قوتابی و گەنجی كورد ئەو كاراكتەر و كەسایەتییەن كە سیمای پێشمەرگە و خۆبەخشی لێدەخوێندرێتەوە. گەنجی كوردستانی سەرەڕای قەیرانی ئابووری جارێكی دی سەلماندییەوە كە هەڵگری فیكر و ئینتمای بەرزی نەتەوەییە، ئەوەتا لە بەرەكانی شەڕ بوێرانە رووبەرووی تیرۆرستانی خەلافەتی دەوڵەتی ئیسلامی داعش و شۆڤێنیەكان بوونەتەوە و گەورەترین داستان و گیانفیداییان تۆماركردووە، هەروەكو چۆن لە شۆڕشەكانی ئەیلوول و گوڵان و راپەریندا خەباتگێڕ بوون و رۆڵی گرنگیان لە بزووتنەوەی رزگاریخوازی گەلی كوردستان هەبووە، بگرە لە هەڵمەتی خوێنبەخشین و كۆكردنەوەی كۆمەك و هاوكاری ئاوارە و پەناهەندەكانیش نموونەیەكی جوانیان نیشان نەتەوەكەیان دا. رێكخراوەكانی قوتابیان و لاوان و چالاكوانی مەدەنی لەم راپۆرتەی (گوڵان)دا باس لە نەبەردییەكانی لاوان دەكەن و بە داینەمۆ و پارێزەری كوردستانیان لە قەڵەم دەدەن.

گەنجی پێشمەرگە بە ئومێدەوە دەڕوانێتە ئایندە و
رێگرە لەبەردەم هێزی تاریكی
سەرەتا حەسەن شێخ عەلائەدین سكرتێری یەكێتی قوتابیانی كوردستان لە لێدوانێكی تایبەتدا بۆ گوڵان گوتی: «قوتابی و لاوی كوردستانی ئەو كەسایەتییە بەتوانا و بوێرەن كە بە درێژایی قۆناغەكانی بزووتنەوەی رزگاریخوازی گەلی كوردستان چۆكیان بەهەموو ئەو دوژمنانە داداوە كە لەژێر ناوی جۆراوجۆری شۆڤێنی و توندڕەو ویستوویانە زیان بە كەرامەت و فیكری نەتەوەیی كورد بگەیەنن، سەركەوتنەكانی ئەمڕۆی پێشمەرگە لە بەرەكانی شەڕدا كە بەشی هەرە زۆری بە هێز و بازووی گەنج ولاوانە لە نەبەردییەكانی رابردوو كەمتر نییە، ئەوە توانای گەنجی كوردە رووبەڕووی هێزێكی دڕندەی وەكو داعش و عەرەبە قەومچییەكان دەبێتەوەو جارێكی دی رێگەدەكرێت لەبەردەم جێبەجێكردنی پرۆسەیەكی دیكەی ئەنفال و قەتڵوعامكردنی ئافرەت و پیاو و منداڵی كورد، واتە بە ئیرادە و ئومێدێكی گەشەوە دەڕواننە ئایندە، ئیتر چۆن رێگە بەهێزێكی تاریكیپەرست دەدەن كوردستان خابوور بكەن؟». گوتیشی: «لە رۆژی ئاڵای كوردستان لە ناوەندەكانی زانكۆ و قوتابخانەكان وەكو دیاردەیەكی خۆرسك قوتابیان بۆ پاڵپشتی براكانیان لە سەنگەرەكانی پێشەوەی قارەمانێتی روویان لە پۆشینی جلوبەرگی پێشمەرگە كرد، ئەمە دیاردەیەكی خۆرسكانە بوو، بەڵام شرۆڤە و قسەوباسێكی زۆر هەڵدەگرێت، ئێمە وەكو یەكێتی قوتابیان هاندەربووین بۆ بەرزكردنەوەی هەستی نەتەوایەتی، لەمەشدا قوتابیان خۆیان هاوكارمان بوون، هەروەها لە كاتی كەوتنەوەی ئاڵۆزییەكان و داگیركردنی شاری موسڵ جگە لەوەی بەردەوامیمان بەخوێندن دا، چەندین ئەنداممان پێوەندییان بە ریزەكانی پێشمەرگەوە كرد، تەنانەت لەگەڵ هەڕەشەكردنی تائیفی بۆ سەر قوتابیانی كورد لەبەغدا بەسوپاسەوە سەرۆكایەتی حكومەت بەدەنگمانەوە هاتو لە رێگەی دوو فڕۆكەوە قوتابیانی كوردی بۆ هەولێر و سلێمانی گواستەوە».
لاوان 80%ی هێزەكانی پێشمەرگە لە بەرەكانی شەڕ پێكدەهێنن
تەیمور تەیمور عەبدال سكرتێری یەكێتی لاوانی دیموكراتی كوردستان، لەوەڵامی پرسیارێكی گۆڤاری گوڵان هێمای بۆ ئەوە كرد، كە گەنجان و لاوان ئەو توێژەی ناو كۆمەڵگەی كوردستانن كە لە زەمەنە جیاجیاكانی ناو مێژوودا بزوێنەری سەرەكی بوون لە شۆڕشەكان و راپەڕینەكاندا، ئێستاش رێگا بە دوژمنان نادەن بەناوی فیكری توندڕەوەوە كوشتنی مرۆڤی كورد حەڵاڵ بكەن». گوتیشی: «گەنج و لاوی كوردستان خاوەنی توانا و وزەیەكی بێ وێنەن و لە زەمەنە دژوار و قۆناغە سەختەكانی مێژووی كوردستاندا رۆڵی جوامێرانە و گیانفیدایانەیان بینیوە، راستە قۆناغ و زەمەنەكان وایكردووە ئەرك و بەرپرسیارێتیەكان جیاوازییان بەسەردا بێت، بەڵام هەرگیز كاریگەریی لەسەر ئینتیما و فكر و هەڵوێستی گەنج بەرامبەر بە نەتەوە و نیشتمانەكەی نەكردووە، هەروەكو چۆن بەشداریی لاوان لەم شەڕەی داعش بینرا كە هەموو پێشبینیەكانی تێپەڕاند تا گەیشتە گیانفیدایی و قوربانیدان، ئێستا لاوان 80%ی هێزەكانی پێشمەرگە لە بەرەكانی شەڕ پێكدەهێنن، ئەمەش بۆ ئەوە دەگەڕێتەوە كە لاوی كورد خاوەنی هێزو پێشەنگایەتی و داینەمۆی میللەتن، چەندین لاومان لەناو رێكخراوەكە هەبووە كە خۆبەخشانە پێشمەرگایەتییان كردووە و بگرە چەندین قوتابی زانكۆ و كادیر و ئەنداممان هەبووە لەم شەڕانەدا شەهید بوون، سەركردایەتی جەنابی بارزانی و بەشداریكردنی راستەوخۆی لە بەرنامەو پلانی شەڕەكە بۆ گەنجی كورد دەرسێكی زۆر گرنگ بوو، كە سەلماندی جەنابی بارزانی وەكو گاندی و ماندێلا و سەرۆكە شۆڕشگێڕەكانی جیهان بەرگری لە نەتەوەكەی دەكات، ئەمە جێگەی شانازی و سەربەرزییەكی زۆری گەنجە، بەشداریكردنی خۆبەخشانەی لاوی كورد لە سەنگەرەكانی پێشەوەی پێشمەرگە و شەهیدبوونیان نیشانەی پیرۆزی و بەرزی ئینتیمایانە بۆ نەتەوەو خاك، تەنانەت لە رووی هزر و فیكرییەوە گەنج شەڕی داعش و ئەڵقە لە گوێكانی قەومچییەكانی عەرەب دەكات، چونكە ئەو فیكرە شەڕانگێز و وەحشیگەرییە لەگەڵ خودی حەز و ویستەكانی گەنجی ئێمەدا یەك ناگرێتەوە، بەشێوەیەكی گشتی بەشداریكردنی لاوی كورد لە پارێزگاریكردنی كوردستان پێویستی بە شرۆڤە و توێژینەوەی زیاترە، چونكە لەهەموو پێشبینی و ئەگەرە چاوەڕوانكراوەكان تێپەڕی كردووە، بێگومان ئەمە ئەوە ناگەیەنێت كە چەند كەس و تاقمێكی كەم كە فریودراون بە بیروبۆچوونی دژ بەمرۆڤایەتی و كوردایەتی نەچووبنە ناو ریزەكانی داعشەوە، بەڵام ئەمانە ژمارەیان كەمە، تەنانەت ئەو لاوانەی پێشتر لە ئاكامی ململانێی حزبە سیاسییەكانی كوردستان بێ ئومێد ببوون و رەخنەی توندیان دەگرت، ئەوانیش هاتوونەتەوە مەیدانەكە و بەرگری لە كوردستان دەكەن، ئەمەش راستی ئەو بۆچوونانەی ئێمە دەردەخات كە پێشتریش بڕوامان وابوو پێویستە سیاسەتمەداران كراوەتر لە رەخنەكانی گەنجی كورد بڕوانن، چونكە ئەوان تێدەكۆشن بۆ كرانەوەی كۆمەڵگە و دۆزینەوەی ژیانێكی وا كە حەزەكانیان بێتەدی و رەخنە و ناڕەزایەتی و بگرە خۆپیشاندانەكانیش هیچ پێوەندی بە نزمبوونەوەی ئینتیماوە نەبووە، بگرە بەپێچەوانەوە ئەوە بەرزیی ئینتیما بووە بۆ نیشتمان و نەتەوە كە داوای چاكسازی و چارەسەركردنی كێشەكانیان كردووە، ئەوەتا هەموو ئەو هاندان و دیاردە ناوازە جیهانییە نەیتوانی گەنجی كورد لەخشتە بەرێت. كاتێك لەیادی 18ی شوباتی دامەزراندنی یەكێتی لاوانی دیموكراتی كوردستان نزیك دەبینەوە، زیاتر ئەم رێكخراوە لە جاران لە خزمەتی پرسی نەتەوایەتی و نیشتمانیدا دەبێت، بێ پاراستنی ئەم پرسە ناتواندرێت خواست و ویستەكانی لاوی كوردستانی لە دیموكراسی و ئازادی و ژیانێكی پڕ لە كەرامەتی و خۆشگوزەرانی دابین بكرێت، هەر بۆیە بە درێژایی مێژوو هەموو كارو چالاكیەكانی خۆبەخشانەو هونەری و رۆشنبیری و وەرزشی ئێمە لەچوارچێوەی گرێدانی گەنج بە خاك و نەتەوەدا بووە».
گەنج و گەڕانەوەی رۆڵی رێبەرایەتی لە كایەی حوكمڕانیدا
سەرتیپ عەلی سكرتێری كۆمەڵەی خوێندكارانی كوردستان لە لێدوانێكی تایبەتدا بۆ گوڵان، باسی ئەوە دەكات كە گیانفیدایی گەنج لە ریزەكانی پێشمەرگە و بوێری و نەبەردیەكانی پێویستە وێستگەیەك بێت بۆ ئەوەی ناوەندی بڕیار لە كوردستان و لەناو پارتە سیاسییەكاندا چاوخشاندنەوەیەك بە سیاسەت و بەرنامەو كاریاندا بكەن، بەتایبەتی لەو شوێنانەی توێژی گەنجان تێیدا پەراوێز خراون و رۆڵی رێبەرایەتییان لە كایەی حوكمڕانیدا پێ بدرێتەوە، گوتیشی: «پێكهاتەی پێشمەرگە و شەهیدەكان كە زۆربەی لە توێژی گەنج و لاوانن، نیشانەیەكە بۆ گرنگی ئەو توێژە و ئامادەیی گیانفیداكاری تێیدا لە هەر كاتێك كە زانی میللەتەكەی و خاكەكەی دەكەوێتە بەر مەترسی، راستە گەنجانمان بەئێستاشەوە گلەیی و رەخنەی زۆریان لە حكومەتەكەی خۆیان هەیە، بەڵام ئەمە پێوەندی بە كەمبوونەوەی ئینتیمایان بۆ خاك و نەتەوەكەیان نەبووە، رووداوەكانی ئەم دواییەی قەیرانی ئابووری و شەڕی داعش و ئامادەییان لە ناوەندەكانی زانكۆ و پەیمانگە و خوێندنگەكان و شەقام ئەو راستییەیان دەرخست كە ئەو هێزە پۆڵایینەن كە چارەنووسی ئەم نەتەوەیەیان لەسەر بنیاتدەنرێت، ئێمە لە ئەندامانی رێكخراوەكەمان چەندین پێشمەرگە و شەهیدو بریندارمان هەیە، تەنانەت لە بۆنە و یادەكاندا گۆڕانكارییەكی گەورە بەسەر تواناو هزری نەتەوایەتی گەنجدا هاتووە، بڕوا بكەن لە تەنیا دوو رۆژی هەڵمەتی خوێنبەخشین كە لە زانكۆی سلێمانی ئەنجاممان دا، 375 بوتڵ خوێن كۆكرایەوە، ئەگەر تیمی پزیشكی لەتوانایدا هەبووایە، زیاتریش كۆدەكرایەوە، بۆیە بەڕاستی توێژی گەنجان لە هەموو بوارێكدا شایستەی پێشەنگێتی و رێزلێنانن».
بەناوی ئایین گەنجەكانمان فریو دەدەن و
دەیانكەنە قوربانیی مەرام و ئەجێندای دەرەكی
كۆچەر بەختیار سكرتێری یەكێتی گشتی قوتابیانی كوردستان، جگە لە بەرزڕاگرتنی رۆڵی گەنج لە پرسە نەتەوەیی و نیشتمانییەكاندا باسی لە كارێكی قێزەوەن كرد، كە بە ناوی ئایینەوە هەوڵی فریودانی گەنجی كورد دەدرێ و هەر لەو بارەیەوە بۆ گوڵان گوتی: «رۆڵی توێژی قوتابیان و لاوان لەسەر پرسە نەتەوایەتی و نیشتمانییەكان مێژوویەكی دوور و درێژی هەیە و ئێستاكە وەكو دیاردەیەكی خۆڕسكی لێهاتووە، ئەم توێژە گرنگە لە قۆناغە چارەنووسسازەكان و وێستگە گرنگەكانی نەتەوەكەمان بەتایبەتی كاتێك گەل رووبەڕووی ژینۆساید بووبێتەوە، هەموو خەون و ئارەزووەكان و داواكارییەكانی وەلاناوەو تەنیا تێكۆشاوە بۆ پارێزگاریكردن و بەرگریكردن لە نەتەوەكەی، ئەوەتا سەرەڕای قەیرانی دارایی و بێكاری و دابەزینی ئاستی بژێوی توێژی گەنجان، كەچی هەستی نیشتمانییان زۆر بەهێزتر بووە لەو پیلان و دژایەتیكردنەی حكومەتی بەغدا و تیرۆرستانی داعش، بەڵام جێگەی داخە لە رێگەی بەشێك لە مزگەوتەكان و هەندێك مەلاو مامۆستای ئایینی كاریان بۆ فریودانی گەنج كردووە، بە ڕادەیەك رایانكێشاونەتە ناو بازنەی توندڕەویی و توندوتیژی و ژمارەیەكیان ئەوەتا ئێستا لەناو ریزەكانی داعش تاوانی كوشتنی كورد و رفاندنی ئافرەت و سەربڕینی خەڵكی مەزڵووم ئەنجام دەدەن، مەلای كورد هەیە لە ناو ریزەكانی داعشەوە هەڕەشە لە خەڵكی هەولێر و سلێمانی و دهۆك دەكات و لەگەڵ خۆیدا چەندین گەنجی فریوداوە، هەندێك لە رێكخراوە توندڕەوەكان بە ناوی ئایین گەنجەكانمان فریو دەدەن و دەیكەنە قوربانی مەرام و ئەجێندای دەرەكی، گەرچی ئەم گەنجانە بەراورد بە زۆرینەی توێژەكەیان ژمارەیان زۆر كەمە، بەڵام پێویستی بەهەڵوەستە هەیە. پێشمەرگەیەكی گەنج بەرگری لە كەرامەتی كورد و هەموو پێكهاتەكانی دەكات و رێگە نادات داعش ئافرەتمان بڕفێنێت و وەكو دەستكەوتی شەڕ و سەبایە مامەڵەیان لەگەڵ بكات، چۆن دەبێت گەنجێكی كورد ئەو خیانەتە گەورەیە بەناوی ئایینەوە ئەنجامبدات؟ وەزارەتی ئەوقاف و كاروباری ئایینی بە ئەركی خۆی هەڵنەساوە بۆ كۆنتڕۆڵی ئەو مزگەوت و قوتابخانانەی كە تێیدا گەنجی كورد فریو دەدرێن و دەیانكەنە قوربانیی ئەجێندای دەرەكی، ئینتیمای بەرزی توێژی گەنج رێگرە لە بەردەم ئیستغلالكردنی ئازادیی رەها بۆ بەرهەمهێنانی هزری توندڕەوی و وەحشیگەری و سەربڕین، شەڕەكەی ئەم دواییەی مەلا عەبدوڵڵا نموونەیەكی بەرچاوی ئەم دیاردەیەیە، زۆرجار لەناو رێكخستنی حزبە ئیسلامییەكاندا كەسانی وا هەن فیكر و ئایدیۆلۆژیای توندڕەوی و دەمارگیری بڵاو دەكەنەوە كە جێگای مەترسییە، ئەمڕۆ قوتابی و گەنجی هەرچوار پارچەكەی كوردستان خوێنیان لە پرۆسەی بەرگریكردنی كوردستان رشتووە، كەچی لێرەولەوێ و لە ناو ریزەكانی داعشدا گوێبستی گەنجی دەمارگیر و توندڕەوی كوردستانی دەبین، بۆیە كاتی ئەوە هاتووە گەنجەكان زیاتر تەیارو ئامادە بكرێن بۆ هەستی نەتەوایەتی و نیشتمانی، بەتایبەت پێویستمان بە چاوخشاندنەوەی هەموو پڕۆگرام و بەرنامەی پارتە سیاسییەكان هەیە كە تێیدا وەكو پێویست گرنگییان بە گەنج نەداوە».
بەهەڵە تێگەیشتن لە دەق و ئایەتەكان
لە رووبەڕووبوونەوەی داعش مەترسیدارترە
هەر سەبارەت بە فیكری توندڕەویی ئایینی لەناو هەندێك لەگەنجان و نامۆبوونیان بە ئایینی ئیسلام، ئەحمەد ئەسكەندەر سكرتێری گشتی رێكخراوی گەشەپێدانی قوتابیانی كوردستان بۆ گوڵان گوتی: «داعش لە رێگەی دەرچوون لە دەقەكان و سوود وەرگرتن لێی دوور لە واقیع و شوێن و زەمەنی دیاریكراو، توانیویەتی تا راددەیەك فكری توندڕەوی و توندوتیژی لەناو گەنجەكانی سووریا و عێراق و زۆر شوێنی دنیا بڵاوبكاتەوە، كە بەداخەوە دواتر ئاڕاستەی ئەو رك و قینە رەشە و شەڕەكەیان بەرەو رووی گەلی كوردی موسڵمان كردەوە، لەكاتێكدا كوشتن و ئیهانەكردنی كەرامەتی مرۆڤ پێچەوانەی بنەما ئوسووڵە واقیعەكانی ئیسلامە، بەمەش داعش بووە هەڕەشە لەسەر شەریعەتی ئەو ئیسلامەی كە سەرجەم بەرژەوەندییەكانی باڵای مرۆڤایەتی تێیدا كۆدەبێتەوە، بیروبۆچوونی توندڕەوی داعش كە سەربڕینی مرۆڤی لەلا ئاساییە پێچەوانەی هەموو دەق و ئایەتەكانی قورئانە كە تێیدا هاتووە - ئەگەر مرۆڤێك مرۆڤێك بكوژێت وەكو ئەوە وایە هەموو مرۆڤایەتی كوشتبێت- لە فەرموودەیەكی پێغەمبەر(د. خ ) هاتووە - كوشتنی مرۆڤێك ئەوەندە گەورەیە وەكو ئەوە وایە كەعبە بڕووخێنێت-، هەربۆیە ئێمە وەكو توێژی قوتابیان و گەنج بگرە هەموو گروپە ئیسلامییە میانڕەوەكانی كوردستان و زانایان و مامۆستایانی ئایینی ئەركێكی قورسمان دەكەوێتە سەرشان، ئەویش راستكردنەوەی بەهەڵە تێگەیشتنی دەق و ئایەتەكانە، ئەركی پاراستنی كوردستانمان لەفیكری توندڕەوی و توندوتیژی لەسەر شانە و پێویستمان بەوەیە گەنج و لاوی كورد بەرەو هزری ئیسلامی میانڕەویی ئاراستە بكەین كە بریتیە لە تێگەیشتن لە ئاینی پیرۆزی ئیسلام و خۆشەویستی بۆ نەتەوەو نیشتمان. ئەمڕۆ پێشمەرگە بووەتە ناوێكی جوان لەلای هەموو چین و توێژەكان بەتایبەتی لەلای توێژی گەنجان، منداڵەكانمان سروودی پێشمەرگە دەڵێنەوەو شەهیدە قوتابییەكەی زانكۆی دهۆك بە مەراسیمی قوتابیان بەڕێ كرا، لەلایەكی ترەوە قوتابیان واژوو بۆ نەمانی وەرگرتنەوەی پێشینەی هاوسەرگیری و پێشینەكانی دیكەی پێشمەرگە كۆدەكەنەوە و ئێستا وەكو پرۆژەیەك لەپەرلەمانی كوردستانە، هەروەها بانگەواز بۆ كۆمەك و هاوكاری پێشمەرگە دەكەین هەروەكو چۆن لە رێكخراوەكەمان بانگەوازمان بۆ هاوكاری و كۆمەكردنی خێزانی ئەو پێشمەرگەیە كرد كە باوكی 10 منداڵ بوو، داعشەكان دڵڕەقانە سەریان بڕی، بەڵام پێشمەرگە بووەتە ناوێكی جوان و پیرۆز و هەموومان ئەو هیوایەمان لادروست بووە كە دەوڵەتی كوردستان لەسەر دەستی پێشمەرگە دروست دەبێت، هەروەكو چۆن ئێستا بووەتە دیوارێكی پۆڵایین لەبەردەم رێگرتن لە قەتڵوعامكردنەوەی كورد و تەشەنەكردنی بیرو هزری دڕندایەتی و بێ بەزەیی و توندڕەویی، ئێمە وەكو توێژێكی قوتابیانی یەكگرتووی ئیسلامی كوردستان لەماوەی 20 ساڵی رابردوو كارمان كردووە بۆ پاراستنی ئەو هزر و بۆچوونە میانڕەوەو لەدژی بڵاوكردنەوەی فكری توندڕەویی كە كار بۆ تێكدانی بنەما شەرعییەكانی ئیسلام دەكات، چونكە چەندین گروپی توندڕەو لە دەرەوەی سنوورەكان كاریان بۆ بە هەڵە تێگەیشتنی دەق و ئایەتەكانی ئایینی ئیسلام كردووە و سودیان لە رەهەندی سایكۆلۆژی ئایینیی گەنج وەرگرتووە، هەربۆیە شەڕی داعش بە پێشمەرگەو لەناوبردنی فكری توندڕەویی دەكرێت و لەهەردوو بوارەكەشدا گەنجان لەپێشەنگی ئەو كارەدان».
ئافرەتی لاوی كورد لەشەڕی تیرۆردا
بەهێزترین توانای بە میللەتانی جیهان ناساند
روخۆش سەعید چالاكوانی كۆمەڵگەی مەدەنی لەبواری لاوان، سەبارەت بە رۆڵی ئافرەتی لاو لەناو پرۆسەی نەتەوەیی و نیشتمانیدا باسی ئەوەی بۆ گوڵان كرد كە «ئافرەتانی كورد لە كۆنەوە تا ئێستا بە شێوازی جیاجیا و بە هاوشانی باوك و برا و هاوسەری پارێزگاری كوردستان بوون و لە ئێستاشدا لەناو ریزەكانی پێشمەرگە و شەڕڤان و ئاسایش و پۆلیسدا رۆڵی كاریگەریان هەیە، كارە خۆبەخشەكانی ئافرەتی كورد لە كۆكردنەوەی كۆمەك بۆ پێشمەرگە و برینبێچی و ئامادەكردنی نانخواردن و خوێنبەخشین هەمووی كۆمەڵە نموونەیەكی زیندووی هەستی بەرزی بەرپرسیارێتی و خۆشەویستیی بۆ نەتەوەی كورد و كوردستانە، كاتێك داعشەكان هێرشیان كردە سەر كوردانی ئێزیدی و ئافرەت و كچی كوردیان ڕفاندو كردیانە قوربانی، لەبەرامبەردا سەدان ئافرەتی لاو پێوەندییان بە ریزەكانی پێشمەرگەوە كرد و ژمارەیەكی زۆریشیان وەكو چالاكانی رێكخراوەكانی كۆمەڵگەی مەدەنی چادریان بۆ كۆكردنەوەی كۆمەك و هاوكاریی ئاوارەكان هەڵدا». گوتیشی: «لاوی كورد لە هەموو كات زیاتر هۆشیارە بەرامبەر ئەو فشارو مەرامانەی دەرهەق بە كوردستان و ئەزموونەكەی دەكرێت.
بەپێچەوانەی بۆچوونی زۆر لەو چالاكانەی كە باسیان لە نەمانی ئینتیما لەلای توێژی لاوان دەكرد، ئەمڕۆ لە بەرەكانی شەڕدا مێژوو بە خوێن تۆمار دەكەنەوە، راستە گەنج لە هەندێك رەفتاری نابەرپرسانە رەخنە و گلەیی هەبووە و دژ بە گەندەڵی و نادادپەروەری و پەراوێزخستنی دەنگی ناڕەزایەتی هەبووە، بەڵام هەرگیز دژی ئەم ئەزموونە و ئەو سەركردە دڵسۆزانەی نەبووە كە وڵاتیان پێش بەرژەوەندیی حزبی خستووە، بۆیە لە بەرامبەر ئەم گیانفیدایی و دڵسۆزییە بێ وێنەیەی گەنجان مافی خۆیەتی زیاتر ئاوڕیان لێبدرێتەوە، بەتایبەتی توێژی گەنجان لەناو پێشمەرگەدا، بڕیارەكەی سەرۆكی كوردستان بەدامەزراوەییكردنی هێزەكانی پێشمەرگە گەورەترین ئومێدە بۆ ئەوەی یەكەكانی پێشمەرگە بەرەو بەدامەزراوەییكردن ببردرێت و تێیدا ئافرەتی پێشمەرگەش شوێنی شیاوی خۆی پێبدرێت».