-چالاكی و پرۆژەی رۆشنبیری و لاوان لە قەزاو ناحیەكان فراوانتر دەكەین

-سەنتەری رۆشنبیری وا هەیە بۆتە ئۆفیسێك بۆ دانیشتنی ئێواران و چاخواردنەوە

-لەم ساڵدا بایەخ بەو درامایانە دەدەین كە پشت بەشاكارەكان دەبەستن

وەزارەتی رۆشنبیری و لاوانی هەرێمی كوردستان بەیەكێك لەو وەزارەتانە دادەنرێت كە قسەوباسێكی زۆری لەسەر دەكرێت، بەو پێیەی پێوەندی ڕاستەوخۆی بەزۆر بواری رۆشنبیری و راگەیاندن و هونەری و وەرزش و لاوان و تەنانەت رۆشنبیری گشتییەوە هەیە، ئەم بوارانەش لەجیهانی ئەمڕۆماندا بەبەردەوامی لەبەرەوپێشچوونێكی بەردەوامدان.
لەم دیمانەیەدا كاوە مەحمود وەزیری رۆشنبیری و لاوان بەراشكاوانە وەڵامی پرسیارو رەخنەكانی گوڵانی دایەوە. ئەمەش دەقی دیمانەكەی وەزیری رۆشنبیری و لاوانە لەگەڵ گوڵاندا.


* بەو سیفەتەی تۆ وەزیری رۆشنبیریت ئایا بوارەكانی وەزارەتەكەت چی دەگرنەخۆ؟
- بواری رۆشنبیری بوارێكی فراوانەو پێوەندی بە تێكڕای جومگەكانی ژیانەوە هەیە، بەرادەیەك رەنگدانەوەی تێكڕای سیاسەتی حكومەتی هەرێمی كوردستانە لە بواری گەشەپێدانی بەردەوامدا، ئەو گەشەپێدانەی كە لەبوارەكانی ئاوەدانكردنەوەو دۆزینەوەی هەلی كارو بەرەوپێشبردنی خوێندن و تەندروستی و پەرەپێدانی كشتوكاڵ و پیشەسازی پێویستمانە، تێكڕای ئەم بوارانەش كامڵ نابێت ئەگەر كار لەسەر خودی مرۆڤ نەكرێت، كاركردن لەسەر مرۆڤ كارێكی رۆشنبیری بەرفراوانە، بۆیە كاتێك مامەڵە لەگەڵ چەمكی رۆشنبیری دەكەین كە دوو لایەن لەچەمكی رۆشنبیری هەیە، لایەنێكیان پێی دەڵێن كێڵگەكانی رۆشنبیری و بوارەكانی رۆشنبیری ئەوانەی لەو بوارانە كار دەكەن كە خۆیان جۆرە تایبەتمەندییەكیان هەیە، واتا كەسایەتیەكە رۆژنامەنووسە یا توێژەرە یا لەبواری شانۆ كار دەكات یان شێوەكار یا گۆرانیبێژە چونكە هونەریش بەشێكە لە رۆشنبیری، لایەنێكی تری رۆشنبیری بەرفراوانترە بەوەی ئێمە مامەڵە لەگەڵ رۆشنبیرییەك دەكەین پێی دەوترێت رۆشنبیری كۆمەڵگا، ئەوەی لەگەڵ نەریتە دیموكراتیە مەدەنییە پێشكەوتووەكان دەگونجێت، هەر هەمووی رەنگدانەوەی سیاسەتی ئاوەدانكردنەوەو گەشەپێدانی مرۆیی حكومەتی هەرێمی كوردستانە، چۆن ئەم سیاسەتە لەسەر كۆمەڵگادا رەنگ بداتەوە، هەر بۆیە ئێمە لەگەڵ چەمكی رۆشنبیری بەو مانایە مامەڵە دەكەین لەچوارچێوەی ئەو تەرزە باوەی كە بیركردنەوەو هۆشمەندیی تێدایەو بەشێكیش لەئەركەكان بەرزكردنەوەی ئاستی هۆشمەندی گشتییە، باسكردنی رۆشنبیری راماندەكێشێت بۆ ئەوەی ئەم رۆشنبیرییە چۆن بیر دەكاتەوەو چ سیاسەتێكی هەیە؟ بۆ نموونە كاتێك ئێمە باسی رۆشنبیری دەكەین بیروبۆچوونمان وایە ئەم رۆشنبیرییە راستەوخۆ پێوەندی بە چەمكی ناسنامەی كوردستانییەوە هەیە، هەر بۆیە كاتێك باس لە چالاكیەكانی بواری هونەری یا بایەخدان بەزمان یا بایەخدان بەشانۆ دەكرێت بیر لەوە دەكرێتەوە چۆن لە ناو تێكڕای ئەم چالاكیانەدا رەچاوی ناسنامەی كوردستانیی بكرێت، بەو مانایە نا تەنیا ڕەچاوی ناسنامەی كوردستانی لە سروشتی چالاكیەكان بكەیت بەڵكو لە شێوازی رێكخستنی چالاكییەكانیش بەشێوەیەك كە هاوسەنگیەك هەبێت لەنێوان ناسنامەی لۆكاڵی كە لەناو هەموو كۆمەڵگایەك هەیە لەگەڵ ناسنامە جیهانیەكە، ئیتر مەرج نییە ئەم ناسنامانەش هەموو كاتێك زاڵ بێت بەسەر ناسنامە كوردستانیەكەدا، واتا لێرەدا هاوسەنگی دروست نابێت و كەموكوڕی لێ دەكەوێتەوەو گرفت پەیدا دەبێت، ئالێرەدا لەكاتی كەوتنەوەی گرفتدا ئێمە ناتوانین ئەو بەرنامانەی كە هەمانەو بەرنامەی ئاوەدانكردنەوەی كوردستانە جێبەجێی بكەین، هەر لەبەر ئەمەشە كە تۆ بتەوێت ئەو هاوسەنگیە دروست بكەیت چۆن بایەخ بەتێكڕای ناوچەكانی كوردستان دەدەیت، بۆ ئەوەی خزمەتگوزاری رۆشنبیری پێبگەیەنیت بەجۆرێك هەموو تەركیزەكە لەشوێنێكدا سەنتەر نەبێت، بەڵكو بتوانین لەهەموو شوێنەكاندا چالاكی رۆشنبیری و كەلتووری ئەنجام بدرێت.

*میدیا بەشێوەیەك لە شێوەكان پێوەندی بە وەزارەتی رۆشنبیرییەوە هەیە، ئایا تا چ رادەیەك توانای ئاڕاستەكردنێكی زانستی و پیشەیی راگەیاندنەكانت هەیە؟
- من وەك وەزیری رۆشنبیری و لاوان رەچاوی هەموو لایەك دەكەم، بەجیاوازی پارتە سیاسیەكان و راگەیاندنەكان و ئایدیۆلۆژیاكانیانەوە و هەر هەمووشی بەیەك چاو تەماشا دەكەم، ئەمەش هەر دەبێت وا بێت چونكە ئێمە باس لە كاری پرۆڤیشناڵی دەكەین، بۆیە لەكاری حكومیدا من كابرایەكی حزبی نیم من كابرایەكی حزبیم لەدەرەوەی ئیشوكاری حكومیدا، بەو پێیەی ئیلتزامێكم هەیە بە حزبێكی سیاسیەوەو شانازیشی پێوە دەكەم، بەڵام كاتێك دێمە ناو وەزارەت كۆتایی بەو كارە حزبیەم دێت. لەلایەكی ترەوە ئێمە لە وەزارەتی رۆشنبیری و لاوان مامەڵە لەگەڵ دەزگاكانی راگەیاندن و میدیا دەكەین، بەوەی ئێمە چۆن بتوانین هاوكاریان بین و لایەنێك بین لەو لایەنانەی رێكخستن و تەنیا لایەنێكیش نین، بۆ نموونە سەندیكای رۆژنامەنووسان هەیە هەروەها یاسای كاری رۆژنامەنووسی هەیە. كۆمەڵێك دەزگاو پێكهاتەی تر هەن كە هەر هەموویان پێوەندییان بە راگەیاندنەوە هەیە كە بەشێوەیەكی گشتی راگەیاندنی ئێمە راگەیاندنێكی ناحكومیە و بەتەواوەتی راگەیاندنێكی حكومیمان نییە ئەو راگەیاندنەی كە وەزارەت هەیەتی هەروەكو چۆن لە وەزارەتەكانی تریشدا هەیەو زۆرجار بەڕێوەبەرایەتی راگەیاندن هەیە، هەر بەهەمانشێوەیە بەكەمێك جیاوازی و تایبەتمەندێتییەوە، تایبەتمەندیەكەی راگەیاندنی وەزارەتی رۆشنبیری ئەوەیە كەلتوورو كاری رۆشنبیری و هونەری نزیكە لەكاری راگەیاندنەوە لەم ناوچەیەی رۆژهەڵاتی ناوەڕاست بەگشتی كە زۆرجار كاری وەزارەتی راگەیاندن بووە، خۆشبەختانە وەزارەتەكەمان وەزارەتی ئیعلام نییەو هەر وەزارەتێك راگەیاندنی خۆی هەیەو تایبەتمەندی خۆی هەیە، بەداخەوە زۆربەی جار كە باسی ئیعلامی حكومی دەكەین لەم چەمكەدا تووشی هەڵە دەبین چونكە یەك تەرزو شێوازمان لەبەرچاوە.

* بۆچی كاتێك باس لە وەزارەتی رۆشنبیری و لاوان دەكرێت راستەوخۆ هەست دەكرێت كارو چالاكیەكانتان كەمبوونەتەوە یا زۆر پرۆژەتان هەیە لە جێبەجێكردنیدا دواكەوتوون، ئایا كارو چالاكی و پرۆژەكانی وەزارەت لەسەر چ سیستمێك بەڕێوەدەچێت؟
- لەپرۆژەكانی وەزارەتی رۆشنبیری و لاوان سیستمێكی نامەركەزی پەیڕەو دەكەین، بەوەی هەر بەڕێوەبەرایەتیەكی گشتی كۆمەڵێك دەسەڵاتی ئیداری و بودجەی خۆی هەیە، كە ئەو بودجەیە بە بەراوردكردن لەگەڵ ساڵانی پێشوو كەم نەكراوەتەوەو بەبەرنامە بەشێكی زۆری كارو چالاكیەكانمان ئەنجام داوە، بەڵام جاری وا هەیە دواكەوتنی بودجەو ئەو سیستەمەی كە هەیە یەك لەسەر دوانزدەی سەرف كردن كە ئێستا لە دارایی پەیڕەو دەكرێت، دەبێتە ڕێگر لە ئەنجامدانی ئیشوكارەكانی وەزارەتی رۆشنبیری و لاوان چونكە چاوەڕوانی ئەوەین هەموو چالاكییەك پێویستە رەزامەندی بۆ وەربگیرێت تا وەكو دەگاتە مانگەكانی 7و 8 و چڕبوونەوەی هەموو چالاكیەكان لە 6 مانگی كۆتاییدا، لەگەڵ ئەمەشدا هەرچالاكی كراوەو ئەو بودجەیەی بۆمان دانراوە زیاتر لە 90%ی خەرج كراوەو جیاوازییەكی لەگەڵ ساڵانی پێشوو هەبووە، بەوەی هەموو چالاكیەكانمان لە سەنتەردا چڕ نەكردۆتەوە، بۆ نموونە ساڵی رابردوو دوو ڤیستیڤاڵی شانۆیی و لەگەڵ دیدارێكی شانۆیی و كۆمەڵێك چالاكی جۆراوجۆر كراون تەنانەت لە بواری سینەماش ڤیستیڤاڵمان هەبووە. كەمبوونەوەی هەر چالاكیەك یا ئەنجامنەدانی كاروچالاكی رۆشنبیری و هونەری بۆ ئەوە دەگەڕێتەوە كە بودجەی وەبەرهێنان كەمەو زۆر لە پرۆژەكانی 2011 ی دواخستین.

* لەوەزارەت 8 بڵاوكراوەتان ڕاگیراوە، ئەمە جگە لەبڵاوكراوەكانی زۆر لە سەنتەرە رۆشنبیری و رێكخراوە ناحكومیەكان، هۆكاری راوەستان و دەرنەكردنەوەی ئەو بڵاوكراوانە چی بوون ؟ لەلایەكی ترەوە رەخنەو گلەیی ئەوە هەیە كە سیستەمێك یا بەرنامەیەكی رێكوپێك نییە بۆ پاڵپشتیكردنی راگەیاندنی ناحكومی؟
- راوەستانی بڵاوكراوەكانی وەزارەتی رۆشنبیری و لاوان بۆ خراپ تەفسیركردنی بڕیارەكەی ئەنجومەنی وەزیران گەڕایەوە، كە بەشێوەیەكی گشتی هاوكاری دارایی حكومی بۆ رۆژنامەو گۆڤارەكان راگیرا، لەو بڕیارەدا بڵاوكراوەكانی وەزارەتیشی گرتەوە، داواشمان كردبوو كە بڵاوكراوەكانی ئێمە ئەو بڕیارە نەیگرێتەوە، بەڵام ئەنجومەنی وەزیران بڕیارەكەی وابوو كە ئەم بڵاوكراوانەی وەزارەتیش هاوكاری داراییان نەدرێتێ.
من بۆ پاڵپشتیكردنی راگەیاندنی ناحكومی پرۆژەیەكم پێشكەش كرد، بەداخەوە ئەو پرۆژەیە لەئەنجومەنی وەزیران پەسەند نەكراو دواخراو دواتر گەڕاندیانەوە بەو پێیەی پێویستی بە توێژینەوەی زیاتر هەیە، من ئێستاش بەردەوامم لە داواكردنم بۆ ئەوەی ئەو رۆژنامەو گۆڤارانەی كە هەبوو چاپ بكرێنەوە.

* بڕیار وابوو سەتەلایتی نەورۆز ببێتە مینبەرێكی پەروەردەیی، كەچی ڕاستەوخۆ سەتەلایتەكە راوەستا، ئەمە بۆچی بەو ئاڕاستەیەدا برا؟
- لەسەرەتای ساڵی 2010 لە ئەنجومەنی وەزیران بڕیارێك دەركرا بەوەی سەتەلایتی نەورۆز ببێتە سەتەلایتێكی پەروەردەیی، دواتر مەسەلەكە خرایە بەرباس و لێكۆڵینەوە، هەر لەئەنجومەنی وەزیران لیژنەیەك پێكهێنرا بۆ تاوتوێكردنی ئەم مەسەلەیە، ئەو كاتەو ئێستاشی لەگەڵدا بێت من لەگەڵ ئەوەم سەتەلایتی نەورۆز بكرێتە سەتەلایتێكی گشتی كە لەهەموو وڵاتێكدا ئەمجۆرە سەتەلایتە هەیە، دواتر پێویستمان بەوە هەیە لەناو ئەم سەتەلایتە گشتیەدا كۆمەڵێك كەناڵی تایبەتمەندمان لە بوارەكانی پەروەردەیی و وەرزش و رۆشنبیری و هونەری و منداڵان هەبێت، هەرێمی كوردستان زۆر پێویستی بەتۆڕێكی ئەو كەناڵە تایبەتمەندانە هەیە، رۆڵی حكومەتیش تەنیا پاڵپشتیكردن بێت و سەنتەرو رێكخراو كەسانی سەربەخۆ بیبەن بەڕێوە، هەروەكو چۆن كەناڵی 1ی ئەڵمانیا یا 5ی فەرەنساو كەناڵەكانی 1و 2ی وڵاتانی ئەسكەندەناڤیا هەیە، دەكرێت لە دوا رۆژیشدا كار بۆ ئەمە بكەین چونكە زۆرینەی دەزگاكانی راگەیاندنمان ناحكومین بەڵام دەزگای راگەیاندنی حزبین، ئێمە پێویستمان بەچەند دەزگایەكی راگەیاندن هەیە حكومی نەبێت بەڵام حزبیش نەبێت و كەناڵی خەڵكی بێت، ئەمجۆرە كەناڵانەش متمانەیان دەبێت و خزمەت پێشكەش دەكەن بەجۆرێك خزمەتەكە مۆركێكی كوردستانی بۆ خەڵك هەبێت.

* بەمەبەستی كۆنترۆڵكردنی گەندەڵی و كەمكردنەوەی، ژمارەی ڤیستڤاڵەكان زۆر كەمبوونەوە، ئایا ئەمە چارەسەر بوو؟
- یەكەمین تەحەددا كە رووبەڕوومان بۆوە ئەوەبوو چۆن مامەڵە لەگەڵ خەرجی گشتی بكەین كە موڵكی تاكەكەس نییە بەڵكو خەرجی گشتی بۆ پێشكەشكردنی خزمەتگوزاری گشتییە لەشوێنی تایبەتی خۆی، هەربۆیە مەسەلەكە پێوەندی بەوەوە نییە ئەو خەرجیە گشتییە چەندە كە لە چالاكیەكی دیاریكراو خەرج دەكرێت، بەڵكو گرنگ ئەوەیە بەتەواوەتی خەرج بكرێت بۆ ئەو چالاكیەو خزمەتی بكات لە چوارچێوەی شەفافیەت و حوكمڕانی باش، چالاكیەكانی وەزارەتی رۆشنبیری و ڤیستیڤاڵەكانیش لەناویاندا لەو روانگەیەوە پێداچوونەوەمان بۆ كردون، ئەمەش مانای ئەوە نییە چالاكیەكانمان كەمی كردۆتەوە، بەڵكو خەرجی زیادەمان گرتۆتەوەو بۆ چالاكی ترمان خەرج كردووە، ئەمە لەسەر حسابی راگرتنی چالاكی نەبووە، بەڵكو لەسەر حسابی وردبینی بووە لەخەرج كردن .

* بۆچی هەست دەكرێت لەبواری لاوان هیچ نەكراوە؟پێت وا نییە ئەم توێژە زۆر چالاك و بەتوانان، پێویستە پشكێكی زیاتریان بەربكەوێت؟
- كاتێك باس لە چالاكیەكانی لاوان دەكرێت دەبێت ئەو ڕاستیە بزانین كە چالاكیەكانی لاوان جۆراوجۆرن و بەسەر وەرزش و هونەری و رۆشنبیری و میوزیك و شانۆیی و بوارەكانی تردا دابەش بوون، واتا ناتوانین بڵێین ئەمەچالاكی لاوانە و ئەوە چالاكی لاوان نییە، گەربێتوو تەنیا باسی چالاكیە وەرزشییەكان بكەین كە زۆرینەیان چالاكی لاوانە ئەوە من پێم وایە ئەمڕۆ لەكوردستان چالاكی وەرزشی زۆر دەكرێت چ ئەوانەی حكومەت پاڵپشتیان دەكات یا ئەوانەی ناوەندەكانی وەرزش و لاوان پاڵپشتیان دەكات. ئەمە جگە لە سەنتەرە رۆشنبیری و قاوەخانەكان كە زۆربەیان چالاكیەكانی لاوانی تێدا ئەنجام دەدرێت.

* ئەی وەرزش بۆ لەدەرەوەی شار وا فەرامۆشكراوە بەتایبەتی لە قەزاو ناحیەكان؟
- لە 2010 ەوە پرۆژەكانمان بەشێوەیەك دابەش كرد كەتەنیا ناو سەنتەری شارەكان نەگرێتەوە، بۆ نموونە نزیكەی 10 گۆڕەپانی 11 یاریزانیمان لەدەرەوەی شارە گەورەكان، لەكفریەوە تا زاخۆ دروستكرد، لە 2011 دا هەندێك پرۆژەی هاوشێوەی ترمان دروستكرد، لەبوارەكانی تریش دا زۆر تەئكیدمان لە دەرەوەی شارەكان كردۆتەوە، تەنانەت لەناوچەكانی ناسراو بە140 یش وەكو شنگارو مەخمورو قەرەهەنجیر پرۆژەو چالاكیمان هەبووە، لەبەرنامەشماندایە ئاستی پێشكەشكردنی پاڵپشتی و هاوكاری بۆ چالاكی و پرۆژەی رۆشنبیری و لاوان لە قەزاو ناحیەكان فراوانتر بكەین.

* چی كراوە بۆ ئەوەی بینایەكانی سەر بەوەزارەتی رۆشنبیری كە داگیركراون و دەستی بەسەردا گیراوە بگەڕێنرێتەوە بۆ وەزارەت ؟ هاوكات كێشەی بینایەی وەزارەتی رۆشنبیری و لاوان بەكوێ گەیشت؟
- هەرچی ئەو بیناو موڵكانەی سەر بەوەزارەتی رۆشنبیری و لاوانن و دەستی بەسەرداگیراوە بەنووسراوێكی رەسمی ئاگاداری ئەنجومەنی وەزیرانمان كردووە تاوەكو بگەڕێنرێتەوە. سەبارەت بە بینایەی وەزارەتەكەشمان ئەم بینایە كە ماوەیەكی كەمە دروستكراوەو پارەیەكی زۆری تێچووە گرفتێكی یاسایی هەیەو ئێستا گرفتەكە لە دادگایە..

* سەنتەرەكان هاوكاری ناكرێن و گلەییان هەیەو كەچی پێشیان دەڵێن چالاكیتان نییە وەكو وەزیری رۆشنبیری پێت وانییە ناعەدالەتیەك لە پاڵپشتی و هاوكاری حكومەت بۆ ئەم سەنتەرانە هەیە؟ ئایا بۆ رێكخستنەوەی كاروبارو پاڵپشتیكردنی ئەم سەنتەرانە هیچ كراوە ؟
- بەپێی یاسایەكی تایبەتمەند كە هەمانە سەنتەرە رۆشنبیریەكان دەبن بە سەنتەرو رەزامەندی وەزارەت و وەزارەتی ناوخۆشی دەوێت، ئەم سەنتەرانە جگە لەوەی بەشێكە لەكاری خۆبەخشی هاوكات سەربەخۆیی خۆیان هەیەو بەشێكن لەكۆمەڵگای مەدەنی، ئەم سەنتەرانەش مافی خۆیانە لەچوارچێوەی توانای بودجەی حكومەت داوای پاڵپشتی و هاوكاری بكەن، ئەم رێچكەیەش لەهەموو وڵاتێكدا وایە، بەڵام پاڵپشتیەكەش پێویستە لەسەر بنەمای چالاكیەكان بدرێت، تا ئێستاشی لەگەڵدا بێت ئێمە ئەو پارەیەمان نەبڕیوە كە تەرخان كراوە بۆ ئەو سەنتەرانە، بەڵام لەبەشێك لەسەنتەرەكانی سلێمانی ڕاگیراوە بۆ ئەوەی پێداچوونەوە بكرێتەوە، ئێمە ناكرێت هەرچی چالاكیە پشتگیری و پاڵپشتی یا هاوكاری دارایی بكرێت، بەڵكو دەبێت خۆیان بگەڕێن بۆ سەرچاوەی دارایی، هاوكات ئێمە كۆمەڵێك رێنمایمان بۆ دەركردون بۆ نموونە ئەو سەنتەرانە نەچن گۆڤارو رۆژنامە دەربكەن كە بەراستی بەو توانا دارایی و مەعریفەیەی بەردەستیان ناتوانرێت رۆژنامەو گۆڤارێكی ئاست بەرزدەربكەن، چ لەبواری پرۆفیشناڵێتی و تەكنیكی رۆژنامەگەرێتی و تەنانەت لەبواری زمانەوانیشدا، ئێمە پێویستە بۆ پێشخستنی سەنتەرەكان سوود لەو ئەزموونە دەوڵەمەندەی وڵاتانی پێشكەوتوو وەربگرین كە پارە بۆ كاروباری ئیداری كەمتر خەرج دەكرێت و بۆ چالاكیەكان زیاتر خەرج دەكرێت، تەنانەت لەئەزموونی وڵاتانی ئەسكەندەناڤیاو ئەڵمانیاو هۆڵەنداو فەرەنسا ئەزموونی كاری هاوبەشیان هەیەو پارە بۆ كرێی باڵەخانە خەرج ناكەن جاری وا هەبووە 4 سەنتەر ژوورێكیان بەكارهێناوەو هەر سەنتەرەو دۆڵابی خۆی هەبووە، یان لە باڵەخانەیەكدا بوون و هەر سەنتەرەی ژوورێكی هەبووە، واتا بینایە تەنیا بۆ ڕێكخستنی ئیشە ئیدارییەكانیانە كە زۆر كەم و بچوكراوەیە، بەڵام نەك سەنتەر هەیە بۆتە ئۆفیسێكی گەورە تەنیا بۆ دانیشتنی ئێواران و چاخواردنەوە.

* بۆ دەبێت دراما كوردییەكان لەلایەن حزبەكانەوە ئەنجام بدرێت، بۆچی وەزارەتی رۆشنبیری بودجە بۆ ئەمبوارە تەرخان ناكات؟
- زۆر ئاساییە كۆمپانیای هونەری و كەرتی تایبەت دروست بێت، ئەوان دراما بكەن، لەهەموو وڵاتانی پێشكەوتوو بەو شێوەیەیە، مەگەر لە سیستمە حوكمڕانە رەهاكان دەوڵەت سەرپەرشتی دەركردنی دراما بكات. ئەمەش بەو واتایە نایەت كە ئێمە بەرپرسیار نین بەرامبەر بەدراما، بگرە لەچوارچێوەیەی ئەو بودجەیەی كە هەبووە هاوكاری و پاڵپشتی هەندێك دراماشمان كردووە، لە 2011 ئەو بودجەیەی بۆ پاڵپشتی و هاوكاری دراماو فلیم تەرخانكرابوو، هەموویمان لە پاڵپشتی هەندێك دراما خەرج كرد، بەداخیشەوە بۆ هەندێك دراما بودجەمان نەبوو پاڵپشتی بكەین.
لە 2012 بایەخێكی تایبەتی بەدراما دەدەین و ریزبەندیش بەو درامایانە دەكەین كە پێوەندی كەسایەتی كوردو مێژووی كوردستانەوە هەیە، لەمەشدا دەگەڕێینەوە بۆ دەقی نووسەری گەورە و شاكار. بۆ ئەوەی دراماكانمان لەكاری دووبارەبوونەوە رزگاریان بێت، تەنانەت لە هەندێك لەدراما كوردییەكاندا هەست بە كات و شوێنیش ناكەیت، بۆیە بڕیارمانداوە ئەمساڵ لەدیوانی وەزارەتەوە راستەوخۆ بایەخێكی تر بەدراما بدەین و هیوادارم سەركەوتوو بین لەم هەوڵەماندا .

* هونەرمەندان گلەییان هەیە بەوەی هاوكاری ناكرێن بۆ كلیپەكان و وەزارەتیش نەیتوانیوە ڕێگا لە كۆپیكردنی cd بكرێت؟
- یەكێك لە گرفتەكانی هونەرمەندان كۆپیكردنەوەی cd یە، من پێم وایە ئەمە بەدەركردنی یاساو پاڵپشتیكردن و هەماهەنگی وەزارەت و وەزارەتی ناوخۆو زۆر لایەنی تریشەوە دەكرێت،چونكە ئەمە كێشەیەكی جیهانیەو گرفتێكی ئاسان نییە، ئێستا یاسایەك هەیە لەپەرلەمان دیراسە دەكرێت پێی دەڵێن پاراستنی مافی دەرهێنەر یا بەرهەمهێن، سەبارەت بەهاوكاری هونەریش كە زۆرفراوانەو ئەو بودجەیەی كە هەیە بۆ هاوكاری و پاڵپشتی ئەوان زۆر سنووردارەو ئەو توانایە لە ئارادا نییە، بتوانین پاڵپشتی رەهای هەموو كارە هونەرییەكان و هونەرمەندان بكەین.

* بۆ لە هەرێمی كوردستان كتێبخانەی نیشتمانی نییە؟
- وەزارەتی رۆشنبیری و لاوان پرۆژەیەكی بەدەستەوەیە بۆ دامەزراندنی كتێبخانەیەكی نیشتمانی كە لە یاسای وەزارەت دەستنیشان كراوە، لەم رۆژانەدا بۆ ئەنجومەنی وەزیران ئەو پرۆژەیە بەناوی پرۆژەی یاسای ئەرشیف و كتێبخانەی نیشتمانیە دەنێردرێت، لەوێشەوە بۆ پەرلەمان بەرزدەكرێتەوەو ئەوسا پەرلەمان بڕیاری لەسەر بدات.


فەرمانبەرە مووچەخۆرەكانی بن دیوارو دەوام نەكردنیان
* كاتێك باس لە وەزارەتی رۆشنبیری و لاوان دەكرێت راستەوخۆ باس لە لەشكرێكی بێكاری رووپۆشراو دەكرێت، ئایا دیاردەی بن دیوارو بێكاری رووپۆشراو بۆ وا لە ناو وەزارەتی رۆشنبیری و لاوان بەو شێوە بەربڵاوە بوونی هەیە؟
- بەڵێ دەكرێت لە تێكڕای ئەو كەسانەی كە میلاكی وەزارەتن بەشێوەیەكی لەبارتر سوودیان لێوەربگیرێت، بە جۆرێك سەرلەنوێ دابەش بكرێنەوە، لێرەشدا كۆمەڵێك گرفت دێتە بەردەممان، بۆ نموونە ئێمە كۆمەڵێك ناوەندی وەرزش و لاوانمان هەیە كە پێویستیان بە كارمەند هەیە بەڵام نەریت و سروشتی كۆمەڵگاكەو كەسەكان لە كۆمەڵگای كوردستانیدا وای لێهاتووە كەسێك بگوێزیتەوە وا دەزانێت سزا دراوەو فێری مانەوەیە لەو شوێنەی خۆیدا، ئینجا ئەو كەسە كاری هەبێت یا نەیبێت، ئەمەش هۆكارێكی كەڵەكەبوونی بێكاری رووپۆشراوە، دەبێت ئەوەشمان لەبەرچاو بێت بەگشتی وەزارەت و دامودەزگاكانی حكومەت خاوەنی فەرمانبەرێكی زۆر لەوە زیاترن كە پێویستە، بۆیە پێویستە دابەش بكرێنەوە .
* تەنیا لە ساڵێكدا نزیكەی 500 كتێبتان چاپ كردووە، ئەمە زۆری و بۆری نییە؟
- بایەخی زۆرمان داوە بەكتێب و هیچ شێوازێكی سانسۆرو چاودێریمان لەسەر كتێب نییەو پشتگیری چاپ و بڵاوكردنەوەی دەكەین، بەڵام پێویستیشە لە ڕووی هونەری و زمانەوانییەوە هەڵسەنگاندن هەبێت، خۆشبەختانە بە هەڵسەنگاندنێكی باشەوە زۆرینەی ئەو كتێبانەی لە دەزگاو بەرێوەبەرایەتی و خانەكانی سەر بە وەزارەت بە چاپمان گەیاندون، بەگشتی كتێبی باشن.