ڕێنمایی خۆراكی بۆ بڕی ڕۆژانەی چەوری بە هەموو ژەمەكانەوە بریتییە لە 20-35%ی كالۆری وەرگیراوی ڕۆژانە، بۆنموونە ئەگەر بڕی وزەی لە خۆراك وەرگیراوی ڕۆژانە 2000 كالۆری بێت، ئەو ا پێویستە كە بڕی چەوریی ڕۆژانە 45-78 گرام بێت. لەمە گرنگتر هەڵبژاردنی جۆری چەورییە، بە مانایەكی دی پێویستە كە چەورییە تەندروستەكان واتە چەورییە ناتێرەكان Unsaturated زیاتر بخرێنە خۆراكی ڕۆژانە بەمەبستی ڕێگرتن لە بەرزبوونەوەی ئاستی كۆلیستڕۆڵی خوێن، هەروەها وا باشترە كە ڕێژەی چەورییە تێرەكان Saturated كە بە چەورییە خراپەكان ناسراون لە خۆراكی ڕۆژانەدا لە 10% زیاتر نەبێت، واتە 22 گرام. بۆ ئەو كەسانەی كە ئاستی كۆلیستڕۆڵی خوێنیان بەرزە، پێویستە كە ڕێژەی چەورییە تێرەكان لە خۆراكدا بۆ تەنیا 6% واتە نزیكەی 12 گرام كەم بكرێتەوە. سەرچاوە خۆراكییەكانی چەورییە تێرەكان: گۆشتی سوور، بەرهەمە پڕ چەورییەكانی شیرەمەنی، كەرە، زەیتی گوێزی هیندی، ئایس كریم، كێك و بسكویت و هەویركارییەكانی دیكە. سەرچاوە خۆراكییەكانی چەورییە ناتێرەكان: زەیتوون و زەیتی زەیتوون، ئاڤۆكادۆ و زەیتی ئاڤۆكادۆ، زەیت و كەرەی پاقلەی سودانی، زەیتە ڕووەكییەكانی وەكو زەیتی كانۆلا و گەنمەشامی و گوڵەبەڕۆژە، ماسی بەتایبەتی سالمۆن و ماكرێل Mackerel، تۆو و كاكڵەكانی وەكو گوێز، باوی، كازو، تۆوی كونجی، پاقلەی سودانی. لە لایەكی دی پێویستە هەوڵ بدرێت كە خۆراكی ڕۆژانە هیچ ڕێژەیەك لە چەورییە هایدرۆجینكراوەكان لەخۆ نەگرێت، كە بە چەورییە نێوەندەكان Trans fats ناسراون و لە پیشەسازیی خۆراكدا دروست دەكرێن، كە بە خراپترین جۆری چەورییەكان هەژمار دەكرێن، چونكە هۆكارن بۆ بەرزبوونەوەی ئاستی كۆلیستڕۆڵی خراپ و دابەزاندنی ئاستی كۆلیستڕۆڵی باش لە خوێندا، ئەمەش ئەگەری تووشبوون بە نەخۆشیی دڵ زیاد دەكات.