كفری ئەو شارۆچكە دێرینەی كوردستانە كە مێژووەكەی دەگەڕێتەوە بۆ چەند سەدەیەك پێش ئێستا، شوێنەكەی كاروان سەرای نێوان (خانەقین و قەرەداغ و دەربەندیخان و كەركووك و بەغدا و دەوروبەری شارباژێر و سلێمانی) بووە، بەڵگەش بۆ ئەمە بوونی خانەكان و قەیسەریی و چەند شوێنەوارێكی ترە. كفری لە ساڵی 1921 بۆتە قەزاو ناحیەكانی ( قەرەتەپە- جەبارە- نەوجول - ئاوەسپی - سەر قەڵا - بەركۆكس و ژمارەیەك گوند) لەخۆ دەگرێت، ژمارەی دانیشتوانی سەنتەری قەزاكە(27) هەزار كەسەو خەڵكەكە بەكاری كشتوكاڵییەوە خەریكن و ژمارەیەكی زۆریشیان لە دامودەزگاكانی حكومی دامەزراون. لە دوای ساڵی 1991ـەوە كفری لەلایەن حكومەتی هەرێمی كوردستان ساڵانە بە بەرنامە هەندێ كار و پرۆژەی بۆ جێبەجێكراوە، بەڵام بەپێی خواست و پێویستی دانیشتوانەكەی ئاوڕ لەم ناوچەیە نەدراوەتەوە، هەر بۆیە لێرە و لەوێ دانیشتوانی كفری گلەیی و گازندەیان بەرامبەر حكومەتی هەرێمی كوردستان هەیە..
تیمی(گۆڤاری گــــوڵان) قەزای كفری و سنوورەكەی بەسەركردەوەو چەند هاووڵاتیەكی دواند، یەكێك لەم هاووڵاتیانە ئافرەتێكی بە ساڵاچوو بوو گلەییەكی زۆری لەسەر ئاوی خواردنەوە هەبوو وتی: جگە لەوەی رۆژانە بڕی ئاوەكەمان كەمە، تامەكەشی سوێرە و هۆكارێكە بۆ نەخۆشبوونمان، بڕیاریش بوو ئاوی شیرین بۆ سەنتەری قەزاكە رابكێشرێت، بەڵام تا ئێستا ئەم كارە نەكراوە. هەروەها چەند هاووڵاتییەكی تر كە لە بەردەمی دوكانێك دانیشتبوون گلەیی و گازندەیان لە زۆربەی بوارەكانی خزمەتگوزاری ناو كفری هەبوو، بەتایبەتی لە خراپی ڕێگاوبانە سەرەكییەكانی دێت بۆ قەزاكە و قیرتاو و كۆنكرێت نەكردنی بەشی زۆری شەقام و كۆڵانەكانی ناو گەڕەكەكانیان و نەبوونی پزیشكی پسپۆر و ئافرەت و چەندین گرفتی تر ئەم گلەیی و داواكارییانەی هاووڵاتیان و چەند پرسیارێكی ترمان ئاراستەی (شێركۆ حوسێن) قایمقامی قەزای كفری كرد، ئەویش بەراشكاوانە وەڵامی سەرجەم پرسیارەكانی داینەوە، كە لەدووتوێی ئەم راپۆرتەدا پوختەی وەڵامەكانی بڵاو دەكەینەوە.

كێشەی كوژاندنەوەی زەوی هەیە.
ڕێگای( كفری – دوز ) تێكچووەو هیچ پرۆژەیەكیش بۆ چاككردنەوەی نییە.
بەپێی پێویست پزیشكی پسپۆڕ و نەشتەرگەری و ئافرەت لە نەخۆشخانەكان نییە.
فەرمانگەكانی ئاو و ئاسایش و پۆلیس بینایەی تایبەتیان نییە.




شێركۆ حوسێن قایمقامی قەزای كفری بۆ (گـــــــوڵان):
قەیسەری كفری لە بیركراوە و وەكو بەشێكی گرنگی شوێنەواری وڵاتەكەمان كاری لەسەر ناكرێت


لەبودجەدا ڕەچاوی داڕمانی ژێرخانی پرۆژەكان نەكراوە
سەبارەت بە بڕی بوودجەی تەرخانكراو بۆ سەنتەری قەزای كفری و سنوورەكە و چۆنیەتی تەرخانكردنی ئەم بوودجەیە قایمقامی قەزای كفری وتی: بوودجە بۆ هەموو شار و شارۆچكە و سنورێك بەپێی ژمارەی دانیشتوان تەرخان دەكرێت، بەبێ ئەوەی ڕەچاوی كاولكاری و كەمی خزمەتگوزاری و داڕمانی ژێرخانی پرۆژەكان بكرێت، بوودجە بە سێ جۆر بۆ كار و پرۆژەكانی قەزای كفری خەرج دەكرێت:(یەكەم لە بوودجەی پەرەپێدانی پارێزگا-دووەم لە ڕێگای پترۆ دۆلار- سێیەم لە رێگای بوودجەی وەزارەتەكانەوە)، هەروەها لیژنەی باڵای بووژاندنەوەی گەرمیان لە ساڵانی ڕابردوو هەندێ پرۆژەی گرنگ و پێویستیان بۆ قەزای كفری جێبەجێكردووە، لەمانە باخچەی ساوایان و قوتابخانەی 18 پۆلی و چەندین پرۆژەی تر، سەرەڕای ئەوەش كەموكوڕی هەر هەیە، بۆیە كە خەڵك گلەیی لە كەمی و خراپی خزمەتگوزارییەكان دەكەن مافی خۆیانە، بەڵام پێویستە ئەوەش بزانن ئەوەی لە ماوەی(70) ساڵ حكومەتی عێراقی و حزبی بەعس بۆ قەزا و سنوورەكەی نەكردووە، ناتوانرێ و ئیمكانیات بەمجۆرە نییە كە لە ماوەی چوار تا پێنچ ساڵ ئەم هەموو كار و پرۆژەیە جێبەجێ بكرێت، سەرەڕای ئەمەش هەر دەبێت بەپێی بارودۆخی هەرێمی كوردستان و بوودجەكە واقیعانە تەماشای كار و ئیشەكان بكرێت،لەلایەكی تر سیستەمی حكومەتی هەرێمی كوردستان لە ڕووی دابینكردن و پێدانی بوودجە بە شێوەیەكە، پێویستە چاوپێخشاندنەوەیەك بەسەرجەم سیستەمەكەدا بكرێت و لەتەرخانكردنی بوودجەدا جگە لە ژمارەی دانیشتووان ڕەچاوی كەمی خزمەتگوزاری و داڕمانی ژێرخانی خزمەتگوزاری و ئابووری بكرێت، هەروەها بۆ قەزای كفری و سنوورەكەی پێویستە ڕەچاوی ئەوە بكرێت كە لە ساڵی 1991 تا 2003 زۆر كەم پرۆژەی بۆ كراوە، لەبەر ئەوەی ناوچە و سنوورەكە هێڵی تەماسی نێوان حكومەتی بەعس و هەرێمی كوردستان بووە.
دابەزاندنی دەسەڵاتی ئیداری بەبێ دەسەڵاتی دارایی و بوودجە سوودی نییە
سەبارەت بەوەی دەسەڵاتی ئیداری بۆ یەكەی ئیدارەی قەزاكە دابەزیوە و تا چەند كار بەم دەسەڵاتانە دەكرێت و چەند كاریگەری لەسەر كار و پرۆژەكانیان هەیە قایمقامی قەزای كفری گوتی: كۆمەڵێك دەسەڵات لەگەڵ دەرچوونی بڕیارەكە بۆمان دابەزیووە و دەتوانین كاری پێ بكەین، بۆ نموونە یەكێك لەم دەسەڵاتانە ئەوەیە كە دەتوانین لە ناو كۆگادا بە بڕی سێ ملیۆن دینار كەلوپەلی لە كاركەوتوو كە ناتوانرێ سوودی لێ وەربگرین لە ناوی ببەین و فڕێی بدەین و دەتوانین فەرمانبەر و كارمەندانمان كە لە پلەی(4و 5 و 6) دان پلەكانیان بەپێی خزمەت و مافەكانیان بەرز بكەینەوە، بەڵام تا ئێستا ئەمەمان نەكردووە و دەتوانین بەبێ پرس كردن بە سەرووی خۆمان كارمەندەكانمان بەپێی رێنمای لە(10 -15) رۆژ مۆڵەتیان پێ بدەین، بەڵام دابەزاندنی دەسەڵاتی ئیداری لە هەموو روویەكەوە بە تەواوی بەبێ دەسەڵاتی دارایی و یەكەی ژمێریاری و بوودجە سوودی نییە، لەلایەكی تر لەو بوودجەیەی كە بۆ خەرجی ناو یەكە ئیدارییەكەمان دانراوە دەبێ بەپێی پێویست و ڕێنمایی و وسولات پارەكە خەرج بكرێت، چونكە لەمبارەوەش چاودێری دارایی چاودێری و لێپێچینەوە دەكات و لەم پارەیەدا مانگانە تەنیا دەتوانین بە بڕێكی دیاریكراو لە(100 بۆ 150) هەزار دینار بەدەین بە دوو كەس واتە دەتوانین لە مانگێكدا تەنیا دوو كەسی بەسەر بكەینەوە و هاوكارییان بكەین.
زەوییەكانی كفری كوژاندنەوەیان بۆ نەكراوە
سەبارەت بە ماستەرپلانی كفری و كێشەی كوژاندنەوەی زەوی قایمقامی قەزای كفری وتی: قەزای كفری ماستەرپلانی نییە، بەڵام لەسەر نەخشەیەكی بنەڕەتی زانستی كار دەكەین، بۆ ماستەرپلانەكەش ماوەیەكە كۆمپانیایەكی لوبنانی خەریكی داتا كۆكردنەوەیە، كۆبوونەوەیەكیشمان لەگەڵ كۆمپانیاكە ئەنجامدا و ئێستاكە خەریكی وێنەگرتن و سەرژمێری و ئامارن لە ناو سەنتەری قەزاكە، پاش تەواوبوونی ئەم كارانە دەست دەكەن بە دروستكردنی ماستەرپلانەكە، چونكە ئێستاكە كێشەی زەوی و زار بەتایبەتی كوژاندنەوەی زەویمان هەیە كە كێشەیەكی ئاڵۆز و زەحمەتە، هەر بۆ نموونە چەندین خانو و بینایە هەیە زۆر كۆنن، بەڵام ئەو زەویانەی لەسەری دروستكراون تا ئێستاكە كوژاندنەوەی بۆ نەكراوەو بەناوی خەڵكی ترەوەن، هەروەها پاركێكی بەرفراوانی 37 دۆنمی لەناو سەنتەری كفری هەیە كە چوار پارچە زەوی یە، یەك لەسەر چواری ئەم ڕووبەرە زەوی یە بەناوی ئاغاكانە هەر بۆیە كەس ناتوانێ شارێكی یاری لە ناو ئەم پاركە دروست بكات، لەبەر ئەوەی كە سەردانی شارەوانییەكانی سلێمانی دەكەن دەبینی ئەم زەوییە بەناوی ئاغاكانە و كێشەی لەسەرە و تا ئێستاكەش چارەسەری بۆ نەكراوە، هاوكات كە دەتەوێت پارچە زەوییەك بۆ پرۆژەیەكی خزمەتگوزاری بۆ نموونە بۆ یاریگایەك دەستنیشان بكەیت، ئەوە تووشی زەحمەتی و كێشە دەبیت، چونكە زەوییەكانی قەزای كفری بەتایبەتی سەنتەری قەزاكە تا ئێستاكە كوژاندنەوەیان بۆ نەكراوە، گەرچی ماوەیەكە كێشەیی ئەم زەویانە لە دادگایە لە ژێر پرۆسەی چارەسەركردنە، بەڵام ئەم كارەش ماوەو ئیجرائاتی درێژخایەنی دەوێت.
قەیسەری كفری تا ئێستا نۆژەن نەكراوەتەوە
سەبارەت بە شوێنەوار بەتایبەتی قەیسەری ناو سەنتەری كفری كە تا ئێستا لەسەر شێوە و دیزاینی خۆی نۆژەن نەكراوەتەوە و لە داڕمان نەپارێزراوە قایمقامی قەزای كفری وتی: شوێنەوار لە ڕووی مێژووی و رەسەنایەتی بۆ هەموو نەتەوە و وڵاتێك گرنگی تایبەتی خۆی هەیە و كوردیش وەكو هەموو میللەتێك شوێنەواری زۆرە كە هەر یەكەیان بۆ سەردەم و مێژوو و قۆناغێك دەگەڕێتەوە، یەكێك لەم شوێنەوارانە كە لە شارۆچكەی كفری هەیە و پێی دەناسرێتەوە قەیسەریەكەیەتی،ئەم قەیسەریە بۆمان دەسەلمێنێت كە كورد خاوەنی دیزاین و كاری بیناسازی تایبەتی خۆیەتی لە هەموو كات و قۆناغێكدا، هاوكات نیشانمان دەدات كە لەم قۆناغ و سەردەمانەدا لە كفری و سنوورەكەی جووڵە و كاری بازرگانی بەهێز هەبووە هەموو میللەتانی دنیا و كوردیش بەهەمان شێوە هەوڵیداوە شوێنەوارەكانی بپارێزێ، بەڵام لەبەر ئەوەی بە درێژایی مێژوو خاكی كوردستان لە ژێر دەستی دوژمنان بووە و لەلایەن حكومەتە یەك لە دوای یەكەكان بەتایبەتی لەلایەن حكومەتی بەعسی نەتوانراوە ئەم شوێنەوارانە بپارێزرێت و زۆر جار لەناوچوون. لە دوای ساڵی 1991یش تا ئێستاش لەبەر بارودۆخی ناوچەكە و زۆر بواری تر نەتوانراوە كار بۆ نۆژەنكردنەوە و پاراستنی قەیسەرییەكەی كفری بكرێت ئەم قەیسەریەش زۆر كۆنە و لە كاتی باران بارین سەری قورس دەبێت و دادەڕمێت و ئێستاكە لە چەندین شوێن داڕماوە، وەزارەتی شارەوانی و گەشتوگوزاریش تا ئێستاكە هیچ كاری بۆ نەكردووە و هەوڵیشی بۆ نەداوە بخرێتە ناو لیستی یونسكۆ بۆ نۆژەنكردنەو چاككردنی و پاراستننی، بەڵام هەندێ خەڵك و كەس لەم قەیسەریە كاردەكەن و بژێوی ژیانیان تێدا دابین دەكەن، هەر بۆیە لەبەر داڕمانی قەیسەریەكە ئەو بەشی كە كاری تێدا دەكەن لەسەر شێوە و دیزاینی خۆی بە ئاگاداری ئێمە و لایەنی پەیوەندار چاكیان كردۆتەو لە داڕمان پاراستوویانە، لێرەدا پێویستە بڵێین ناتوانین و ناكرێت ئەم شوێنەوارە گرنگە بڕووخێنرێت، بەڵام لە هەمان كاتدا ناتوانرێت هەر هەمووشی نۆژەن بكرێتەوە، بەڵكو بە تێڕوانینی من دەكرێت بۆ پاراستنی كەلتور و شوێنەوارەكە و مێژووی شارۆچكە و سنوور و خەڵك و نەتەوەكەمان بەشێك لە قەیسەریەكە نۆژەن بكرێتەوە و پارێزگاریشی لێ بكرێت و بەڕووی گەشتیارانیش بكرێتەوە بۆ ئاشنا بوون بە مێژووی بیناسازی وكار و دیزاینی نەتەوەكەمان، هەروەها دەتوانین بڵێین بۆچی وەزارەتی شارەوانی و گەشتوگوزار قەیسەری كفری لە بیركردووە و بەرنامە و پلانێكی بۆ دانانێت تا لە لەناوچوون بیپارێزیت و وەكو بەشێكی گرنگی شوێنەواری وڵاتەكەمان كاری لەسەر ناكات.
بەشی زۆری ماڵەكان تانكی ئاویان نییە
باس لەوە دەكرێت ئاوی خواردنەوە لە كفری بەپێی پێویست نییە، هاوكات ئاوەكەیان سوێرە و بەكەڵكی خواردنەوە نایەت، بەڵام قایمقامی قەزای كفری راو بۆچوونێكی پێچەوانەی هەبوو لەمبارەیەوە وتی: لە كفری(44) بیری ئاوی خواردنەوە هەیە كە قووڵی هەر یەكەیان لە نێوان (60-80) مەترە، ئەو بیرانە زۆربەیان ڕۆژانە لە كاتژمێر حەوتی بەیانی تا حەوتی ئێوارە ئیش دەكەن، ڕۆژانە هەر كەسێك پێویستی بە 100لیتر ئاو هەیە، بەڵام ئێمە ڕۆژانە زیاتر لە 500لیتر ئاو بۆ هەر یەكێك هەڵدەهێنجین، گرفتەكە لەوەدایە بەشی زۆری ماڵەكان تانكی ئاویان نییە تاوەكو ئاو بۆ خۆیان گلبدەنەوە، ئەمەش هاوكاتە لەگەڵ نەبوونی پێوەر و بەفیڕۆ دانی ئاو، ئەم هۆكارانە وایكردووە ژمارەیەك لە هاووڵاتیان بڵێن كەمئاوین، بۆیە لێرەدا داواكارین خەڵكەكە تانكی ئاو بۆخۆیان دابنێن و ڕۆژانە ئاو گلبدەنەوە و پێویستە زۆر بە پەلە حكومەت و لایەنی بەرپرس پێوەری ئاو لە ماڵەكان دابنێن،سەبارەت بە سوێری ئاوەكە بەڵی ئەمە لە هەندێ لە بیرەكانی ناو كفری هەستی پێ دەكرێت، بەڵام خەڵكەكە لەگەڵ ئەم سوێریە ڕاهاتوون و هەندێ كەسیش ئەوانەی لە توانایان هەیە ئامێرێك هەیە بە 250 دۆلار كڕیویانە و ئاوەكەیان بۆ شیرین دەكات، ئێمەش ئەو ئامێرەمان لە قایمقامیەت داناوە.
لەبارەی ئاوەڕۆشەوە قایمقامی كفری وتی : لە ناو سەنتەری كفری 13 گەڕەك هەیە، تەنیا سێ گەڕەك ماوە ئاوەڕۆیان بۆ دروست بكرێت، لەم سێ گەڕەكەش ئەمساڵ ئاوەڕۆی دوو گەڕەكیان لە بەرنامەدایە، هەروەها هەندی كێشە و گرفتی تر هەیە خەریكی چارەسەركردنیانین، لەمانە لە گەڕەكی ئیمام حەمە باخی ڕەزا بیرێكی ئاوی خواردنەوە هەیە ئاوەڕۆی بە تەنیشتیەوە دەڕوات و گومانی ئەوە هەیە ئاوی خواردنەوەكە تێكەڵی ئاوەڕۆیەكە بووە.
ساڵی 2012 بڕیارە كار لەسەر ڕێگای
كفری-كەلار و كەلار- دەربەندیخان بكرێت
سەبارەت بە ڕێگاوبانی دەرەوە و سەرەكیەكانی دێتە ناو قەزای كفری و كۆنكرێت و قیرتاونەكردنی شەقام و كۆڵانەكانی ناو سەنتەری قەزاكە قایمقامی قەزای كفری وتی: ڕێگای سەرەكی نێوان كفری-كەلار و كەلار- دەربەندیخان قەرەباڵخ و زۆر ناخۆشە، لە ساڵی ڕابردوو داوامانكرد ئەم ڕێگایە چاك بكرێتەوە، تاوەكو خەڵك بتوانی بە دڵنیایی و بەبێ كێشە هاتوچۆی لێ بكەن، بڕیاردراوە و دیزاینەكەشی لە تەواوبوونە كە لە ساڵی 2012لە لایەن وەزارەتی ئاوەدانكردنەوە قۆناخ بە قۆناخ كار لەسەر ئەم ڕێگایە سەرەكییە بكرێ، بەڵام ئەو ڕێگایەی لەكفری بۆ دوز دەچێت تا بازگەكە سەر بەئێمەیە، ئەوەی تر دەكەوێتە سەر سنووری ناوچە دابڕێنراوەكان، ئەو ڕێگایەش خراپ و بێ سەروبەرە و دەبێت حكومەتی ناوەندی كاری بۆ بكات، باوەڕ ناكەم لە لای خۆمانەوە كاروپڕۆژە بۆ ئەم ڕێگایە ئەنجامبدرێت.
هەروەها شەقام و كۆڵانەكانی گەڕەكەكانی ناو سەنتەری قەزاكەش بەشێكی قیرتاو و كۆنكرێت كراوە، شەقام و كۆڵانەكانی ناو چەند گەڕەكێكیش ماوە كۆنكریت و قیڕتاو بكرێن، بۆ ئەو شوێنانەش بەرنامە دانراوە ساڵ لە دوای ساڵ كاریان بۆ ئەنجام دەدرێت.
لە ناو سەنتەری قەزاكەدا تەنیا سێ قوتابخانەی دوو دەوامی هەیە
سەبارەت بە پڕۆسەی پەروەردە و خوێندن و كەمی بینایەی قوتابخانە و قەرەباڵخی ناو پۆلەكانی خوێندن و كەمی میلاكات قایمقامی قەزای كفری وتی: لە بواری پەروەردە كەمترین كێشە و گرفت لە سەنتەری قەزای كفری و ناحیەكان و سنوورەكە هەیە، لە ناو سەنتەری قەزاكەدا تەنیا سێ قوتابخانەی دوو دەوامی هەیە، هەموو قوتابخانەكانی تر یەك دەوامیە و زۆر گونجاوە لەگەڵ ئەو سیستەمە تازەیەی هەرێمی كوردستان،، هەر بۆیەش ئەمساڵ بینایەی قوتابخانە لەلایەن وەزارەتی پەروەردە لە كفری دروست نەكرا، لەبەر ئەوەی پێویستمان بە قوتابخانەی تر نییە و زۆربەی گوندەكانی سنوورەكە ئەوانەی بە تەواوی ئاوەدانن قوتابخانەیان هەیە، سەرەڕای ئەمە من لەگەڵ ئەوەم و سیستەمەكەشی ئەوە دەخوازێت كە هەر پۆلێك لە (24) قوتابی زیاتر نەبێت، چونكە مامۆستا دەتوانێ بە تەواوی وانەكەی خۆی بڵێتەوە، بەڵام ئێستاكە لەلای ئێمە بۆتە ئاسایی كە(40-50) قوتابی لە پۆلێكدا بێت، لەلایەنی میلاكاتیشەوە تەنیا لە چەند وانەیەكی زانستی كێشە و گرفتمان هەیە وانەكانیش وەكو(فیزیا و كیمیا و بیركاری و ئینگلیزی) و لە دامەزراندنی ئەمساڵیش نەمانتوانی ئەم میلاكاتانە چارەسەر بكەین، لەبەر نەبوونی ئەم پسپۆڕیانە.
لەهەندێك حاڵەتدا نەخۆش سەردانی كەلار دەكات
سەبارەت بە بواری تەندروستی و كێشە و گرفتەكانی قایمقامی قەزای كفری گوتی: لە سەنتەری قەزای كفری نەخۆشخانە هەیە و لە ناحیەكان بنكەی تەندروستی هەیە، بەڵام بەپێی پێویست پزیشك لە نەخۆشخانەكە نییە، بەتایبەتی پزیشكی پسپۆڕ و نەشتەرگەری و ئافرەت، تەنیا رۆژانی پێنج شەممە لە نەخۆشخانەكەدا نەشتەرگەری ئەنجام دەدرێت، لە هەندێ حاڵاتی نەخۆشی و پێویست خەڵكەكە سەردانی نەخۆشخانەی كەلار دەكەن.
بەم قەبارەیە پەرتوكخانە پێویست نییە
سەبارەت بە كەموكوڕی هەندێ بینایەی فەرمانگە و پێویست نەبوونی هەندێ بینایەی تر لەم قۆناغەدا قایمقامی قەزای كفری گوتی: ئایا دروستكردنی پەرتوكخانە لەم قۆناغەی ئێستادا بەم قەبارە بەرفراوانە پێویستە و ئەوانەی سوودی لێوەردەگرن ژمارەیان چەندە، بێگومان بەڕاشكاوانە بە دیدی من دەڵێم ئەم پەرتوكخانانە ئێستاكە كە لە قەزا و ناحیەكان دروست دەكرێت پێویست نییە، هەروەها سەنتەری رۆشنبیری منداڵان و پاراستنی منداڵان لە كفری دروستكراوە كە (60) ژوورە و تەنیا سێ تا چوار كارمەندی تێدایە، دەپرسم ئایا داهاتوو و موراجیعەكانیان چەندە، ئەم بینایەو سەنتەرانە بەم رووبەڕووو و قەبارە پێویست نییە، لەكاتێكدا چەند فەرمانگە و بەشی تر لە كفری وەكو فەرمانگەی ئاو و ئاسایشی و پۆلیس.. تاد. بینایەیان نییە.
دامەزراندنی كارگەی ریسایكلین خەونە ئەگەر بێتەدی
سەبارەت بە كۆكردنەوەی و خۆ رزگاركردن لە زبڵوخاشاك قایمقامی قەزای كفری گوتی: هەروەكو هەموو شار و شارۆچكەكانی تری هەرێمی كوردستان لەلایەن شارەوانییەوە لە رێگای تیم و تراكتور و ئامێرەكانیان زبڵوخاشاكەكە بەشێویەكی تەقلید و كۆن لە ناو كۆڵان و گەڕەكەكان كۆ دەكەنەوە و لە پاشان دەیگوازنەوە بۆ دەرەوەی شار، هاوكات بۆ خۆ زرگاركردن لە زبڵوخاشاكەكە هەر لەلایەن شارەوانییەوە چاڵ هەڵدەكوڵن و زبڵوخاشاكەكەی دەخەنە ناوی و بەخۆڵ سەری دادەپۆشن، دامەزراندنی كارگەی ریسایكلینی زۆر پێویست و گرنگە و خەونە ئەگەر بێتەدی.
كارگەی رستن لەكفری
سەبارەت بەو كارگەی رستن كە لە كفری هەیە تاوەكو ئێستا لە كار كەوتووە و بۆچی بەكاری ناخەنەوە قایمقامی قەزای كفری گوتی: ئەو كاتەی كە ئەم كارگەی رستنە لە كفری دانرا لە سنوورەكە مەڕ و ماڵاتێكی زۆر بەخێو دەكرا و ساڵان خوریەكی زۆر دەهێنرا بۆ رستن، ئەو كاتە كەلوپەلی وەكو بەڕە و مافور و بەتانی زۆر بەدەگمەن لە دەرەوە دەهاتە كوردستان، بەڵام ئێستاكە بەهۆی بازاڕی ئازاد و بازرگانی بەتانیەكی توركی بە (15 تا20) هەزار دینار دەكڕیت، بەڵام ئەم پارچە بەتانیە بۆی هەیە لەلای خۆمان ئەگەر دروست بكرێت زیاتر لە (50) هەزار دینار بكەوێت، واتە ئێستاكە ناتونرێ كێبڕكێ لە نرخ و كوالێتی لەگەڵ كەلوپەلی بیانی بكرێت، بۆیە ناتوانرێ ئێستاكە ئەم كارگەیە بكەوێتە ئیش، بەڵام لە كاتێك رێگا لە بەرهەمی بیانی بگیرێت و كوالیتی بەرهەمی خۆماڵیشی بەرز و باشتر بكرێت ئەوە دەتوانرێ كار بەم كارگەیە بكرێت، گەرچی لەمن بپرسی و یەك ملیار دیناریشم بە یانسیب دەستكەوتبێت ئەوە یەك فلس لەم كارگەیە خەرج ناكەم، چونكە ناتوانێ كێبڕكێ لەگەڵ وڵاتانی پێشكەوتوو بكات.
كەرتی گەشتوگوزاری فەرامۆشكراوە
سەبارەت بەوەی كەلە سنووری قەزای كفری ساڵانە بوار لە بارە گەشتیاری بەهاری دروست بكرێت، لەمبارەوە لەلایەن كەرتی تایبەت یا حكومەت چی كراوە قایمقامی قەزای كفری گوتی: لە بواری گەشتیاری سیاسەتی حكومەت ئەوەیە كە كەرتی تایبەت كار و پرۆژەی گەشتیاری ئەنجام بدات، تا ئێستاكە كەرتی تایبەت و دەستەی وەبەرهێنان بۆ كەرتی گەشتیاری هیچ كار و پرۆژەیەكیان نەكردووە.
بەنداوی باوەشاسوار. پرۆژەیەكی گەورە
قەزای كفری و سنوورەكەی دەشتێكی پان و فراوانی كشتوكاڵی و باخ و بێستانی هەیە، بۆ برەودان و هاندانی ئەم كەرتە وەزارەتی كشتوكاڵ چی كردووە قایمقامی قەزای كفری گوتی: جگە لەم بەنداوە و جۆگەلەكانی ئاودێری وەزارەتی كشتوكاڵ و سەرچاوەكانی ئاو هیچ جۆرە كار و پرۆژەی تری لە سنووری قەزای كفری نەكردووە، ئەم بەنداوە نزیكەی(9) ملیار دیناری تێچووە و (6) ملیۆن سێ جار ئاو دەگرێت، ئاوی چەمی كفری و ئاوی باران بارینی زستانان گلدەداتەوە، ئەم جۆرە بەنداوانە بۆ بەخێوكردنی ماسی و گەشتیاری و ئاودێری سوودی هەیە، هەر ئێستاكە ماسیمان لە هەولێر هێناوە و خراوەتە ناو بەنداوەكە و هەروەها دوو بەنداوی تری(تورابی) لە چەمی ئاوەسپی سەری خۆرنەوازان و چەمی لایخان دروست دەكرێت.
سیستەمی ئیداری پێویستی بە گۆڕانكاریە
لە كۆتاییدا قایمقامی قەزای كفری گوتی: كفری لە كەموكوڕی خزمەتگوزاری بەدەرنییە، چارەسەری كێشە و گرفتەكانی كفری بەدەر لە چاككردنی سیتسەمی ئیداری لە هەرێمی كوردستان ناكرێت. هەروەها هەموو بوارە خزمەتگوزاریەكان هەر لە پەروەردە و ڕێگاوبان تا دەگاتە تەندروستی و ئاوی خواردنەوە و ئاوەڕۆ و ....تا، پێویستی بە كار و پرۆژەی زیاتر هەیە.