لە بەشی نۆیەمی (مشن ئەمپۆسبڵ) چیرۆكەكان دەگەڕێنەوە سەرەتا
بەپێی ئەو هەواڵانەی لە میدیا و ڕۆژنامە جیهانییەكان بڵاوبۆوتەوە, لە ئێستادا ئەستێرەی دیاری سینەمای ئەمریكی (تۆم كروز)ی تەمەن 62 ساڵ بە نیازە كەسێك دەستنیشان بكات تاوەكو ڕۆڵی(Ethan Hunt)بەرجەستە بكات,ئەمەش لە كاتێكدایە كە تاوەكو ئێستا تۆم كروز خۆی لە هەموو بەشەكانی زنجیرە فیلمی ئاكشن (مشن ئەمپۆسبڵ) ڕۆڵی ئەو كەسایەتییەی گێڕاوە.
دیاریكردنی ئەم ئەكتەرە بۆ بەشی داهاتووی زنجیرە فیلمەكە دەبێت و ئەو كەسەی كە دیاری دەكرێت تەمەنی گەنجەو ڕۆڵی ئیسان هانت دەگێڕێت و چیرۆكەكان باس لە سەردەمێك دەكەن پێش ئەوەی بێتە نێو كاری سیخوڕی,بەم پێیە بێت چیرۆكی بەشێك لە ڕووداوەكانی بەشی نۆیەمی(mission impossible) دەگەڕێنەوە دواوەو باس لە ژیاننامە و سەرەتای درووستبوونی ئیسان هانت دەكات و چۆنیەتی چوونی بۆ نێو كاری سیخوڕی و پەیوەندی لەگەڵ دەزگا هەواڵگرییەكان كە ئەمەش تاوەكو ئێستا لە هیچ بەشێكی ئەم زنجیرە فیلمەدا باس نەكراوە.
لە ئێستادا بینەران و عاشقانی فیلم و سینەما چاوەڕێی بەشی هەشتەمی زنجیرە فیلمی ئاكشن مشن ئەمپۆسبڵ دەكەن كە ناونیشانی(The Final Reckoning)بۆ دیارە كراوەو بڕیارە لە ئایاری ساڵی 2025 لە هۆڵی سینەماكاندا نمایش بكرێت.
ئەگەرچی بەشی حەوتەمەی ئەم زنجیرە فیلمە بە هۆی مەترسی بڵاوبوونەوەی ڤایرۆسی كۆرونا ماوەیەكی زۆر دواخرا,بەڵام هەر ئەو كات ساڵی 2021 لە ماڵپەڕی (زە سەن)چەند زانیارییەك دەربارەی بەشی هەشتەم بڵاوبووەوە كە تۆم كروز خۆی فێری بەكارهێنانی فڕۆكەیەكی سەربازی دەكات كە جۆرێكە لەو فڕۆكانەی لە جەنگی جیهانی دووەم بەكارهاتووە, ئەم هەنگاوە شتێكی نوێ نییە لە سەركێشییەكانی تۆم كروز و بەردەوامە لە درووستكردنی دیمەنی ڕاستەقینە و مەترسیدار كە هاوكاری نییە و خۆی دیمەنە ئاكشنەكان ئەنجامدەدات.
هەروەها ئەوكات لەو سەرچاوەیە بڵاوكرایەوە كە تۆم كروز مەشق و ڕاهێنان دەكات بۆ ئەوەی خۆی بە فڕۆكەیەكی سەربازی بفڕێت لە جۆری(boeing sterman-75) تاوەكو نمایشی دیمەنەكانی بەشی هەشتەمی مشن ئەمپۆسبڵ تۆمار بكرێت.
گوڵان-ئاسۆ كاكەیی
