قەشە مەجید رەشید قەشەی كەنیسەی كوردزمانە لەهەولێر و سەرپەرشتی ژمارەیەك لە خێزانە ئاوارەكانی كریستیانەكان دەكات، سەبارەت بە بارودۆخی ئاوارە مەسیحییەكان لە لێدوانێكی تایبەتدا بۆ گوڵان بەمجۆرە رای خۆی دەربڕی: «مەسیحییەكان ئامادە نەبوون ئایینی خۆیان بگۆڕن، هەر بۆیە لەلایەن داعشەكانەوە بێبەزەییانە دەربەدەركران، پێشتریش بە بەردەوام لە موسڵ و ناوچەكانی دیكەی عێراق كریستیانەكان و پیاوانی ئایینی قەتڵوعام كراون، ئەمڕۆ لە كوردستان مەسیحییەكان سەڕەرای خراپی باروگوزەرانی ئاوارەییان، بەڵام هەست بە ئارامی و ئەو پێكەوەژیانە دەكەن كە لێرە دابینكراوە و خەڵكی خێرخوازی كوردستان كۆمەك و یارمەتییان داوین، بەڵام لە ئاست مەینەتی مەسیحییەكان و خراپی بارودۆخەكەیان نییە، داواكارم رێكخراوە خێرخوازەكان كۆمەك و هاوكاریمان بكەن و كابینە و شوێنی حەوانەوەیان بۆ دابین بكرێت».
قەشە مەجید ئەوەشی دووپات كردەوە كە «بەپێچەوانەی حكومەتی عێراقەوە كە تەنانەت نەیتوانی پارێزگاریی لە مەسیحیەكان بكات، حكومەتی هەرێمی كوردستان هاوكاریی ئاوارە مەسیحییەكانی كردووە، بەڵام گەورەیی مەرگەساتەكە و زۆری ژمارەی ئەو ئاوارەنەی روویان لەهەرێمی كوردستان كردووە، بارقورساییەكی زۆری لەسەر حكومەت هەبووە»، گوتیشی: «ئێمە سوپاسی جەنابی مسعود بارزانی سەرۆكی هەرێم و سەركردایەتی سیاسیی كوردستان دەكەین كە ئەركی پارێزگاریكردنی مەسیحییەكانیان لەئەستۆ گرتووە، داواكارین لەگەڵ ئازادكردنی موسڵ بەڕێزیان كار بۆ زەمانەتێكی نێودەوڵەتی بكات، چونكە زەحمەتە جارێكی دی خەڵكی متمانەی گەڕانەوە بۆ ناوچەكانیان هەبێت، بەتایبەتی دوای ئەوەی لەو ناوچانەدا بیروبۆچوونی توندڕەویی و تائیفی بڵاوبۆتەوە».