نزیكەی 60%ی كێشی لەش لە ئاو پێك هاتووە، ئاو بەشدارە لە زۆربەی فرمانەكانی لەشدا، بۆیە پێویستە كە هەر كەسێك ڕۆژانە بڕێكی باشی ئاو لە كاتی جیاوازدا بخواتەوە. گرنگیی ڕێژەی تەواوی ئاو لە لەشدا: گواستنەوەی ئۆكسجین و ماددەی خۆراكی بۆ خانەكانی لەش، چونكە ئاو ڕێژەی 90%ی خوێن پێك دەهێنێت، ڕاماڵینی بەكتریا لە میزڵدان و ڕێگرتن لە دروستبوونی بەرد لە كۆئەندامی میزەڕۆدا، هاندانی هەرسكردنی خۆراك و ڕێگرتن لە قەبزی، ڕێكخستنی پەستانی خوێن، تەڕكردنی جومگەكان و هەڵمژینی هێدەمە بۆ پاراستنیان لە زەبر و فشار لەوكاتەی كە ئاو ڕێژەی 80%ی كڕكڕاگەكانی جومگە پێك دەهێنێت، پاراستنی شانە و ئەندامە ناسك و هەستیارەكانی وەكو مێشك و پەتكە دەمار، ڕێكخستنی پلەی گەرمیی لەش، پاراستنی تەندروستیی پێست، هاندانی دابەزاندنی كێشی لەش لە ڕێگەی تاودانی كرداری میتابۆلیزم (زیاد سووتاندنی كالۆری) و زیادكردنی هەستی تێربوون و ڕێگرتن لە زیاد خواردن، ئاو هاندەرە بۆ توانەوەی كانزا و ماددە خۆراكییەكان تاكو لەش بە ئاسانی سوودیان لێ وەربگرێت، لە گورچیلەكانیشدا هاندەرە بۆ فڕێدانی پاشەڕۆكان لەوكاتەی كە ئاو گرنگیی زۆری بۆ فرمانی گورچیلەكان هەیە لە پاراستنی هاوسەنگیی ئاستی شلە لە شدا، هەروەها خواردنەوەی بڕی زیاتری ئاو هاندەرە بۆ بەرزكردنەوەی ئاستی ئاگایی Alertness چونكە كەمبوونەوەی ڕێژەی شلەی لەش هۆكارە بۆ هەستكردن بە ناڕەحەتی و ماندووبوون و بۆرژان.