دەزگا پێوەندارەكانی حكومەتی عێراقی ناهێڵن
لە سنووری -پردێ- هیچ پرۆژەیەك جێبەجێ بكرێت
عەبدولموتەڵیب نەجمەدین بەڕێوەبەری شارۆچكەی پردێ بۆ( گوڵان):
گەرچی خاوەنی ئامێری سۆنەرو تیشكین، بەڵام ئامێرەكان كاریان پێ ناكرێت و تۆزیان لێنیشتووە


بودجەی راستەوخۆمان لەبەر دەست نییە
سەبارەت بەوەی ناحیەی پردێ فراوانییەكی زۆری بە خۆوە بینیوەو تواناو بودجە زۆری دەوێت بۆ ئەوەی كارو پڕۆژە بەپێی خواست و پێویستی خەڵكەكەی ئەنجام بدرێت، بەڕێوەبەری ناحیەی پردێ وتی: گەرچی لە عێراق پڕوپاگەندەی ئەوە هەیە كە ئەم وڵاتە بەرەو دیموكراتیەت و لامەركەزیەت هەنگاو دەنێت، بەڵام دەسەڵاتی دارایی بە هیچ جۆرێك بە ئێمە نەدراوە، هەر بۆیە وەكو یەكەی ئیدارەی ناحیەی پردێ هیچ جۆرە توانایەكی دارایی و بودجەمان راستەوخۆ لەبەر دەست نییە، تاوەكو بتوانین هەر كارو پڕۆژەیەك پێویست بێت جێبەجێی بكەین، كەواتە دەسەڵاتی ئیداریش بەبێ داریی سوودی نییە و كاری پێ ئەنجام نادرێت، ساڵانە لە كەركوكەوە بەپێی بودجەكەیان ئەولەویەت دەدەن بە پڕۆژەكان و لە ساڵانی ڕابردوو ئەو بودجە و كارو پڕۆژانەی بۆ ناحیەی پردێ دیاری كراوە زۆر كەم بووە، بەڵام ئەم ساڵ بودجەكە گۆڕاوە، چونكە تەنیا بودجەی پەرەپێدانی پارێزگا نەبوو، بەڵكو بودجەی پتڕۆ دۆلاریشی لەگەڵ بوو. دیاریكردنی بودجەكەش لە ساڵانی ڕابردوو بەپێی ژمارەی دانیشتوان بوو، ئێستاكە گۆڕاوەو پارێزگای كەركوك داوا دەكات هەرچی پڕۆژەیەكی پێویستە بۆ ناحیە و سنوورەكە دەستنیشان بكەن و بەنووسراو بەرزی بكەنەوە بەو پێیە بەرنامەو پلان دادەنێن كارو پڕۆژەمان بۆ ئەنجام بدرێت، بەڵام ئەوە ساڵ تەواو بوو ئەو پڕۆژانەی كە پێویستن زۆر كەمیان جێبەجێكراوە، بۆیە چاوەڕوانین لە ساڵی داهاتوو كارمان باشتر بۆ بكرێت. لەبەر ئەوەی بۆ ساڵی 2012 بودجەی كەركوك 525ملیار دینارە.
خاوەنی ماستەرپلان نین
سەبارەت بە ماستەر پلان كە نەخشە رێگایەكی گرنگە بۆ گەورەبوونی هەموو شارو شارۆچكەیەك، بەڕێوەبەری ناحیە پردێ وتی: پردێ نزیكەی 90ساڵە بۆتە ناحیە و حكومەتی عێراقی ئەو هەموو توانایەی هەیە كەچی نەیانویستووە ماستەرپلانێكی ورد و زانستی بۆ بكەن، هەر بۆیە لە ناو سەنتەری ناحیەكەدا و لە زۆربەی گەڕەكەكان ناڕێكی و بێسەروبەرییەكی زۆر دەبینین و لەكاتی ئەنجامدانی پڕۆژەیەك بۆ نموونە كۆنكریت یا قیرتاوكردنی هەندێ كۆڵانی گەڕەكەكان تووشی زەحمەتیەكی زۆر دەبین، بەڵام نەخشەیەكی بنەڕەتی هەیە لەسەری كار دەكەین، گەرچی ئەویش زۆر سەرەتاییە، هەروەها لە ناحیەكەدا بە تایبەتی لە هەموو گوندەكان كێشەی زەوی و زارو تاپۆ و كوژاندنەوەی زەوییمان هەیە، هاوكات لەبەر ئەو كێشانە و دابەش نەكردنی زەوی بەسەر چین و توێژە جیاجیاكان و نەبوونی ماستەرپلان تا ئێستاكە زیاتر لە 1600خانووی زێدەڕۆیی هەیە، دیاردەی زێدەڕۆیش تا چەند مانگێك پێش ئێستا هەر بەردەوام بوو، لەبەر ئەوەی خەڵكی ڕەسەنی شارۆچكەكە دەگەڕێنەوە و پێویستیان بە شوێنی نیشتەجێبوونە و ئێمەش ناتوانین زەویان بۆ دابین بكەین، بۆیە بە ناچاری بەزێدەڕۆیی خانوو بۆ خۆیان دروست دەكەن، بەڵام پێویستە لەسەرەتادا كێشەی تاپۆی زەوی كشتوكاڵی گوندەكان چارەسەر بكرێت و تاپۆی زەوییەكان بخرێنەوە سەر خاوەنە ڕەسەنەكەی كە دانیشتووی گوندەكانن و خاوەنی ئەو زەوییانەن، لەبەر ئەوەی لە كاتی خۆی حكومەتی بەعس تاپۆی زەوی كشتوكاڵی ئەو گوندانەی گۆڕیوە و خستوویەتیە سەر خەڵكی تر و سەر چەند وەزارەتێك. لە پاشان بەپێی پێویست دەست بكرێت بەكوژاندنەوە و جیاكردنەوەی زەوی بە مەبەستی ئەوەی زەوی بەپێی پێویست و بەسەر مامۆستاو فەرمانبەر و توێژە جیاجیاكان دابەشبكرێت، تاوەكو دیاردەی زێدەڕۆیش كۆتایی پێ بێت و شارۆچكەكە بە شێوەیەكی ئەندازەیی فراوان ببێت.
كێشەی خوێندنی كوردیمان هەیە
سەبارەت بە پڕۆسەی خوێندن و خوێندنی كوردی لە سنوورەكەدا بەڕێوەبەری ناحیەی پردێ وتی: لەسەرەتای پڕۆسەی ئازادی؛ سەنتەرو سنووری شارۆچكەكە چەند قوتابخانەیەكی هەبوو كە دەتوانی بە پەنجەی دەست بیژمێری، بەڵام ئێستاكە ژمارەی قوتابخانەكان گەیشتۆتە45 قوتابخانەو دەتوانم بڵێم هەر گوندێك ماڵی لێبێت و ئاوەدان بێت قوتابخانەی بۆ دروستكراوە، بەڵام لە سنوورەكەدا كێشەی خوێندی كوردیمان هەیە، بەتایبەتی لە بارەی میلاكاتەوە لە كاتێك كە مامۆستایەك لەسەر میلاكی كەركوك دادەمەزرێت نابێت بگوازرێتەوە بۆ هەولێر یا سلێمانی، لەبەر ئەوەی دەبێت بزانی ئەمە زیانێكی گەورەیە بۆ پڕۆسەی خوێندنی كوردی، لە یەكەم ڕۆژی دەست پێكردنی دەوامی قوتابخانەكان سەردانی قوتابخانەیەكی خوێندنی كوردیم كرد كە سەیرم كرد و پرسیم لە بارودۆخیان وتیان ئەمساڵ چوار مامۆستامان بۆ شاری هەولێر گوازراینەوە واتە میلاكاتمان چوار مامۆستای كەمە، ئەمەش گوناهە و هۆكارەكەشی دەگەڕێتەوە بۆ وەزارەتی پەروەردەی هەرێمی كوردستان و خودی ئەو قوتابخانەی كە مامۆستاكەی لێ دەگوازرێتە كە دەبێ بەڕێوەبەری قوتابخانەكە رەزامەندی لەسەر گواستنەوەی مامۆستاكە دەرنەبڕێت، چۆن ڕێگا دەدات مامۆستا لەم سنوورە بگوازرێتەوە بۆ ناو هەولێر، هەروەها لە بواری پەروەردە گرفتمان لەكەمی مامۆستای وانە زانستییەكان و قەرەباڵخی قوتابی لە پۆلەكانی خوێندن هەیە. هەر لەبەر كەمی مامۆستای وانە زانستییەكانە ژمارەیەك قوتابی ئامادەییەكان دەچنە قەزای دوبز دەخوێنن، لەمبارەیەوە پێویستە حكومەتی هەرێم هاوكار بێت بۆ چارەسەركردنی گشت كێشە و گرفتەكان و بودجەی تایبەت بۆ ناوچە دابڕێنراوەكان تەرخان بكات و چاوەڕێی جێبەجێكردنی ماددەی 140ی دەستوور نەكات، بەڵكو بەجددی كار لەسەر ئەم ناوچانەش بكەن هەر وەكو هەموو ناوچەكانی تری هەرێمی كوردستان، هەر بۆ نموونە قوتابخانەیەكی 18 پۆلی بۆ سەنتەری ناحیەی پردێ لە ساڵی 2011ەوە دەرچووە و بودجەو زەوی بۆ تەرخانكراوە، بەڵام هیچ بەڵێندەر و كەسێك نییە ئەم پڕۆژەیە وەربگرێت و كاری لەسەر بكات، ئەمەش لە ڕاستیدا كێشەیەكی بەرچاوە، لێرەدا داواكارین لە بەڵێندەرانی كوردستان بێن ئەم قوتابخانەیە وەربگرن، ئێمەش لە هەموو لایەنێكی ئەمنی و ئیداری و مەعنەوی هاوكاری و یارمەتی تەواویان دەكەین.
بنكەیەكی تەندروستی زۆر سەرەتایمان هەیە
سەبارەت بە كەرتی تەندروستی كە بە پێی قسەی خەڵكەكە لەم لایەنەوە كێشە و گرفتێكی زۆر لە ناحیەی پردێ و سنوورەكە هەیە، بەڕێوەبەری ناحیەی پردێ وتی: ناحیەی پردێ بنكەیەكی تەندروستی زۆر سەرەتایی هەیە، لەساڵی 1922 كە بۆتە ناحیە بۆی دروستكراوە، ئەو كات ژمارەی دانیشتوانی دیاریكراو بوو، بەڵام ئەمڕۆ ژمارەی دانیشتوانەكەی چەند بەرامبەر زیادیكردووە، گەرچی هەمان بنكەی تەندروستییە، لەكاتێكدا هەر ئەو بنكەی تەندروستییە دەتوانرێت بكرێتەوە نەخۆشخانەیەكی چەند قەرەوێڵەیی هاوچەرخ و چەندین جار داوامان لە چەندین لایەنی حكومەتی عێراق كردووە كە چارەسەری ئەم بوارەمان بۆ بكەن، لە لایەنی یاسایشەوە دەتوانرێت نەخۆشخانەیەكی چەند قەرەوێڵەیی بۆ پردێ دروست بكەن، چونكە ژمارەی دانیشتوانەكەی ئێستاكە لە 50 هەزار زیاترە. هەروەها كەموكوڕیمان لە كارمەند و پزیشكی پسپۆڕ و ئافرەت هەیە و لە زۆربەی حاڵەتەكانی نەخۆشی، نەخۆشەكان دەنێردرێنە كەركوك یا هەولێر، هەر لەبەر نەبوونی كارمەندی پسپۆڕە ئامێری سۆنەرو تیشك كاریان پێ ناكرێت بە تایبەتی ئامێری سۆنەرەكە تۆزی لێنیشتووە و هەست ناكەیت ئەمە ئامێرێكی پزیشكییە، هاوكات لە هەندێ لە گوندەكانی سنوورەكە یەكەیەكی تەندروستی سەرەتایی هەیە.
دوكەڵ ئاسمانی سەر ناحیەكەی داپۆشیوە
كۆكردنەوەو خۆ رزگاركردن لە زبڵوخاشاك لەم شارۆچكەیە زۆر سەرەتایییە و تەنانەت زۆربەی جار لەنزیك پردێش دەسووتێنرێت، سەبارەت بەم كێشەیە بەڕێوەبەری ناحیەی پردێ وتی: شارەوانی هەڵدەستێت بە پاككردنەوەی بازاڕ و كۆڵان و گەڕەكەكانی سەنتەری شارۆچكەكە، لە پاشان زبڵوخاشاكەكە دەگوازنەوە دەرەوەی سنووری شارەوانی و ژێر خۆڵی دەخەن، بەڵام هەندێ جار زبڵەكە دەسووتێنن و دوكەڵەكەی ئاسمانی سەر ناحیەكە دادەپۆشێ و خەڵك بێزار و هەراسان دەكات، جگە لەمە ئەو حاڵەتانە زۆر مەترسیدارە بۆ پیسبوونی ژینگە و بڵاوبوونەوەی جۆرەها نەخۆشی بەتایبەتی زیانی زۆرە بۆ ئەوانەی نەخۆشی ڕەبۆیان هەیە، واتە سیستەمی كۆكردنەوەو خۆ رزگاركردن لە زبڵوخاشاكەكە تا ئێستا بە شێوەیەكی تەقلیدی و كۆن بەڕێوەدەچێت، هەروەها ژمارەی كرێكارەكان كەمە تەنیا 4تا5 كرێكار بۆ ئەو مەبەستە هەیە و هەندێ كاتیش بۆ باشتر پاككردنەوەی سەنتەری ناحیەكە چەند كرێكارێك بۆ ماوەی چەند مانگێك بە گرێبەست دادەمەزرێن، بەڵام ئەوانیش ڕۆژانەیان تەنیا 9 هەزار دینارە، جگە لەوەی كارەكە قورس و ناخۆشە ئەو پارەیەش كەمە، بۆیە بە پێویستی دەزانم كاری پاككردنەوەو خۆ ڕزگاركردن لە زبڵوخاشاك بدرێت بە كەرتی تایبەت یا كۆمپانیای تایبەتمەند لەم بوارەدا، بەڵام بە مەرجێك ئەو كۆمپانیایەش لەلایەن خەڵكی شارۆچكەكە بەڕێوەببرێت. ئەمە هۆكارێكیش دەبێت بۆ هەلی كار و كەم كردنەوەی گەندەڵی، چونكە فەرمانگە هەیە كارمەندی پاككەرەوە بۆ ماوەی چەند مانگێك بە گرێبەست دادەنێت بۆی هەیە لەو كاتانەدا ناوی وەهمیش تۆمار بكەن و پارەكەی بۆ خۆیان بخۆن. بەڵام كە كۆمپانیا لەم كارانە ئیش بكات ئەو حاڵەتانە ڕوونادات.
گەڕەكە تازەكان كە زۆربەی دانیشتوانەكەی خانەوادەی ئەنفال و شەهیدانن شارەوانی كاریان بۆ ناكەن
سەبارەت بەهۆكاری فراوان نەكردنی شەقام و بازاڕە كۆنەكەی سەنتەری پردێ و كۆنكریت و قیڕتاو نەكردنی بەشێكی زۆری شەقام و كۆڵانەكان بەڕێوەبەری ناحیەی پردێ وتی: هەر لە كۆنەوە حكومەتی عێراق گرنگی بە پردێ نەداوە و هەوڵیداوە فەرامۆشی بكات، ئەمەش تەنیا لەبەر ئەوەی دانیشتوانەكەی لە هەردوو پێكهاتەی كوردو توركمان پێكهاتوون، بەڵام دوای پڕۆسەی ئازادی عێراق كە هەڵمەتی ئاوەدانكردنەوە دەستی پێكرد، لە ئەنجامدا دەتوانم بڵێم زۆربەی شەقام و كۆڵانەكانی ناو سەنتەری شارۆچكەكەو گەڕەكەكان كۆنكرێت و قیڕتاوكرا، بەڵام تا ئێستاكەش چەند گەڕەكێك بەتایبەتی گەڕەكە تازەكان كۆڵان و شەقامەكانیان قیڕتاو كۆنكرێت نەكراون، بۆ ئەو مەبەستەش ئەمساڵ دوو ملیار و دووسەد ملیۆن دینار تەرخانكراوە. هەروەها ئەو گەڕەكانەی لە دەرەوەی سنووری شارەوانی یا لە دەرەوەی نەخشەی بنەڕەتی دروستكراون كە بەشی زۆری خەڵكەكانیان خەڵكی هەژارو خانەوادەی شەهیدان و ئەنفالكراوانن وەكو گەڕەكی برایەتی و نەورۆز شارەوانی كاریان بۆ ناكات، ئەمەش بەپێی یاساوە هەقی شارەوانییە، لەبەر ئەوەی شارەوانی دەڵێت هەر كارو پڕۆژەیەكمان بۆ دەربچێت ئەگەر لە زمنی سنوورو نەخشەی بنەڕەتی نەبێت ئەوا ناتوانم كاری بۆ بكەم، بۆ ئەو كارانە پێویستە حكومەتی هەرێم سەردانمان بكەن و بەپێی توانایان كارو پڕۆژە لە پردێ ئەنجامبدەن، هەر ئەو خەڵكە ئێستاكە دەڵێن بۆ لە كاتی دەنگدان كاریان بەدەنگەكانمانە، بەڵام بۆ پڕۆژەكان باسی ماستەرپلان دەكەن .
چارەسەری بێكاریمان لەبەردەست نییە
سەبارەت بە بێكاری لە سنوورەكەدا بەڕێوەبەری ناحیەی پردێ وتی: لە ناحیە و سنوورەكەدا ڕێژەی بێكاری زۆرە و ڕۆژ لە دوای ڕۆژیش لە زیادبووندایە، ئەمەش بۆ یەكە ئیدارییەكەمان گرفتێكی گەورەیە و خەم لەوەش دەخۆین كە چارەسەرمان لەبەر دەست نییە، چونكە ئەو بێكارانەی هەیە هەندێكیان دەرچووی زانكو و پەیمانگایە و دانەمەزراون، خەڵكانێ هەیە پیشەوەرن، بەڵام دەست كورت و هەژارن و بێكار ماون و لە حاڵەتی دەروونی و كۆمەڵایەتی ناخۆش دەژین،، بۆیە داوا دەكەم لە حكومەتی هەرێمی كوردستان و وەزارەتی كاروكاروباری كۆمەڵایەتی باهاوكاری یا پێشینەیان بە قەرز پێی بدات و موچەیەك بۆ ئەوكەمئەندام و پەككەوتوانەی كە لەسەر كوردو بارودۆخی كوردستان وایان لێهاتووە ببڕنەوە.
بەرهەمی میوەو سەوزە بەرەو كەمبوونەوە چووە
سەبارەت بەوەی كە ناوچەی پردێ ناوچەیەكی كشتوكاڵییە، چەند ساڵێك پێش ئێستا ژمارەو ڕووبەرێكی زۆر بێستان و شینایی لە سنووری پردێ دەبینرا، بەڵام ئێستا ئەو بێستان و شیناییانە بەو جۆرە نابینرێت، بەڕێوەبەری ناحیەی پردێ وتی: هاوكاری و پشتگیری نەكردنی جوتیاران وایكردووە كە خەڵكەكە لە كاری بێستان و شینایی كردن دوور بكەوێتەوە، لەبەر ئەوەی دەرهێنانی ئاو لە بیری ئیرتیوازی یا بیری تر بە هۆی ماكینەو گاز دەبێت، لەم سنوورە یەك لیتر ئاو دەرهێنان پێویستی بە یەك لیتر گازە، ئەمەش توانایەكی زۆری دەوێت و لە توانای جووتیاران نییە و ئەو بڕە گازەی كە مانگانە لە لایەن حكومەتیشەوە دەدرێت بە جوتیار 15 لیتر گاز بۆ هەر دۆنمێكە، ئەمەش بڕێكی كەمەو ناتوانرێت بیستان و شینایی پێ بكرێت، هەر بۆیە چەند ساڵە بەرهەمی میوەو سەوزە لە سنوورەكە بەرەو كەمبوونەوە چووە، چونكە دەتوانم بڵێم 15 – 20ساڵی ڕابردوو بەرهەمی سەوزەو میوەی ئەو سنوورە بەشی دوو لەسەر سێی شاری هەولێری دەكرد، بۆیە لێرەدا داواكارین كە حكومەتی كوردستان هانی جووتیارانی سنووری ناحیەی پردێ بدات و لە پێشینە و قەرزی كشتوكاڵی سوودمەندیان بكات و هاوكارییان بكات، هەروەها داواكارین لە حكومەتی هەرێمی كوردستان پڕۆژەی ئاودێری بۆ سنوورەكە بكەن .
كار ئاسانی بۆ ئەنجامدانی پرۆژە گەشتیارییەكان ناكرێت
بە بیرمان دێت خەڵك بۆ سەیران و گەشتكردن دەهاتنە پردێ بە تایبەتی لە وەرزی بەهار دا، هەروەها شوێنێك لە سنوورەكەی هەیە بەناوی وەكاشە كە مەزارگەیەكی ئایینیە خەڵك بۆ زیارەتكردن دەهاتن، سەبارەت بە پێشكەوتنی بواری گەشتیاری و سەیران هەست ناكرێت هیچ پڕۆژەیەكی گەشتوگوزاری ئەنجام درابێت، لەمبارەوە بەڕێوەبەری ناحیەی پردێ وتی: پردێ جگە لەوەی ناوچەیەكی گشتوگوزارییە، ناوچەیەكی ستراتیژی ئابووری هەیە، چونكە لە نێوان كەركوك و هەولێرە بە تایبەتی لەو كاتەوە كە هەولێر بۆتە پایتەختی هەرێمی كوردستان، ڕۆژانە بە سەدان كەس لە خواروو ناوەڕاستی عێراقەوە بە ڕێگای پردێ هاتوچۆ بۆ هەولێر دەكەن، بۆیە پێویستە پڕۆژەی ستراتیژی بەتایبەتی گەشتیاری لەسەر ڕێگا سەرەكیەكەی پردێ دروست بكرێت، ئەمە لە لایەك بۆ برەودان بەكەرتی پیشەسازی و گەشتیاری گرنگە، لەلایەكی تر رێگایەكە بۆ دەستكەوتنی هەلی كار لە ناوچەكەدا، بەڵام كێشەكە لەوەدایە كە یەكێك دەیەوێت لەسەر زەوی خۆی و بە پارەی خۆی پڕۆژەیەك دروست بكات، حكومەتی عێراقی مۆڵەتی پێ نادات، لەبەر ئەوەی كێشە لەسەر زەوییەكانی ئەم سنوورە هەیە كە لە كاتی خۆی حكومەتی بەعس كوژاندنەوەی بۆ زەوییەكانی ئەم ناوچەیە كردووە و تاپۆی زەویەكانی گۆڕیوە بۆ سەر وەزارەتی كشتوكاڵ و دارایی و. خەڵكی عەرەبی هاوردەو دەرەوەی ئەم ناوچەیە.
هاوكات لە لایەنی گەشتیارییەوە تا ئێستا هیچ پڕۆژەیەك بۆ ئەم ناوچەیە نەكراوە، لەبەر ئەوەی كاتێك كۆمپانیایەكی دەرەوە یان لە هەرێمی كوردستانەوە دێن و دەیانەوێ كارو پڕۆژەی گەشتوگوزاری ئەنجام بدەن تووشی سەدان كار و مامەڵەی ڕۆتینی دەبن لە ئەنجامدا بێزارو ماندوو دەبن و وازدەهێنن، واتە بە هیچ شێوەیەك ئاسانكاری و هاوكاری كردن لە لایەن دەزگا پێوەندارەكانی حكومەتی عێراقی نییەی بۆئەو كەسانەی كە دەیانەوێت پڕۆژەیەك لەم سنوورە بكەن. هەر بۆ نموونە ماوەی دوو ساڵە كۆمپانیایەكی توركی دەیەوێت لە گوندی چۆمە زەردەڵە ڕووبەرێكی بەرفرەوان بكەنە باخچە و پارك و یاریگایەكی گشتیاری هاوچەرخ و پارێزگاری كەركوك و لایەنی ئەمەریكاشمان لە عێراق ئاگادار كردۆتەوە، بەڵام حكومەتی عێراقی ناهێڵێت ئەم پاركە دروست بكرێت.
پرۆژەیەكی ستراتیژی ئاوی خواردنەوە
لەپردێ كەمترین كێشە لە سەر ئاوی خواردنەوە هەیە، سەرەڕای ئەمەش لە هەندێ كۆڵان و گەڕەك هەندێكجار كێشەی ئاوی خواردنەوە دێتە پێش، هەروەها لە هەندێ گوندی سنوورەكە كێشەی ئاوی خواردنەوە هەیە بەتایبەتی لە تۆڕی دابەشكردنی ئاوەكە. بەڕێوەبەری ناحیەی پردێ لەمبارەیەوە وتی: بەرنامەیەكمان هەبوو بۆ چارەسەركردنی یەكجارەكی ئاوی خواردنەوە لە ناحیەی پردێ، ئەم پڕۆژەیە كە بریتییە لەوەی كە ئاو لە پردێوە بۆ كەركوك بگوازرێتەوە و نزیكەی یەك ملیۆن دۆلاری بۆ تەرخانكرابوو و لەم پڕۆژەیەدا دانرابوو كە ڕۆژانە 5 هەزار مەتر سێ جا ئاو بدرێت بە پردێ، ئەگەر بێتوو ئەم پڕۆژەیە جێبەجێ بكرێت چیتر پێویستیمان بە پڕۆژەكانی ناو پردێ نامێنێت.
ئاوی زێیەكە ئاوەڕۆی دەچێتە سەر
سەبارەت بە ئاوەڕۆی شارۆچكەی پردێ و پیسبوونی ئاوی زێ، بەڕێوەبەری ناحیەی پردێ وتی: راستە لە چەندین شوێنەوە ئاوەڕۆی شارۆچكەكە دەچێتەوە سەر زێیەكە، هەر بۆیەش قایمقامی حەویجە ڕۆژێكیان شكایەتی لێم كردبوو دەیگوت ئەو ئاوەی لە حەویجە دەخۆینەوە پیسە لەبەر ئەوەی لە ناحیەی پردێ ئاوەڕۆی قورس دێتەوە سەر زێیەكە، بەڵام ئێستا حكومەتی عێراقی كۆمەڵێك ئەندازیاری تەرخانكردووە كە ماستەرپلانێك بۆ ئاوەڕۆی پردێ دابنین لە پاشان لەسەر دیزاینەكە پڕۆژەی ئاوەڕۆكەی پردێ جێبەجێ دەكرێت.
هیچ كاربەدەستێكی كورد سەردانی پردێی نەكردووە
لە كۆتاییدا بەڕێوەبەری ناحیەی پردێ وتی: ئێمە ناوچەو سنوورێكی دابڕێنراوین لە هەرێمی كوردستان، بەپێی ماددەی 140ی دەستوور مامەڵەمان لەگەڵ دەكرێت، بەڵام ئەوە ماوەی دیاریكراو بۆ جێبەجێكردنی ئەو ماددەیە تەواو بوو، هیچ بەرەو پێشچوونێك بەدی ناكەین و بەرپرسانی ئەو ماددەیە بەگشتی كەمتەرخەمن، بەڵام ئێمە لەمبارەوە گلەیی لە بەرپرسانی خۆمان دەكەین، كە تا ئێستاكە بۆ دڵخۆشكردن ودڵ دانەوەش بێت سەردانێكی ناوچەكەمان ناكەن.