵی‌ 2011، كۆماری‌ ئیسلامیی‌ ئێران چالاكترین حكوومه‌تی‌ پشتیوانی‌ تیرۆریزم بووه‌ و به‌رده‌وام یارمه‌تیی‌ رێكخراوه‌ تیرۆریستییه‌كانی‌ كردووه‌ له‌ رۆژهه‌ڵاتی‌ ناوه‌ڕاست.
راپۆرته‌كه‌ جه‌خت له‌سه‌ر ئه‌وه‌ ده‌كاته‌وه‌ كه‌ ئێران هه‌تا ئێستاش چه‌ك و ته‌قه‌مه‌نی‌ بۆ حیزبوڵای‌ لوبنان و گرووپه‌ توندڕه‌وه‌كانی‌ فه‌له‌ستین و رێكخراوی‌ حه‌ماس، دابین ده‌كات.
راپۆرته‌كه‌ هه‌روه‌ها كۆماری‌ ئیسلامیی‌ ئێرانی‌ به‌وه‌ تۆمه‌تبار كردووه‌ كه‌ رێگه‌ی‌ به‌ رێكخراوی‌ تیرۆریستیی‌ قاعیده‌ داوه‌، بۆ گواستنه‌وه‌ی‌ سه‌رمایه‌ و هێزه‌كانی‌ خۆی‌، وڵاتی‌ ئێران به‌كار بهێنێت.