مانگی سووری ئێران ڕایگەیاند، شەوی ڕابردوو پاسێک کە سەرنشینانی پاکستانی هەڵگرتبوو، کە بە ڕێگاکانی پارێزگای یەزد بەرەو سنووری چەزابە دەڕۆیشت و بەنیازی ئەوە بوو بەرەو کەربەلا بڕوات، لە ڕێگای دێهشیر لە ڕێڕەوی خۆی لایدا و دوای ئەوەی خۆی کێشا بە دیوارێكدا وەرگەڕا.

بەپێی هەواڵی میدیا ئێرانییەکان، لەم ڕووداوەدا ٢١ کەس بریندار بوون، ٧ کەس بۆ نەخۆشخانەی تێفت، ١٤ کەس بۆ نەخۆشخانەی ئەبرکو گوازراونەتەوە، ٢٨ کەسیش لە شوێنی ڕووداوەکە گیانیان لەدەستداوە.

سەید تەیمور حوسێنی، بەرپرسی پۆلیسی هاتووچۆی فەراجا سەبارەت بەم ڕووداوە ڕایگەیاند: بەدواداچوونە سەرەتاییەکانی شارەزایانی پۆلیسی هاتووچۆی راهور دەریدەخەن کە هۆکاری سەرەکی وەرگەڕانی ئەم پاسە كێشەیەکی تەکنیکی بووە لە سیستەمی برێك و لێژیی بەرزی تەوەرەكە بووەتە هۆی ئەوەی شۆفێرەکە کۆنترۆڵی ئۆتۆمبێلەکە لەدەست بدات و ڕووداوەکە ڕوویداوە .

 

 

گوڵان: سەردار خەلیل