Qeladizê: Îbrahîm û Yûsiv serê sibeheke zû bi dizî ji malên xwe, bi nexşeyeke cîhanê û 300 dolaran ji mala xwe ya li Qeladizê derdikevin, bi nêta herin Ewrûpa. Lê li bajarokê Behrke yê nêzîkî Hewlêrê ji aliyê polîsan tên desteserkirin.

Îbrahîm Ebûbekir (11) di sinifê 6an ê bingehînî de û Yûsiv Ebûbekir ku temenê wî 9 sal in û di pole 4ê bingehînî de ye, daniştvanên taxa fermanberên bajarokê Qeladizê ne. Bavê wan ku mamoste ye dibêje dû mamê wan li Ewrûpa ne û yek jî niha birê ketiye, loma bi baweriya wî: "Dane pey şopa mamên xwe û ev rê hilbijartine."

Îbrahîm behsa plana çûna xwe bo Ewrûpa kir: "Li malê baweriya wan bi me dihat, qet pere ji me venedişartin, me 300 dolar ligel xwe bir, pêşî me nexşeyeke cîhanê ji sûkê kirîbû, me dixwest li ser nexşê herin û me bi pênûsê cihê xwe li ser nexşê diyar kiribû, lê me qibleya xwe jibîr kir, loma me nema başûr û bakur ji hev nas kir."

Serêm sibeheke zû herdû bira bi dizî ji malê tên derve, wek Îbrahîm got: "Demjimêr 5ê sibehê ji mal derketin, bi otombîlekê çûn Raniya, ji wir jî çûn Hewlêrê, dema gihan Hewlêrê me konek bi 40 hezar dînaran kirî û me çû li Behrke veda, dû re polis me girt." Îbrahîm poşman e ji karê ku kir, lê dibêje: "Ji bo xweşiyê çûm û me dixwest herin Ewrûpa, ji ber ku vir nexweşe."

Yûsiv bi xwedîkirina herdû kevokên xwe re mijûl bû, wî behsa sedemê çûna xwe kir û got: "Mamê me li Brîtanya ye, carna ligel daxifin, her car ji me re dibêje dema hun mezin bûn werin." Xewna Yûsiv a mezin heye: "Dixwazim herim Ewrûpa û li wir bixwînim û bibim serkirdeyek û bêm xizmetê bikim, her dem dixwazim bibim serkirdeyekî wek Talabanî û Barzanî."

Mamoste Ebûbekir (40) her çiqasî pir dilgiran bûye bi wendabûna zarokên xwe û karê ku kirine, lê herdû zarokên xwe wek`bilîmet` wesif dike û dibêje: "Zarokên min pir jêhatî ne û destrengîn in û herdem tevî kursên kompyûter û wênekişandin û fêrbûna ziman dibin, jixwe bawer û behremend in, loma dan ser vê riya ne ji rêzê. Kurê min ê biçûk ji niha ve kêfa wî ji postan, pile û payebilindî ye. Zarokên min lezgîn in, herdem hewl didin fêrî zaniyariyan bibin, berê jî behsa çûna Ewrûpa dikirin, ji wan were nêzîk e û wê zû bigihinê, roja berî çûna wan nexşeyek anîn û gotin bavo Brîtanya û Iraq pir ji hev nêzîk in, lê min mebesta wan fam nekir ka ji ber çi wiha dibên, dema sibehê rabûm limêjê, ew ne li ser cihên xwe bûn." Rûdaw