-نیوەی خانووەكانمان بێ تاپۆیە
-لە كەرتی تەندروستیدا كەموكورتیمان هەیە
-چەندین گوند لەسنووری ناوچەكە بە تەنیا ڕێگای پیادەیان هەیە
-لە دەڤەرەكە زۆرترین باران دەبارێت و كێشەی ئاوی خواردنەوەشمان هەیە


سەردار شێخ یەحیا بەڕێوەبەری ناحیەی دینارتە بۆ (گوڵان): 550 خانووی زێدەڕۆیی لە ناحیەكەماندا هەیەو بڕیاری پەرلەمانی كوردستانیش بۆ تەملیكردنی زێدەڕۆییەكان لێرە جێبەجێ نەكراوە


دینارتە لە ساڵی 1942 بووە بە ناحیەو پێشتر سەنتەری ناحیەكە لە مێركەپرا بووە، دینارتە دەكەوێتە نێوان هەردوو چیای ئاكرێ و پێرسەوە، لە ساڵی 1953 سەنتەری ناحیەكە بۆ دینارتە گوازراوەتەوە. ژمارەی دانیشتووانی سەنتەری ناحیەو سنوورەكەی 25هەزار كەسەو ڕووبەرەكەی 843 كیلۆمەتر دووجایەو82 گوند لەخۆدەگرێت، ئەم دەڤەرە بەناوچەیەكی كشتوكاڵی و ئاژەڵداری و گەشتیاریی بەناوبانگەو خاوەنی باخ و بێستانی زۆرەو بە سماق و سێوو ترێ و خۆخ و بەروبوومی ئاژەڵی ناسراوە، لەبواری ئاژەڵداریشەوە زیاتر لە 68هەزار سەرمەڕوبزن و گا و چێڵی هەیە، هەروەها 40هەزار پەلەوەری جۆراوجۆرو 1500سندووقی مێش هەنگوینی تێدایە. دینارتە وەكو هەموو شوێنەكانی تری كوردستان كەوتبووە بەر شاڵاوی وێرانكردن و ڕاگواستن، لەدوای ساڵی 1991و دەستبەكاربوونی حكومەتی هەرێمی كوردستانەوە، ساڵانە بەپێی بەرنامەو پلان لەلایەن دەزگا پێوەندارەكانەوە لێرەو لەوێ چەند پرۆژەیەكی خزمەتگوزاری بۆ ئەنجام دراوە، بەڵام بەپێی پێویست نەبوون و لەئاست خواستی دانیشتووانی دینارتەدا نییە، وەكو تیمی گۆڤاری (گوڵان) سەردانی ناوچەكەمان كردوو لەنزیكەوە گوێبیستی داواكاری و گلەیی و گازاندەی هاووڵاتیان بووین، بۆ بەدواداچوونی كەموكوڕی و داواكاری خەڵكەكە، چەند تەوەرەو پرسیارێكی ترمان ئاڕاستەی (سەردار شێخ یەحیا) بەڕێوەبەری ناحیەی دینارتە كرد كە لە دووتوێی ئەم ڕاپۆرتەدا بڵاوی دەكەینەوە .

ناوچەیەكی كشتوكاڵی فەرامۆشكراو
بەڕێوەبەری ناحیەی دینارتە سەبارەت بەگرنگی ناوچەكە بەتایبەتی لەبواری كشتوكاڵیدا وتی: ناوچەكەمان لەڕووی كشتوكاڵی و ئاژەڵداری و باغ و بێستان و پەلەوەرەوە خاوەنی بەرهەمێكی باشە، بەڵام بەپێی پێویست گرنگی بەمبوارانە نەدراوەو كارەكان نەچۆتە چوارچێوەی پڕۆژەی پێشكەوتوو مۆدێرنەوە، ئەمەش بۆ كەموكوڕی هەردوو بواری كەرتی تایبەت و حكومی دەگەڕێتەوە، چونكە تا ئێستا وەزارەتی كشتوكاڵ نەیتوانیوە كۆگایەكی ساردكەرەوە یا كارگەیەكی قوتوبەندیی لەم سنوورەدا جێبەجێ بكات، ئەمە لەكاتێكدا ناوچەكە خاوەنی میوەیەكی زۆرە. لەلایەكی دیكەوە پێویست وابوو وەزارەتی كشتوكاڵ لەم ناوچەیەدا چەند پڕۆژەیەكی ئاودێری بەتایبەتی پرۆژەی دروستكردنی بەنداو جێبەجێ بكات، بەتایبەتی لەبەرئەوەی ئەم ناوچەیە خاوەنی تۆپۆگرافیایەكی تایبەتەو شوێنی زۆر گونجاوی هەیە بۆ دروستكردنی بەنداو، لەوانە لەناوچەی گەلی زەنتە كە دیراسەشی بۆ كراوە.
هەروەها ئێمە وەكو یەكەی ئیداریی دینارتە ئامادەین هاوكاری وەبەرهێنەر بكەین گەر بیانەوێت پڕۆژەی وەبەرهێنان لەم ناوچەیە ئەنجام بدەن، بۆ ئەم مەبەستەش ڕووبەری زەویمان هەیەو دەتوانین بۆ پڕۆژەكانیان تەرخانی بكەین.

هیچ پرۆژەیەكی گەشتوگوزاری ئەنجام نەدراوە
دینارتە جگە لەوەی ناوچەیەكی كشتوكاڵی و ئاژەڵدارییە، بەیەكێك لە هەرە ناوچە جوان و گەشتیارییەكانی كوردستان دادەنرێت، بەڵام تا ئێستا هیچ گرنگییەكی پێ نەدراوە، هەر وەكو بەڕێوەبەری ناحیەی دینارتە وتی: دینارتە ناوچەیەكی گەشتیارییەو خاوەنی چەندین شوێنی گرنگ و تایبەتمەندەو زۆر گونجاوە بۆ ئەنجامدانی پرۆژەی گەشتوگوزاریی بۆ نموونە شوێنەكانی(گربیش و ویسكێ و گری زێوە و كانی تۆزێ و چەندین ناوچەی تر)لەلایەكی ترەوە شوێنەوارو ئەشكەوتی جۆراوجۆریشمان هەیە، لەوانە ئەشكەوتی (چاربۆت و سیوزێ و مزگەوتی میر دابیانیشمان) هەیە كە مێژووەكەی زۆر كۆنەو بەهیچ شێوەیەك لایەنی پپوەنداری شوێنەوار گرنگی پێ نەداوە، لەلایەكی تر خراپی ڕێگاوبان بەتایبەتی ڕێگای سەرەكی كە زۆر خراپەو وایكردووە كەرتی گەشتوگوزار لەم ناوچەیەدا بەرەو پێشەوە نەچێت. هەروەها بەمەبەستی زیاتر بەرەوپێشچوونی كەرتی گەشتوگوزاری دوو پرۆژەی تونێلمان لە هەردوو چیای ئاكرێ و پێرس پێویستە، بەمەش هەم ڕێگاوبانەكان كورت دەبنەوەو هەم ناوچەكەش دەگەشێتەوە.

ماستەرپلانمان نییەو
كێشەی تاپۆكردنی خانووەكانیشمان زۆرە
سەبارەت بەماستەرپلانی دینارتەو بوونی كێشەو گرفتەكانی زەویوزارو سەرپێچیەكان بەڕێوەبەری ناحیەی دینارتە وتی: تا ئێستا لەبەڕێوەچوونی كارو پرۆژەكانماندا تەنیا پشت بە نەخشەی بنەڕەتی دەبەستین، چونكە ماستەرپلانمان نییەو بەو هۆیەشەوە كێشەیەكی زۆرمان بۆ دروست بووە، هەر بۆیە پێویستە بەزووترین كات ماستەرپلانی سنووری شارەوانی ناحیەی دینارتە دروست بكرێت، بەتایبەتی پێشتر دینارتە گوندێك بووەو بۆتە سەنتەری ناحیەكەمان و چەندین زێدەڕۆیی تێدا هەیە، بەرادەیەك تەنیا لەناو سەنتەری ناحیەكەدا 550 خانووی زێدەڕۆیی هەیە، شوێنی ئەو خانووە زێدەڕۆییانەش بۆتە هۆی نەگەیاندنی خزمەتگوزاری پێویست، تەنانەت ئەو خەڵكەی زێدەڕۆیشی كردووە هاوكاری تەواوی لەگەڵ شارەوانی نییە تاوەكو چارەسەری ئەندازیاریی ئەم زێدەڕۆییانە بكەین و پڕۆژەی خزمەتگوزارییان بۆ ئەنجام بدەین. هەر ئەم هۆكارەشە وایكردووە لە پێشینەی خانووبەرە بێبەش بن. خانووەكانی زێدەڕۆیی لە دینارتە ناتوانن سوود لە پێشینەی خانووبەرە وەربگرن، چونكە زەوییەكانیان نەكووژاونەوەو تەملیك نەكراون و هەروەها نەخراونەتە ناو نەخشەی بنەڕەتییەوە. لەگەڵ ئەمەشدا بۆ كەمكردنەوەی كێشەی زێدەڕۆیی و نیشتەجێبوون توانراوە 545 پارچە زەوی نیشتەجێبوون دابەش بكەین و ئێستاكە دینارتە لەڕووی یاساییەوە زەوی و خانووەكانی بەشێكی تاپۆیان هەیەو بەشەكەی تری بێ تاپۆن.
لەبەر كێشەی تاپۆنەكردنی خانووەكان و بوونی ئەو زێدەڕۆییانەش كە لەساڵی 1942 ەوە دروستكراون تا ئێستا بەداخەوە بڕیاری ژمارە 5ی ساڵی 2002 ی پەرلەمانی كوردستان بۆ تەملیكردنی زێدەڕۆییەكان لێرە جێبەجێ نەكراوە. ئەمە لەكاتێكدا لەزۆربەی شوێنەكانی تری هەرێمی كوردستان بڕیارەكە چۆتە بواری جێبەجێكردنەوە.
لەلایەكی ترەوە ئێمە لەسنووری ناحیەكەماندا ژمارەیەك لە گوندەكانمان ئاوەدان نەكراونەتەوە، هۆكارەكانی ئاوەدان نەكردنەوەش زۆرە لەلایەك بۆ سروشتی ناوچەكە دەگەڕێتەوە كە ناوچەیەكی شاخاوی و سەختەو گەیاندنی پرۆژەی خزمەتگوزاری و راكێشانی ڕێگاوبانەكان ئاسان نییە.

گرفتی هاتوچۆو ڕێگاوبانەكانمان هەیە
كاتێك سەردانی دینارتەمان كرد، ڕوودانی چەند كارەساتێكی ئۆتۆمبێلمان بە چاوی خۆمان بینی و خراپی ڕێگاوبانەكان و نەگونجاندنی بووە جێی سەرنجمان؛ لەمبارەیەوە بەڕێوەبەری ناحیەكە وتی: وەكو باسم كرد نەبوونی تونێل و خراپی ڕێگاوبانەكان نەك تەنیا بۆتە جێگای مەترسی بەڵكو زیانی لە كەرتەكانی گەشتوگوزاریی و كشتوكاڵیش داوە، چاككردنی ڕێگای گەلی زەنتە و دروستكردنی تونێل لە چیای ئاكرێ و پێرس كاریگەری باشی لەچارەسەركردنی ئەم كێشەیەدا دەبێت، كە چەندین جار كارەساتی دڵتەزێنی ئۆتۆمبێلی لێكەوتۆتەوە. لەلایەكی تریشەوە ڕێگای نێوان قەزای ئامێدی و ئاكرێ كە ڕێگایەكی سەرەكییەو زۆر ناڕێك و نەگونجاوە، پێویستە ئەم ڕێگایە چاك بكرێتەوە. هەروەها ئێمە گرفتێكی تریشمان لەبواری ڕێگاوبانی گوندەكاندا هەیە كە هەندێك گوندمان هەیە ئاوەدانیشن كەچی تا ئێستا هاتوچۆكردن بە پیادەیەو ڕێگای ئۆتۆمبێلی تێدا نییە، بەشێوەیەكی گشتی بارودۆخی ناوچەكە لەڕووی ڕێگاوبانەوە زۆر خراپ و بێسەروبەرە، تا ئێستا 17 گوند لەسنووری ناوچەكەمان هەر ڕێگاوبانی نییەو هاتوچۆكردن بە پیادەیە هەروەها 38 گوندی تر گەرچی ڕێگایان هەیە بەڵام پێویستی بە چاككردنەوە هەیە. سەبارەت بەسەنتەری ناحیەش كە بەهۆی نەبوونی ماستەرپلانەوە وایكردووە نەتوانین هەندێك شەقام و كۆڵانی گەڕەكەكان قیرتاو یا كۆنكرێت بكەین، بۆ چارەسەركردنی ئەم كێشەیەش بەخۆشحاڵییەوە پارێزگاری دهۆك ئامادەیی دەربڕیوە بۆ ئەنجامدانی چەند پڕۆژەیەك لە ناحیەكەدا كە قیرتاوكردن و كۆنكرێت كردنی چەند شەقام و كۆڵانێكی ناو سەنتەری ناحیەكەمان لەخۆ دەگرێت، لەمەشدا بەڕێوەبەرایەتی گشتی شارەوانیەكانی دهۆك تەنیا ئەو شوێنانە دەخاتە ناو پرۆژەكە كە لەنەخشەی بنەڕەتی دینارتەدان، واتە ئەو شوێنانە ناگرێتەوە كە زێدەڕۆن و لەدەرەوەی پلانن، ئەمەش كێشەیە چونكە خەڵكەكە داوا دەكەن و ئەم زێدەڕۆییە واقیعەو پێویستی بەچارەسەركردن هەیە.لەلایەكی ترەوە پارێزگاری دهۆك بڕیاری داوە بۆ 4 گوند كە ڕێگاوبانی نییە پرۆژەی ڕێگایان بۆ دروست بكرێت كە لەوەرزی زستان و كەوتنەوەی بەفر بەتەواوەتی ڕێگایان لێ دادەخرا.

گرفتی قوتابخانەو مامۆستامان هەیە
بوونی گرفتی پەروەردە بەیەكێك لەو كێشە سەرەكیانەی ناحیەی دینارتە دادەنرێت، لەمبارەیەوە بەڕێوەبەری ناحیەی دینارتە وتی: بەگشتی كەموكوڕیمان لەكەرتی پەروەردە هەیە بەڵام لە دۆڵی نەقەب و ئامادە باس دەكەم كە زیاتر لە 18 گوندەو ژمارەی قوتابیانیان زۆرەو تەنیا 1 قوتابخانەی ئامادەییان هەیە. نەبوونی میلاكات و نەبوونی مامۆستا گرفتی سەرەكی ئێمەیەو پێویستە وەزارەتی پەروەردە مشوری بخوات و بۆمانی چارەسەر بكات، هەروەها لەناو سەنتەری ناحیەو شوێنەكانی تریش نەبوونی مامۆستا بەتایبەتی مامۆستای پسپۆرایەتی وانە زانستییەكان و ئامادەییەكان بەیەكێك لە كێشە سەرەكیەكانمان دادەنرێت.

نەبوونی پزیشك و دەرمان
سەبارەت بەبوونی گرفتی تەندروستی بەڕێوەبەری ناحیەی دینارتە وتی: دینارتە پێویستی بەنەخۆشخانەیەكی پێشكەوتوو هەیە لە تایپی A، چونكە ئێستا بنكەیەكی تەندروستیمان لە ناو سەنتەری ناحیەكە هەیە كە بنكەیەكی كۆن و خراپەو لە ئاست پێداویستی خەڵكەكەدا نییەو تەنیا یەك پزیشكی لێیەو تەنانەت لەبواری دەرمانیش دا كەموكوڕییەكی زۆرمان هەیە، نەبوونی پزیشكی نەخۆشییەكانی ئافرەتان و منداڵبوون كێشەیەكی زۆری بۆ دروستكردووین. یەكێك لەو گرفتانەی كە لەبواری تەندروستی هەمانە ئەوەیە بەپێی سیستەمی وەزارەتی تەندروستی هەرێمی كوردستان هەر بنكەیەكی تەندروستی دكتۆری كەم بێت یا نەیبێت بەشە دەرمانیشی كەم دەبێت، پێویستە وەزارەتی تەندروستی ڕەچاوی ئەوەمان بۆ بكات لەوەرزی زستاندا نەخۆشی لەم ناوچەیە زیاترە، چونكە ناوچەیەكی ساردە.

گوندەكانمان گرفتی ئاوی خواردنەوەیان هەیە
سەبارەت بە پڕۆژەكانی ئاوو كەمی ئاوی خواردنەوە لە هەندێك گوند بەڕێوەبەری ناحیەی دینارتە وتی: ڕاستە دەڤەرەكەمان ناوچەیەكی باراناوییەو لەڕووی ئاوی ژێرزەوی و كانییەوە بەناوبانگەو تەنانەت بەرزترین ڕێژەی بارانبارین لەسنووری پارێزگای دهۆكدا لە دەڤەرەكەمان باریوە، بەڵام گرنگی بە پرۆژەی ئاودێری و دروستكردنی بەنداو نەدراوە، هەربۆیە كێشەی ئاومان هەیەو ئەم كێشەیەش لەدوو تەوەرەدا خۆی دەبینێتەوە، لەهەندێك گوندو شوێندا لێدانی بیری ئاوی خواردنەوە زۆر زەحمەت و قورسە، جاری وا هەیە نازانرێت لەو شوێنەی بیرەكەی لێدەدرێت ئاو هەیە یا ئاو نییە، چونكە هەندێك ناوچەمان هەیە بیریش لێبدەین ناگەینە ئاو، لەم ڕووەوە 10 گوندی سنوورەكەمان كێشەی نەبوونی ئەمباری ئاوی ژێر زەوییان هەیە، گوندەكانی تریش كانییان هەیە، بەڵام ئەوانیش كێشەی تۆڕی ئاوی خواردنەوەیان هەیە، لەم دواییەدا گرفتی كەمئاوی زیاتر دەردەكەوێت، چونكە رێژەی دانیشتووان و ژمارەی خانووەكان زیادی كردووەو گوندەكانمان بەرەو فراوانبوون چووە، لەناو سەنتەری ناحیەكەش ناڵێم 100% كێشەی ئاومان هەیە، بەڵام لەگەڵ ئەوەشدا بەپێی پێویستی و فراوانبوونی ناحیەكە نییەو كەموكوڕی و گرفتی كەمئاوی لەهەندێك گەڕەك هەیە، بەشێوەیەكی گشتی ناتوانین بڵێین حكومەت لەمبوارانەدا هەرهیچی نەكردووە، بەڵام فراوانبوونەكەو زۆربوونی ژمارەی دانیشتووانەكان وا دەخوازێت بودجەیەكی تایبەت بۆ گەیاندنی پرۆژە خزمەتگوزارییە سەرەكیەكان دابین بكرێت بەتایبەتی بۆ پرۆژەكانی ئاوو كارەبا، كە بەپێی پێشینەی خانووبەرە ئەم پرۆژانە فراوانتر بكرێن. ئەمە لەكاتێكدا تەنیا لەسنووری ئێمەو لەو گوندە ئاوەدانكراوانەی هەمانە 13 گوند تۆڕی كارەبای گشتیان نییەو لە ڕێگای موەلیدەوە كارەبایان بۆ دابین دەكرێت، ئێستا پارێزگاری دهۆك بڕیاری داوە پرۆژەی ڕاكێشانی كارەبای نیشتمانی بۆ سەرجەم گوندە ئاوەدانكراوەكان بخرێتە بەرنامەی ساڵی نوێوە. لێرەدا داواكارین پرۆژەی ئاكرێ كە لە زێ وە ئاوی بۆ ڕادەكێشرێت لەوێوە بۆرییەك بۆ ناحیەكەمان ڕابكێشرێت و ئێمە لێی سوودمەند بین، هەربۆیە پێویستە ئەو پرۆژە ستراتیژیەی ئاوی خواردنەوەی ئاكرێ بەزووترین كات بخرێتە بواری جێبەجێكردنەوە، لە راستیشدا ئەو پرۆژەیە زۆر دواكەوتووەو نازانین هۆكارەكەی چییە. لەلایەكی تریشەوە گرفتمان لەبواری ئاوەڕۆ هەیە بۆ نموونە ئاوەڕۆی ناحیەكە دەچێتەوە ناو دۆڵی زەنتە، بگرە زیان بەپیسبوونی ئاوەكە دەگەیەنێت، گەرچی ئاوی ئەو زێ یە زیاتر بۆ ئاودانی كشتوكاڵی بەكاردەهێنرێت، بەڵام بۆ ئەم مەبەستەش لەرووی تەندروستیەوە كارێكی نەگونجاوەو پێویست بەوە دەكات لەداهاتوویەكی نزیكدا چارەسەری بۆ بدۆزرێتەوەو پرۆژەیەكی پاڵاوتنی ئاوی قورس لەم ناوچەیە دابنرێت یا لەم قۆناغەدا رێڕەوی ئاوەڕۆكە لە دۆڵەكە دوور بخرێتەوە.

بلدۆزەرو شۆفڵ و قەلاپمان پێویستە
سەبارەت بە نەبوونی ئامێرو بینایەی فەرمانگەكان و چارەسەركردنی كێشەی زبڵ و خاشاك كەموكوڕی لەمبوارانەدا بەڕێوەبەری ناحیەی دینارتە وتی: كەموكوڕی لەبواری ئامێرو ئۆتۆمبێلی خزمەتگوزاری و نەبوونی بینایە زۆرە، لەڕووی رێگاوبانەوە ئالیاتی پێویستمان نییەو فەرمانگەی كارەبا و سیانەی ڕێگاوبان بێ ئامێرن، راستە لە وەرزی زستان رۆژانە تیمێكی ئامێرەكان بۆ پاككردنەوەی ڕێگاوبانەكان لەبەفر كار دەكەن، بەڵام لە وەرزی بارانبارینی بەخوڕ گوندەكان ڕێگایان لێدەگیرێت، هەربۆیە لەم بورادا بلدۆزەرو شۆفڵ و قەلاپمان پێویستە زبڵ و خاشاكیش لە ڕێگای كۆمپانیایەكەوە بۆ شوێنێكی دوور دەگوازینەوەو لەبەرنامەدایە كارگەیەكی ریسایكلین دابنرێت، بەدروستكردنی ئەو كارگەیەش گرفتی فڕێدانی زبڵ و خاشاك بەتەواوەتی چارەسەر دەبێت. لەڕووی بینایەوە كێشەی زۆرمان هەیە، لەناو یەك بینایەدا چەندین فەرمانگەو هۆبەو بەڕێوەبەرایەتی هەیە، هاوكات بنكەی ئاو كە زۆر پێویستە لە ناحیەكەمان نییە، ئێستا فەرمانی دامەزرانی بنكەی پۆلیسی هاتوچۆمان هەیە لەبەر نەبوونی بینایە جێبەجێ نەكراوە.

وەزارەتی رۆشنبیری و لاوان كەمتەرخەمە
سەبارەت بە بواری وەرزش و لاوان و كەموكوڕی و داواكارییەكان لەم بوارانەدا بەڕێوەبەری ناحیەی دینارتە وتی: لە بواری وەرزشی و لاوان سەنتەری ناحیەو سنوورەكە كەموكوڕیەكی زۆری هەیەو بێبەشین لە پڕۆژەكانی وەزارەتی ڕۆشنبیری و لاوانی حكومەتی هەرێم و ئەو وەزارەتە بەرانبەر بە گەنجەكان و وەرزشوانانی ناوچەكە كەمتەرخەمە، چونكە ژمارەیەكی زۆر وەرزشوان لەسنوورەكەمان هەیەو ئاستی وەرزش لە دینارتە زۆر لە قەزای ئاكرێش باشترەو لە كابینەی شەشەمدا وەزارەت تاكە یەك پڕۆژەو یاریگای بچووكیشی بۆ سنوورەكە دروست نەكردووە، هەروەها چالاكییەكانی هونەری و ڕۆشنبیری لە ناوچەكەدا زۆر لاوازە، چونكە وەزارەتی پێوەندار لەمبوارانەش گرنگی بەو سنوورو ناحیەیە نەداوە، تەنیا سەنتەری ڕۆشنبیری دینارتە بەكاری خۆیان هەڵدەستن، بەڵام ئەوانیش ئیمكانیاتیان دیاریكراوە.

بڕیارێكی پێویست، بەڵام جێبەجێ نەكرا
لەكۆتاییدا بەڕێوەبەری ناحیەی دینارتە وتی: ناوچەكەمان پێویستی بە پرۆژەی خزمەتگوزاری و ئاوڕلێدانەوە هەیە، بۆ ئەمە مەبەستەش پێویستە دەسەڵاتە كارگێڕی و داراییەكان دابەزێنرێتە خوارەوەو بەخێرایی داواكاری و پێداویستی خەڵكی جێبەجێ بكەین، لەم ڕووەوە لەسەرەتای ئەمساڵداو لە سەرۆكایەتی ئەنجومەنی وەزیرانەوە بڕیارێك دەرچوو بۆ دابەزینی دەسەڵات بۆ خوارەوە بەتایبەتی بۆ یەكە ئیدارییەكان، بەڵام بڕیارەكە نەچووە بواری جێبەجێكردنەوەو هیچ دەسەڵاتێكمان زیادی نەكرد، لەلایەكی ترەوە دابەزینی دەسەڵات بێ پێدانی دەسەڵاتی دارایی و نەبوونی یەكەی ژمێریاری ئاستەنگ لەبەردەم دەسەڵاتە ئیدارییەكانیش دادەنێت، دابەزینی دەسەڵات ئیداری بڕیارێكی پێویست بوو، بەڵام جێبەجێ نەكرا. هەروەها داواكارم لەحكومەتی هەرێمی كوردستان كە كێشەی تەملیك و كوژاندنەوەی زەوی لە سنوورەكەمان بە تایبەتی ئەوانەی سەنتەری ناحیەو گوندی گربیشمان بۆ چارەسەر بكەن، چونكە ئەو كێشەیە زۆر گەوریەو داواكاری هەموو خەڵكەكەشە. هاوكات پێویستە ئاماژە بەوەش بكەین بەبۆنەی ئەوەی كە فیلمی كیسەڵەكانیش دەفڕن، دەرهێنان و ئامادەكردنی و لۆكێشنەكانی لە ناحیەی دینارتەو سنوورەكەدابوو، ئەوە ڕێزدارنێچرڤان بارزانی بنكەیەكی تەندروستی بەدیاری لە گوندی سەرگەلی دروستكرد، چونكە نمایشی فیلمەكە لەو گوندەبوو، هەروەها پڕۆژەیەكی ئاوەڕۆی بۆ سەنتەری ناحیەكە جێبەجێكرد، ئەم پڕۆژانەش كاریگەری باشیان بۆ ناوچەكە هەبوو، بەڵام لەبواری خزمەتگوزاری ئێستاكەش پێویستمان بە كاروپڕۆژەی زۆر هەیە. داواكارین لە حكومەت و وەزارەت و لایەنە پێوەندارەكان لە ساڵانی داهاتوودا بەرنامەو پلانی باشتر بۆ برەودان بەو ناوچەیە بە تایبەتی لە بواری كشتوكاڵی و گەشتیاری پیادەبكرێت.