كۆتایی ساڵی 2010 و دەستپێكی ساڵی 2011، ساڵێكی پڕ گۆڕانكاری و ڕووداو بوو، هەم لەسەر ئاستی وڵاتانی عەرەبی و هەمیش لەسەر ئاستی عێراق و هەرێمی كوردستان.

لەسەر ئاستی وڵاتانی عەرەبی، خەڵكی ناڕەزایی لە چەند وڵاتێكی عەرەبی دەستیان بە ڕاپەرین و خۆپیشاندان كرد. سەرەتا خۆپیشاندەران داوای چاكسازی و دابینكردنی مافەكانیان دەكرد، بەڵام دواتر خۆپیشاندان و ڕاپەڕینەكان فراوان بوون، ڕژێمەكانی (تونس، میسر، لیبا) ڕووخێندران، ئەم خۆپیشاندانانە ڕژێمی سووریاشی گرتەوە، بەڵام لەگەڵ ئەوەی بەشێكی هێزەكانی سوپای سووریا كشانەوە بۆ دەوروبەری دیمەشقی پایتەخت و ڕژێمی ئەسەد بەرگری كرد و نەیهێشت ڕژێمەكە بڕووخێت، بەڵام هونەری گەورە بۆ ئەو پشتیوانییە گەورەیەی ئێران و ڕووسیا دەگەڕێتەوە، كە بە هێزێكی گەورە و بە هەموو ئامرازێكەوە پشتگیری ڕژێمی ئەسەدیان كرد و ڕێگەیان لە ڕووخانی ڕژێمەكە گرت.

ئەم خۆپیشاندان و ڕاپەڕینانە كە ناوی لێ نرابوو «بەهاری عەرەبی»، لە دوای ماوەیەكی كورت وێنە ڕاستەقینەكەی دەركەوت و، لەبری هەنگاوهەڵگرتن و وەرچەرخان بەرەو دیموكراسی، چەند ڕژێمێكی دیكە جێگەی ڕژێمە كۆنەكانیان گرتەوە و، ئەوانیش نەیانتوانی لە ئاستی خواست و داواكارییەكانی خەڵكی خۆیان بن، بۆیە بارودۆخەكە هەر لە دەوڵەتانی باكووری ئەفریكاوە تا تەواوی ڕۆژهەڵات، جۆرێك لە ناسەقامگیری دروست بوو، ئەم ناسەقامگیرییەش بووە زۆنێكی زۆر باش بۆ هەڵكشان و برەودان بە هزری توندوتیژی و بووە زەمینەیەك بۆ دووبارە زیندووبوونەوەی ڕێكخراوی تیرۆریستیی ئەلقاعیدە و هاوكات دروستبوونی چەندین ڕێكخراوی تیرۆریستیی دیكە لەژێر ناوی جیاوازدا.

هاوكات لەگەڵ توندبوونی ئاڵۆزی و گرژییەكان بۆ سەر ڕژێمی بەشار ئەسەدیش، هێز و گرووپی میلیشیایی شیعەش بە ناوی پاراستنی شوێنە پیرۆزەكانی ئەهلی شیعە دەركەوتن و بە ناوی جیهادی شیعەوە ڕوویان لە سووریا كرد و، بەشێكی زۆر لە شیعەكانی پاكستان و ئەفغانستان چەكدار كران لە سووریا، هەروەها حزبوڵڵای لوبنانی و چەندین گرووپ و میلیشیای شیعەش لە عێراقەوە چوونە سووریا بۆ بەرگریكردن لە هێشتنەوەی ڕژێمی ئەسەد.

ئەم بارودۆخەی سووریا بووە هۆكاری هەڵكشان و دەركەوتنی ڕەوتی توندهاژۆ لە هەردوو مەزهەبی شیعە و سوننەدا و، ئاراستەی كێشەكانی نێوان شیعە و سوننەی بە شێوەیەكی ترسناك فراوان كرد و، لەم نێوەندەشدا دەوڵەتانی هەرێمی لەسەر ئاستی ڕۆژهەڵاتی ناوەڕاست و بە ناوی بەرگریكردن لە ئیسلام (سوننە و شیعە) هەر وڵاتێك بۆ بەرژەوەندیی خۆی دەستتێوەردانی تەواوی كرد و نفووزی خۆی لەو وڵاتانە بڵاو كردەوە.

لەسەر ئاستی حكومەتی عێراقیش، دیسان لە دەستپێكی ساڵی 2011، قۆناغێكی وەرچەرخان بوو لە كۆی پرۆسەی سیاسیی عێراقدا، بەتایبەتی كە لە كۆتاییەكانی ساڵی 2010 كابینەی دووەمی حكومەتەكەی نووری مالیكی ماوەیەكی كورت بوو متمانەی لە پەرلەمانی عێراقی وەرگرتبوو و، چاوەڕێی ئەوەی لێ دەكرا، ئەم حكومەتە تەواوی ڕێككەوتنی هەولێر جێبەجێ بكات، كە ئەم ڕێككەوتنە بەو جۆرە ڕێككەوتنی لەسەر كرابوو كە دوو كاری گەورە ئەنجام بدات:

1. دامەزراندنی ئەنجومەنێكی باڵای سیاسی كە د.ئەیاد عەلاوی سەرۆكایەتی بكات و، ئەم ئەنجومەنە میكانیزمێك بێت بۆ دابەشكردنی دەسەڵاتەكان لە نێوان سەرۆك وەزیران و ئەنجومەنەكە، ئەمەش وەك ڤیتۆیەك بۆ ڕێگرتن لە خراپ بەكارهێنانی دەسەڵاتەكان لەلایەن سەرۆك وەزیرانەوە و هەنگاوهەڵگرتن بەرەو دیكتاتۆریەت.

2. دووبارە بونیادنانەوەی دەوڵەتی عێراق بەپێی دەستوور و بوونی عێراق بە دەوڵەتێكی «فیدڕاڵی و دیموكراتی و پەرلەمانی و فرەیی» ڕاستەقینە و لەناو ئەم دەوڵەتە فیدڕاڵییە بەپێی دەستوور مامەڵە لەگەڵ هەرێمی كوردستان بكرێت و، دووبارە پەیوەندییەكان ڕێك بخرێنەوە.

بەڵام لە بری هەنگاوهەڵگرتن بۆ ئەم گۆڕانكارییە ئەرێنییانە لە پرۆسەی سیاسیی عێراقدا، تەواو تەواو حكومەتەكەی نووری مالیكی هەنگاوی پێچەوانەی هەڵگرت و، تەواوی خاڵ و بەندەكانی ڕێككەوتنی هەولێری پێشێل كرد و، سەرۆك وەزیران، ئەنجومەنی وەزیرانی بێ مانا كرد و هەوڵی دا، لە ڕێگەی دامەزراندنی ڕاوێژكارەكانی لە هەر وەزارەتێك، ڕاستەوخۆ وەزارەتەكان لەلایەن نووسینگەی سەرۆك وەزیرانەوە بەڕێوە ببڕێن، هەروەها بە ناوی جێبەجێكردنی یاسای «دژە تیرۆر» كەوتە تەسفیەی سەركردە سوننەكان و هەروەها ئەو عەرەبە سوننەیانەی لە خۆپیشاندانەكاندا دەستگیر كرابوون، هەر بۆیە دوای ئەوەی لە كۆتایی 2011 باراك ئۆباما بڕیاری دا هێزەكانی ئەمریكا لە عێراق بكێشێتەوە، ئیدی پرۆسەی سیاسیی لە عێراقدا كەوتە ناو گێژاوی سیاسەتێكی مەزهەبگەرایی شیعەی توندهاژۆوەوە و ئەمەش بووە هۆكاری ئەوەی كە زەمینەیەكی هاوسۆزی عەرەبی سوننە بۆ گرووپە تیرۆریستییەكان دروست بێت، ئەو گرووپە تیرۆریستییەش پێش دروستبوونی گرووپی تیرۆریستانی داعش، گرووپی تیرۆریستانی ڕیكخراوی ئەلقاعیدەی لقی عێراق بوو.

 بەهاری عەرەبی و ئۆپۆزسیۆنی كوردی

بزووتنەوەی گۆڕان كە لە هەڵبژاردنەكانی 2009ی پەرلەمانی كوردستان 25 كورسی بەدەست هێنابوو، نەك هەر خۆی بە هێزی دووەم دەزانی لە دوای پارتی دیموكراتی كوردستان، بەڵكو شەخسی سەرۆكی بزووتنەوەی گۆڕان «نەوشیروان مستەفا»، بارودۆخەكەی بەو جۆرە دەخوێندەوە كە ئەو بەشەی یەكێتی دوای جیابوونەوەی بزووتنەوەی گۆڕان ماوەتەوە و ئێستا لەگەڵ پارتی دیموكراتی كوردستان ڕێككەوتنی ستراتیژییان هەیە و حوكمڕانیی كوردستان بەڕێوە دەبەن و، لە چوارچێوەی ئەو ڕێككەوتنە ستراتیژییەش پۆستی سەرۆك وەزیران لای یەكێتی نیشتمانی كوردستان بوو، هەر كات ئەو بیەوێت، دەتوانێت لە چوارچێوەی ڕیككەوتنی ستراتیژی بیانهێنێتە دەرەوە و خۆی بڕیاربەدەستی كوردستان دەبێت، دواتریش لە چوارچێوەی ڕێككەوتنی «دەباشان» ئەم ڕاستییەی خستە ڕوو، ئەوەشی نەشاردەوە كە لە دوای ئەم ڕێككەوتنە ئەوە «گۆڕان و یەكێتی»ـن كە بڕیار لەسەر ئایندەی كوردستان دەدەن.

لەسەر بنەمای ئەم ڕوانگەی «خەیاڵ پڵاوییە» دوای ئەوەی خۆپیشاندانەكانی بەهاری عەرەبی فراوان بوون و هەریەك لە ڕژێمەكانی «میسر و لیبیا و تونس» ڕووخان، لە 29ی كانوونی دووەمی 2011 بزووتنەوەی گۆڕان بەیاننامەیەكی دەركرد و داوای هەڵوەشانەوەی حكومەتی هەرێمی كوردستانی كرد، لەم بارەیەوە سەرۆك بارزانی نووسیویەتی «ڕۆژی 29ی كانوونی دووەمی 2011، گۆڕان بەیاننامەیەكی بڵاو كردەوە و، داوای هەڵوەشانەوەی حكومەتی هەرێمی كوردستانی كرد، ئەوە لە حاڵێكدا بوو، كە حكومەتی هەرێمی كوردستان متمانەی لە پەرلەمانێكی هەڵبژێردراو وەرگرتبوو، نەك بە كودەتا دەسەڵاتی گرتبێتە دەست، تەنیا ڕێگەی ڕاست و دروست بریتی بوو لەوەی ئەگەر ئۆپۆزسیۆن خوازیاری هەڵوەشانەوەی حكومەتی هەرێمی كوردستانە، دەبێت بگەڕێنەوە بۆ پەرلەمانی كوردستان و داوای هەڵبژاردنی پێشوەختە بكەن».

لەسەر ئەم بەیاننامە پۆپۆلیستییەی بزوتنەوەی گۆڕان وەك سەرۆك بارزانی ئاماژەی پێ كردووە، «لەسەر بەیاننامەكەی گۆڕان، ڕۆژی 30ی كانوونی دووەمی 2011، هەمو پارتە كوردستانییەكان كۆبوونەوە و بەیاننامەیەكیان دژی بەیاننامەكەی گۆڕان بڵاو كردەوە، لە بەیاننامەكەدا هەموو لایەنەكان دووپاتیان كردەوە كە گلەیی و گازندەیان هەیە و داوای چاكسازی دەكەن، بەڵام هەڵوەشانەوەی حكومەت دواكاری و ئامانجی ئەوان نییە».

ئەوەی جێگەی هەڵوەستەیە تێڕوانین و لێكدانەوە «خەیاڵ پڵاوی»یەكەی سەرۆكی بزووتنەوەی گۆڕان، تەواو تەواو شێوازی «كودەتا»یەكی بەسەر حكومەتی هەرێمی كوردستان گرتبوو، هەر بۆیە نەك هەر لەو پیلانەی دایڕشتبوو، پەشێمان نەبووەوە، بەڵكو پیلانی داهاتوویان بەو جۆرە داڕشتبوو كە بە هەر شێوەیەك بێت، پارتی دیموكراتی كوردستان ئیستفزاز بكەن و بارودۆخەكە بە تەواوی بشڵەقێنن و لە كۆنتڕۆڵ دەربچێت، بۆ ئەمەش لە ڕۆژی 17ی شوباتی 2011 بڕیاریان دا بە هاوبەشی لەگەڵ لایەنە ئیسلامییەكان خۆپیشاندانێك لە سلێمانی بۆ پیرۆزبایی لە بەهاری عەرەبی بەڕێوەبەرن كە ئیسلامییەكان ناویان لێ نابوو «بەهاری ئیسلامی».

پێش ئەنجامدانی ئەم خۆپیشاندانە، خەڵكانێكی زۆر مەزندەی ئەوەیان دەكرد كە ئەم خۆپیشاندانە پیلانێكی لە پشتەوەیە بۆ تێكدانی سەقامگیری و پەكخستنی پرۆسەی سیاسی لە هەرێمی كوردستاندا، هەر بۆیە ئێوارەی 17ی شوبات بە حیساب دوای تەواوبوونی خوپیشاندانی پیرۆزبایی لە «بەهاری ئیسلامی» ئاراستەی خۆپیشاندانەكە وەرچەرخێندرا بۆ سەر لقی چواری پارتی دیموكراتی كوردستان و هەوڵیان دا كە لقی چوار بگرن و بیسووتێنن. سەرۆك بارزانی لەسەر ئەم ڕووداوە نووسیویەتی «ئایا لقی چوار هیچ دەسەڵات و بەرپرسیاریەتیێكی هەبوو لە ئیدارەی سلێمانی؟» بێگومان ئەم پرسیارەی سەرۆك بارزانی بۆ بارودۆخی ئەو كاتە زۆر لە جێگەی خۆیدا بوو، هەروەها پێویستی بەوە بوو، ئەو حزبانەی بە ناو خۆیان بە «ئۆپۆزسیون» دانابوو، وەڵامی بدەنەوە، بەڵام لە بری ئەمە بە جۆرێك سەركردەكانی بزووتنەوەی گۆڕان بە پلەی یەكەم و بەكارهێنانی سەركردەی حزبە ئیسلامییەكان بە شێوەیەكی دیكە، لەخۆبایی كردبوو، كە سەرۆك بارزانی بەمجۆرە ئاماژەی پێ كردووە «ژمارەیەك لەو حزبانەی خۆیان بە ئۆپۆزسیون دەزانی، زۆر لە خۆبایی ببوون و سەردانی هەولێریان كرد و داوای كۆبوونەوەیان لەگەڵ حكومەت كرد، كە ئەو كات د.بەرهەم ساڵح، سەرۆكی ئەنجومەنی وەزیران بوو، حەمە تۆفیق گوتبووی، مامۆستا عەلی باپیر سەرۆكایەتیی كۆبوونەوەكە دەكات. د.بەرهەم پێی گوتبوو: ئێمە خانەخوێین! ئەو وەڵامی دابووەوە كە خانەخوێ نیت و كۆبوونەوەكە مامۆستا عەلی باپیر بەڕێوەی دەبات».

ئەگەر هەڵوەستەیەكی ورد لەسەر ئەم پەرەگرافە بكەین كە لە «بەرگی شەشەمی بارزانی و بزووتنەوەی ڕزگاریخوازی كورد» ئاماژەی پێ كراوە، ڕاشكاوانە پیلانی ئەو كودەتایەی پێشوەختە لەلایەن بزووتنەوەی گۆڕانەوە پیلانی بۆ داڕێژرابوو، دەردەخات، ئەمەش لەو قسەیەی حەمە تۆفیق ڕەحیم كە بە د.بەرهەم ساڵح سەرۆكی ئەنجومەنی وەزیران دەڵێت: «تۆ دانیشە و عەلی باپیر كۆبوونەوەكە بەڕێوە دەبات»، ئەمە بە مانای وشە مانای ئەوەیە كە ئێمە هیچ ئیعتوبارێك بۆ حكومەت و بۆ تۆ وەك سەرۆك وەزیران ناكەین.

ئەم غروورەی هەرسێ لایەنی «گۆڕان، كۆمەڵ، یەكگرتوو» هەورەها بەشێك لە مەكتەبی سیاسیی یەكێتی نیشتمانی كوردستان كە دەیانویست بە شێوازی پۆپۆلیستی و كودەتا حكومەتی هەرێمی كوردستان بگۆڕن، بووە هۆكاری ئەوەی سەرۆك بارزانی پەیامێكی ڕاشكاوانەی جەماوەری ئاراستەی ئۆپۆزسیۆن بكات و پێیان بڵێت: «ئەگەر ئۆپۆزسیون داوای دەسەڵات دەكەن، ئێمە ئامادەین بۆ هەڵبژاردنی پێشوەختە، فەرموون ئەگەر متمانەی میللەتیان بەدەست هێنا، ئەوا بە ئاسانی و ئاشتییانە دەسەڵاتیان ڕادەست دەكرێت، ئەگەرنا ئەمە لە سەری خۆتان دەرهاوێن كە بە زۆر، یان بە كودەتا بگەنە دەسەڵات».

هەر دوابەدوای ئەم پەیامە جەماوەرییەی سەرۆك بارزانی، هەنگاوێكی گرنگی دیكە هەڵگیرا، ئەویش «پرۆسەی چاكسازی» بوو. ئەم هەنگاوە زۆر پێویست بوو كە دوای چەندین ساڵ كاروباری حكومەت هەڵبسەنگێندرێت، هۆكاری سەرەكی بۆ دەستپێكردن بە «پرۆسەی چاكسازی « وەك سەرۆك بارزانی نووسیویەتی «هاووڵاتیان گلەیی و گازندەیان هەبوو، لایەنەكانی ئۆپۆزسیۆن دەیانویست كەموكورتییەكان لە بەرژەوەندیی خۆیان بقۆزنەوە».

ئەم پرۆسەیە كە لای سەرۆك بارزانی زۆر گرنگ و پێویست بوو بۆ ئەو قۆناغە، بەڵام بە هۆی نەخۆش كەوتنی دایكییەوە سەرۆك بارزانی ماوەیەك لە سەرپەرشتیكردنی ئەم پرۆسەیە دوور كەوتەوە، بەڵام دوای وەفاتی خوالێخۆشبووی دایكی و دووبارە سەرپەرشتیكردنەوەی پرۆسەكە سەرۆك بارزانی بەمجۆرە نووسیویەتی «لە كاتی دەستپێكردنەوەی ئەركەكانم، یەكەم پرسیارم لەسەر بابەت و پرسی چاكسازییەكان بوو، بەڵام زۆر بەداخەوە بۆم دەركەوت كە پرۆسەی چاكسازی ئەرك و كارێكی ئاسان نییە، دژایەتییەكی بێسنووری پرۆسەكە دەكرا و كۆسپ و ئالنگاریی بۆ دروست دەبوو، بە جۆرێك كە ئەو پرۆسەیە وێنەی شەڕێكی تەواوی وەرگرت، ئەوەی ڕاستی بێت، خەڵكی هەژار و دەستكورت و پێشمەرگە بە تەواوی پاڵپشتی پرۆسەكەیان دەكرد، بەڵام زۆربەی خاوەن بەرژەوەندی و دەسەڵات و پلە و پایەكان كەوتنە دژایەتیكردنی پرۆسەكە، لەگەڵ ئەوەشدا كاری باش و گەورە كران، بەڵام ئەوەی من مەبەستم بوو و داوام دەكرد، نەكرا».

 
  تێكچوونی بارودۆخی سووریا و

كشانەوەی هێزەكانی ئەسەد لە ڕۆژئاوا

دوای بەرفراوانبوونی خۆپیشاندان و ڕاپەڕینەكانی سووریا، ڕژێمی ئەسەد ناچار بوو هێزەكانی لە بەشێك لە ڕۆژئاوای كوردستان بكێشێتەوە، ئەم كشانەوەیە بووە هۆكاری ئەوەی كە «پەیەدە» حوكمڕانییەكی خۆجێی لەو ناوچانە ڕابگەیەنێت، بەڵام بەداخەوە «پەیەدە» نەهاتن كە ئەزموونی هەرێمی كوردستانی دوای كشانەوەی دامودەزگاكانی بەعس لە ڕۆژئاوا دووبارە بكەنەوە و، هەموو هێزە سیاسییەكان كۆببنەوە و بڕیار لەسەر هەڵبژاردنێكی ئازادانە بدەن، بەپێچەوانەوە هەر لە دەستپێكەوە، پەیەدە لەژێر كاریگەریی سەركردەكانی پەكەكە لە قەندیل، سیاسەتی تاكڕەوی و خۆسەپاندنیان پیادە كرد و ڕێگەیان نەدا پارتە كوردییەكانی دیكەی ڕۆژئاوا كاری سیاسی خۆیان ئازادانە ئەنجام بدەن، لەمەش زیاتر كەوتە پیادەكردنی توندوتیژی بەرانبەریان، لەم بارودۆخەدا كە دەرفەتێك بۆ كوردانی ڕۆژئاوا هاتبووە پێشەوە كە خۆیان حوكمڕانیی خۆیان بكەن، وەرچەرخانێكی گەورە بوو لەبەر ئەوەی كوردی ڕۆژئاوا لەلایەن حكومەتی سووریا مافی ناسنامەشیان بە كوردانی سووریا ڕەوا نەدەبینی، لەم بارودۆخە هەستیارەدا سەرۆك بارزانی هەموو هەوڵی خۆی خستە گەڕ بۆ ئەوەی لەگەڵ لایەنەكانی ڕۆژئاوای كوردستان و كەسایەتییە ئەكادیمی و سیاسییەكان پێكەوە كۆبكاتەوە بۆ ئەوەی بتوانن داكۆكی لە مافەكانی خۆیان بە شێوەیەی تەندروست بكەن و ڕۆژئاواش بە هاوشێوەی هەرێمی كوردستان ببێتە قەوارەیەكی سیاسی و دەستووری لە سووریادا، سەبارەت بەم هەوڵانە سەرۆك بارزانی نووسیویەتی «دوای هاتنەئارای ئەم بارودۆخە لە سووریا، هەوڵی زۆرمان لەگەڵ لایەنەكانی كوردی ڕۆژئاوای كوردستان دا، لە كۆبوونەوە و دیدارەكاندا داوامان لێكردن، پێكەوە كار بكەن و بەرەیەكی یەكگرتوو لە نێوان خۆیان دروست بكەن، كە نوێنەرایەتیی هەموو كورد بكات و هەرێمی كوردستانیش ئامادەیە بە هەموو شێوەیەك هاوكاریتان بكات و یارمەتیتان بدات، بە مەرجێك خاوەن یەك ناوەندی بڕیار بن و هەر لایەنێك بەرەو لایەك هەنگاو نەنێت. بۆ ئەم مەبەستە بڕیار درا ڕۆژی 28ی كانوونی دووەمی 2012 كۆنفڕانسێك بۆ هەموو لایەن و پارتە سیاسی و كەسایەتییە ئەكادیمی و سیاسی و فەرهەنگییەكانی كوردی سووریا ببەسترێت، لەم كۆنفڕانسەدا نزیكەی 250 كەس لە هەموو لایەنەكان و كەسایەتییەكان ئامادە بوون، جگە لە «پەیەدە» كە بە ڕێنمایی و ئامۆژگاریی قەندیل (سەركردایەتیی پەكەكە) ئامادە نەبوون، چونكە پەیامیان بۆ ناردبوون كە بەشداری كۆنفڕانسەكە نەكەن».

ئەم سیاسەتە هەڵەیەی «پەیەدە» كە لەژێر ڕاسپاردەكانی سەركردایەتیی پەكەكە لە قەندیلەوە ئاراستە دەكرا، بووە هۆكاری ئەوەی هەلێكی مێژوویی لە دەستی كوردانی ڕۆژئاوا بدرێت و نەیانتوانی هاوسۆزی نێودەوڵەتی بۆ خۆیان ڕابكێشن و ئەزموونێكی سەركەوتوو پیادە بكەن، ئەم بارودوخە بەم شێوەیە مایەوە، هەتا شەڕی تیرۆریستانی داعش دەستی پێ كرد و بەشێكی زۆری ناوچەكان لەلایەن تیرۆریستانی داعش دەستی بەسەردا گیراوە، بە سەدان هەزار كوردی سووریاش ئاوارەی هەرێمی كوردستان بوون، لەم حاڵەتەدا جارێكی دیكە سەرۆك بارزانی هەوڵەكانی خۆی خستەگەڕ و یارمەتی پەیەدەی دا و نووسیویەتی «بارودۆخی ڕۆژئاوای كوردستان بەم شێوەیە مایەوە، تا هاتنی داعش و دەستپێكردنی شەڕی داعش. پەیەدە زۆر تینی بۆ هاتبوو و داعش گوشاری خستبووە سەریان و داوای یارمەتییان لە ئێمە كرد. لەبەر خاتری گەلەكەمان و خوشك و براكانمان لە ڕۆژئاوا بە هەموو هەوڵ و توانا و كەلوپەلی بەردەستمان هاوكاری و یارمەتیی «پەیەدە»مان دا لە شەڕی دژی داعش».

ئەم هەوڵانەی سەرۆك بارزانی بەردەوام بوو، تەنانەت پەیوەندییەكانیشی لەگەڵ پەیەدە ئاسایی كردەوە و ساڵح موسلیم سەرۆكی پەیەدە سەردانی هەرێمی كوردستان كرد و جارێكی دیكە سەرۆك بارزانی هەموو لایەنە سیاسییەكانی ڕۆژئاوای لە دهۆك پێكەوە كۆكردەوە و، زەمینەیەكی لەباریشی دروست كرد بۆ ئەوەی ئەمریكییەكان لە ڕێگەی فڕۆكەخانەی هەولێرەوە یارمەتی بگەیێننە ڕۆژئاوا، لەمەش زیاتر كاتێك كۆبانی كەوتە بەر مەترسیی كەوتن، سەرۆك بارزانی داوای لە پەرلەمانی كوردستان كرد كە بڕیاری ناردنی هێزی پێشمەرگە بۆ كۆبانی بدات، ئەم بڕیارە كە لەلایەن پەرلەمانی كوردستانەوە بە كۆی دەنگ پشتگیری كرا، بۆ یەكەمین جار هێزی پێشمەرگە بە شێوەیەكی ئاشكرا و فەرمی سنووری هەر سێ وڵاتی «عێراق و توركیا و سووریا»ی بڕی و توانییان هاوكاری خوشك و براكان لە كۆبانی بكەن و لە ماوەیەكی كورتدا ئەم هاوكاری و بەشدارییەی هێزی پێشمەرگە بووە هۆكاری ئەوەی هاوسەنگی بۆ بەرژەوەندیی ڕۆژئاو لە دژی تیرۆریستانی داعش بگۆڕێت و كۆبانی بە تەواوەتی ئازاد بكرێت و، هێزی پێشمەرگەش دوای ئەم سەركەوتنە بە سەربەرزی و لەژێر شەكانەوەی ئاڵای كوردستاندا گەڕانەوە هەرێمی كوردستان.

ئەم هاوكاری و هەوڵانەی سەرۆك بارزانی كە تەنیا ئامانجی ئەوە بوو، قەوارەیەكی سیاسی لە ڕۆژئاوای كوردستان دابمەزرێت، لەلایەن پەكەكەوە ئاراستەكەی شێوێندرا و وای كرد، توركیا هەنگاو بەرەو داگیركردنی عەفرین و سەری كانێ هەڵبگرێت، ئەمە لەگەڵ ئەوەی توركیا پێشتر هاوكار و پشتیوانی ڕۆژئاوا بوو، تەنانەت هێزی پێشمەرگەی كوردستان كە چووە كۆبانی بە خاكی توركیادا ڕۆیشت و گەیشتە كۆبانی، لەسەر ئەم ئاراستە هەڵەیەی سیاسەتی پەكەكە سەرۆك بارزانی بەمجۆرە خستوویەتە ڕوو «لە ئەنجامی تاكڕۆیی و هەڵەكانی پەیەدەدا كارەسات و بارودۆخێكی وا بەسەر عەفرین و سەرێكانی و ناوچەكانی تر هات كە قەرەبووی زۆر زەحمەتە، ئەوان بە شێوەیەك كەوتنە ژێر كاریگەری و هەژموونی پەكەكە، كە توركیایان لە هاوكار و پشتیوانەوە كردە دوژمن و داگیركار، بە ڕاستی ئەوەی لە عەفرین ڕووی دا، جینۆسایدێكی تەواو بوو، پەكەكە، مەبەستی بوو سوود لە پەیەدە وەربگرێت و بەكاریان بهێنێت بۆ هەڵگرتن و لادانی وێنە و ڕوخساری تیرۆریستی لەسەر خۆیان، لەلایەكی دیكەشەوە نیوەی ئەو چەكە پێشكەوتووانەی لەلایەن ئەمریكاوە دەدرایە پەیەدە، دەگەیشتە دەستی پەكەكە، بەتایبەتی لە ڕێگەی شنگالەوە بە هاوكاری ئەمنی نیشتمانیی عێراق و حەشدی شەعبی و باڵێكی یەكێتی».

 ئاكامی هەڵبژاردنەكانی 2013 و

پێكهێنانی كابینەی هەشتەم

دوای نەخۆشكەوتنی خوالێخۆشبوو «مام جەلال» كۆنتڕۆڵكردنی ئاراستەی سیاسەتی یەكێتی نیشتمانی كوردستان و پارێزگاریكردنی ڕێككەوتنی ستراتیژیی نێوان پارتی و یەكێتی كارێكی ئاسان نەبوو. سەركردایەتیی یەكێتی بە تەواوەتی گەیشتبوونە ئەو قەناعەتەی ئەگەر لە ڕێككەوتنی ستراتیژی بێنە دەرەوە و لەگەڵ پارتی بە یەك لیست دانەبەزن، بارودۆخیان باشتر دەبێت، هەر بۆیە بۆ هەڵبژاردنەكانی 21ی ئەیلوولی 2013، یەكێتی بڕیاری دا بە لیستێكی سەربەخۆ دابەزێت، ئەم هەنگاوەیان قەوارەی ڕاستەقینەی یەكێتی دەرخست، لە هەمان كاتدا تووشی شكستێكی گەورە بوون كە ئاكامی هەڵبژاردنەكان بە هێزی سێهەم لە كوردستان پۆلێنی كرد، لەم هەڵبژاردنەدا پارتی بە بەدەستهێنانی «38» كورسی وەك هێزی یەكەم و سەرەكی لە كوردستان مایەوە، بزووتنەوەی گۆڕان بە بەدەستهێنانی «24» كورسی بووە هێزی دووەم و یەكێتی نیشتمانی كوردستانیش بە بەدەستهێنانی «18» كورسی بووە هێزی سێیەم.

ئەم ئاكامانەی هەڵبژاردن هاوكێشەیەكی تازەی دروست كرد، بەتایبەتی كە خوالێخۆشبوو نەوشیروان مستەفا بڕیاری دا بزووتنەوەی گۆڕان ئەمجارەیان بەشداری لە پێكهێنانی حكومەت بكات، بۆ ئەم مەبەستەش دوای ڕاگەیاندنی ئاكامەكانی هەڵبژاردن لە مانگی تشرینی دووەمی 2013 نەوشیروان مستەفا سەردانی سەرۆك بارزانی كرد، سەبارەت بەم سەردانە سەرۆك بارزانی نووسیویەتی «ڕۆژی 25ی تشرینی دووەمی 2013، نەوشیروان مستەفا سەردانی كردم و لە دیدارێكدا داوای كرد، لاپەڕەیەكی نوێ لە نێوان پارتی و گۆڕاندا بكرێتەوە، هەروەها ئامادەیی گۆڕانی نیشان دا، بۆ بەشداری كردن لە كابینەی تازەی حكومەتی هەرێمدا، لە بەشێكی دیكەی كۆبوونەوەكە ڕایگەیاند» بە مەبەستی گرژی و ساردیی نێوان هەردوولا هاتووە و داوا دەكات، كە وەك ڕابردوو پێكەوە كار بكەین و هاوكار بین لە كار و بڕیارەكاندا و دەست بە قۆناغێكی نوێ بكەین. لەوەڵامدا پێم ڕاگەیاند، ئێمەش بۆ كردنەوەی لاپەڕەیەكی نوێ لە نێوان هەردوولا ئامادەین و نێچیرڤانم ئاگادار كردەوە كە لەگەڵ نەوشیروان مستەفا كۆببێتەوە و گفتوگۆ لەسەر بەشداریی گۆڕان بكەن لە حكومەتدا و بەشداریی گۆڕان لە حكومەتدا هەنگاوێكی باش و بەجێیە».

ئەم هەنگاوەی بزووتنەوەی گۆڕان بۆ بەشداریكردنی لە كابینەی هەشتەمی حكومەتی هەرێمی كوردستان هەنگاوێكی گرنگ بوو بۆ دووبارە ڕێكخستنەوەی پرۆسەی سیاسیی لە هەرێمی كوردستان و هەروەها دروستكردنی یەكڕیزی لە نێوان تەواوی هێزە سیاسییەكاندا، بەتایبەتی لەو كاتەدا كە مەترسییەكانی سەرهەڵدانی تیرۆریستانی داعش دەركەوتبوو و شێوازی كارە تیرۆریستییەكانیان بە تەواوەتی گۆڕانكاری بەسەردا هاتبوو. لە لایەكی دیكەوە حكومەتی عێراق بە بڕیاری شەخسی «نووری مالیكی» هەر لە سەرەتای مانگی شوباتی 2014 پشكی هەرێمی كوردستانی لە بودجەی عێراق بڕی، بەڵام لە هەمان كاتدا لە پرۆسەی پێكهێنانی هاوپەیمانی و دابەشكردنی پۆستەكان بۆ كابینەی هەشتەم، یەكێتی نیشتمانی كوردستان ئاستەنگی دروست دەكرد و، نەیدەویست بەپێی بەركەوتەی هەڵبژاردن مامەڵەی لەگەڵدا بكرێت، بزووتنەوەی گۆڕانیش پێداگری لەسەر ئەوە دەكرد، لەسەر بنەمای بەركەوتەی هەڵبژاردن پشكی خۆی لە كابینەی هەشتەم دەوێت، ئەوەی دیكە كێشەی نێوان پارتی و یەكێتییە با خۆیان چارەسەری بكەن، هەر بۆیە دوای 9 مانگ لە هەڵبژاردنەكانی ئەیلوولی 2013، توانرا لە 18ی حوزەیرانی 2014 كابینەی هەشتەم ڕابگەیەندرێت.

ڕاگەیاندنی كابینەی هەشتەمی حكومەتی هەرێمی كوردستان لە كاتێكدا بوو كە هەفتەیەك بوو، تیرۆریستانی داعش مووسڵیان داگیركردبوو، «ئەبووبەكر بەغدادی»یش خەلافەتی ئیسلامی ڕاگەیاندبوو، هەروەها لە ماوەی ئەو هەفتەیە بە سەدان هەزار ئاوارە لە عێراق و سووریاوە ڕوویان لە هەرێمی كوردستان كردبوو، شەڕی نێوان هێزی پێشمەرگەی كوردستان و تیرۆریستانی داعشیش ناوبەناو بوونی هەبوو، بەڵام وێڕای هەموو ئەم كارەسات و قەیرانانە لە یەك كاتدا وەك «بڕینی پشكی هەرێمی كوردستان لە بودجەی عێراق، هاتنی سەدان هەزار ئاوارە بۆ كوردستان و گۆڕینی لە پڕ و لە ناكاوی دیموگرافیای كوردستان، مەترسیی تیرۆریستانی داعش كە بە بڕی زیاتر لە 25 ملیار دۆلاری تەنیا لە عێراق چەكی پێشكەوتووی ئەمریكی كەوتبووە بەردەستیان و...هتد»، بەڵام لەبەر ئەوەی بەشێوەیەك لە شێوەكان یەكریزی و هاوپەیمانی نێوان لایەنە سیاسیەكان لە پێكهاتەی كابینەی هەشتەم ڕەنگی دابووەوە، توانرا بەشێوەیەكی زۆر سەركەوتووانە هەم ئیدارەی هێزی پێشمەرگەی كوردستان بكرێت لەشەڕی دژی تیرۆریستانی داعش و هەمیش ئیدارەی ئەو هەموو ئاوارانەش بكرێت، كە عێراق و سووریاوە هاتبوونە كوردستان، لەمەش زیاتر وێڕای قەیران و شەڕی بەرفراوانی هێزی پێشمەرگە لەگەڵ تیرۆریستانی داعش كە بەرەكەی زیاتر لە 1000 كیلۆمەتر بوو، توانرا لەسەر داوای سەرۆك بارزانی پەرلەمانی كوردستان بڕیار بدات، هێزی پێشمەرگە بچێت بۆ كۆبانی و لەوێش سەركەوتنێكی گەورە بە دەست هات.

بەداخەوە ئەم تەبایی و یەكڕیزییە ساڵێكی تێنەپەڕاند و، جارێكی دیكە لە حوزەیرانی 2015، دووبارە ڕق و كینەی سیاسی دەستی پێ كردەوە و، هەوڵێك هاتە ئاراوە بۆ ئەوەی لە ڕێگەی پەرلەمانەوە كودەتایەك بە سەر سەرۆكایەتیی هەرێمی كوردستان بكەن، بەڵام لەگەڵ هەموو ئەمانەشدا فەرمانی سەرۆك بارزانی بەو جۆرە بوو لەو بارودۆخە ناسكەدا بە دیالۆگ و لێكتێگەیشتن هەموو كێشەكان چارەسەر بكرێن، ئەوە بوو لە 23ی حوزەیرانی 2015 پەرلەمانی كوردستان لە دانیشتنێكی «50+1» خوێندنەوەی یەكەمی بۆ یاسای سەرۆكایەتیی هەرێمی كوردستان كرد، لەو كاتەوە هەتا ڕۆژی 19ی ئابی 2015 كە كاتی خوێندنەوەی دووەم بوو بۆ یاساكە، هەموو هەوڵەكان بە ناوبژیوانیی هاوپەیمانان و نەتەوە یەكگرتووەكان خرانە گەڕ بۆ ئەوەی خوێندنەوەی دووەم بۆ یاساكە نەكرێت، بەڵام سەرۆكی پەرلەمان كە لە بزووتنەوەی گۆڕان بوو، ڕاستەوخۆ فەرمانی لە شەخسی نەوشیروان مستەفاوە وەردەگرت، هەوڵی دا تاكلایەنە كۆبوونەوەی پەرلەمان هەر ئەنجام بدات، ئەوە بوو ئەمجارەیان نیسابی یاسایی دروست نەبوو و پەرلەمان پەك خراو جارێكی دیكە ڕق و كینەی سیاسی ناسەقامگیری لە كوردستان دروست كردەوە و، دوای ئەوەی لە پەرلەمان شكستیان هێنا، هەوڵیاندا بە ئاژاوەگێری و توندوتیژی كودەتاكەیان سەربخەن، بۆیە پارتی دیموكراتی كوردستان بڕیاری دا هاوپەیمانییەكەی بۆ پێكهێنانی كابینەی هەشتەم لەگەڵ گۆڕان هەڵبوەشێنێتەوە و، ڕێگەی نەدا سەرۆكی پەرلەمان بگەڕێتەوە پەرلەمان و وەزیرەكانی گۆڕانیشی ناردەوە بۆ ماڵەوە.

  هێرشی تیرۆریستانی داعش بۆ سەر كوردستان و داگیركردنی مەخموور و شنگال و دەشتی نەینەوا

تیرۆریستانی داعش هەر لەگەڵ دەركەوتنیان و پاشانیش داگیركردنی بەشێكی زۆری خاكی عێراق و سووریا و ڕاگەیاندنی خەلافەتی ئیسلامی لە مووسڵ، ئەفسانەیەكیان دروست كردبوو، كە هیچ هێزێك لەسەر ئەم زەمینە نە دەتوانێت ڕووبەڕوویان ببێتەوە، نە دەشتوانێت تێكیان بشكێنێت، ئەم بۆچوونە تەنیا بۆچوونی ئەو خەڵكانە نەبوون كە هێرشە دڕندانەكانی داعشیان بینیبوو، یان لە دەستی داعش هەڵهاتبوون، بەڵكو ئەمە بۆچوون و تێگەیشتنی پسپۆڕانی سەربازیی و ئەمنی بوو لەسەر ئاستی ناوەندەكانی فیكر و لێكۆڵینەوە و ئاستی ستراتیژیەتی ئاسایشی نەتەوەیی ئەمریكا و یەكێتیی ئەوروپا و تەواوی دەوڵەتانی جیهان، بەوەی ئەم هێزە تیرۆریستییەی كە ناوی لە خۆی ناوە «دەوڵەتی خەلافەتی ئیسلامی - داعش»، هێزێكە لەسەر زەوی لە شكان نایەت و بە هێزی ئاسمانیش ناتوانرێت تێك بشكێندرێت، هەر بۆیە جیهان دەستەوەستان بوو لەوەی هاوپەیمانییەك دروست بكات بۆ ڕووبەڕووبوونەوەی مەترسیی تیرۆریستانی داعش، هەروەها دەستەوەستان بوو لەوەی پلانێكی تۆكمەی سەربازی و ئەمنی دابڕێژێت بۆ لەناوبردنی تیرۆریستانی داعش.

بۆ سەلماندنی ئەو ڕاستییەش، ئەگەر سەرنج لە ئاراستەی هەوڵە نێودەوڵەتییەكان و شرۆڤە و بیروبۆچوونی ناوەندەكانی فیكر و لێكۆڵینەوە بدەین، دەبینین لەسەر ئاستی نێودەوڵەتی «ئەمریكا و ناتۆ و یەكێتیی ئەوروپا» لە ماوەی 10ی حوزەیران تا 2ی ئابی 2014 هیچ هەوڵێكیان دیار نەبوو و بێ ئومیدی تەواو بە هەنگاوەكانیانەوە دیار بوو. بەڵام كاتێك لە 2ی ئابی 2014، تیرۆریستانی داعش ئاراستەی هێرشەكانیان گۆڕی بۆ سەر هەرێمی كوردستان و توانییان «مەخموور، شنگال، دەشتی نەینەوا» داگیر بكەن، بە سەدان هەزار ئاوارەش ڕوویان لە هەرێمی كوردستان كرد، سەرۆك بارزانی تەنیا سەركردە بوو لەم جیهانەدا كە توانی تەلاری سەرۆكایەتیی هەرێمی كوردستان بەجێ بهێڵێت و ببێتەوە بە هەمان پێشمەرگەكەی ساڵی 1962 و بگەڕێتەوە سەنگەرەكانی پێشەوەی پێشمەرگە و، ڕابەرایەتی هێزێك بكات لە شەڕی دژی داعش كە هێزی پێشمەرگەیە و لە ڕووی چەك و تەقەمەنییەوە تەنیا ژمارەیەك چەكی ساڵی هەشتاكانی سەدەی ڕابردوویان لەبەر دەست بوو، لە ڕووی تەقەمەنیشەوە شتێكی ئەوتۆیان لەبەر دەست نەبوو، چونكە نە عێراق هاوكاری پێشمەرگەی كردبوو بە یەك فیشەك، نە ڕێگەشیان دەداین لەسەر ئاستی نێودەوڵەتی وەك هەرێمی كوردستان خۆمان چەك و تەقەمەنی بكڕین، بەڵام عەزمی سەرۆك بارزانی بە هێزی پێشمەرگەی كوردستان و ئامادەباشییان بۆ قوربانیدان و پاراستنی كوردستان، هەموو ئەو بۆچوونانەی پێشتری لەسەر تیرۆریستانی داعش پووچەڵ كردەوە، دوای ئەوەی لە یەكەم داستانی نەبەردیدا هێزی پێشمەرگە توانییان لە 10ی ئابی 2014 گوێڕ و مەخموور لە دەستی تیرۆریستانی داعش ئازاد بكەن و، هەروەها پێشمەرگە قارەمانەكان لە شنگال توانییان مەزاری شێخ شەرەفەدین لەناو شنگال و ئاوارەكان لە چیای شنگال بپارێزن و تیرۆریستانی داعش تێك بشكێنن و ئەفسانەكەیان بەتاڵ بكەنەوە، ئیدی ئەم مقاوەمەتەی پێشمەرگە هەموو هاوكێشەكانی پێشتری لەسەر ئاستی كۆمەڵگەی نێودەوڵەتی گۆڕی و، ئاراستەیەكی تازە و ئومێدێك لە ئیرادەی پێشمەرگەوە بۆ تێكشكاندنی تیرۆریستان هاتە ئاراوە. سەرۆك بارزانی لە بەرگی شەشەمی بارزانی و بزووتنەوەی ڕزگاریخوازی كوردستان بەم شێوەیە باسی ئەو 8 ڕۆژەمان لە 2ی ئاب تا 10ی ئابی 2014 بۆ دەكات «ڕۆژانی 6و7ی ئابی 2014، ڕۆژانی سەخت و پڕ لە ئێش و ئازار بوون، چونكە داعش توانی مەخموور و گوێڕ كۆنتڕۆڵ بكات و لە میحوەری خازریش تا نزیك كەڵەك پێشڕەوییان كرد، بەڵام لە زێ نەپەڕینەوە، پێشمەرگە بۆ تێكشكاندنی ئۆتۆمبێلە گوللە نەبڕ «هەمەر»ـەكانی داعش چەكی باش و كاریگەریان لەبەر دەست نەبوو. بارودۆخێكی یەكجار ناهەموار و ناخۆش هاتە ئاراوە، خەریك بوو بەرەو داڕووخانێكی تەواو بچێت، بەڵام لەو ماوەیەی هەولێر كەوتە مەترسی پێشمەرگە دلێر و ئازا و بوێرەكان بە خوێن سنگیان بەرگرییان لە هەولێر كرد و قارەمانیەتێكی گەورەیان نواند و داستان و سەربەرزییەكی مێژوويیان تۆمار كرد.. ڕۆژی 7ی ئاب ژمارەیەكی زۆر سەرۆك و بەرپرسی وڵاتان پەيوەندییان پێوە كردین، لە پەیوەندییەكانیاندا «فرانسۆ هۆلاند سەرۆكی فەڕەنسا، جۆ بایدن جێگری سەرۆكی ئەمریكا، ئەنگلیلا مێركل ڕاوێژكاری ئەڵمانیا، دیڤید كامیرۆن سەرۆك وەزیرانی بەریتانیا، جەنەڕاڵ ئۆستن فەرماندەی سەركردایەتیی ناوەندی هێزەكانی ئەمریكا» هەموویان سەبارەت بە بارودۆخ و دوا پێشهاتەكان پرسیاریان كرد، ئێمەش بە وردی مەترسیی بارودۆخەكە و نەبوونی چەك و تەقەمەنیی پێویستمان بۆ ڕوون كردنەوە، هەموویان بەڵێنیان پێدام كە بە زووترین كات دەست بە هاوكاری و یارمەتی هێزەكانی پێشمەرگە دەكەن. بایدن لە پەیوەندییەكەدا پرسی «ئەگەر فڕۆكەكانی ئەمریكا لە ئاسمانەوە پشتگیری بكەن، لەو بڕوایەدای داعش تێك بشكێندرێت؟ منیش لە وەڵامدا پێم ڕاگەیاند، من بڕوایەكی زۆرم بە پێشمەرگە هەیە، قورسایی و كێشەكە هەر ئەوەیە هێرشە بەربڵاوەكەی داعش ڕابگیرێت، ئەگەر پشتیوانی فڕۆكەمان هەبێت، پشت بە خوا داعش تێك دەشكێندرێت».

لەم پەڕەگرافەدا ئەگەر هەڵوەستە لەسەر ئەو پرسیارە بكەین، كە جۆزیف بایدن سەرۆكی ئێستای ئەمریكا «ئەو كات جێگر بوو» كە لە سەرۆك بارزانی دەپرسێت: ئەگەر فڕۆكەكانی ئەمریكا لە ئاسمانەوە پشتگیری بكەن، لەو بڕوایەدای كە داعش تێك بشكێندرێت؟ هەر خودی ئەم پرسیارە ئەو دەستەوەسانی و نائومێدییەمان پیشان دەدات كە هەموو سەرۆكەكانی جیهان بەرانبەر تێكشكانی تیرۆریستانی داعش هەیان بووە، هەر بۆیە دوای ئەوەی تیرۆریستانی داعش لە گوێڕ و مەخموور تێك شكێندران، ئومێدێك گەڕاوەیە بۆ جیهان، بەوەی هێزێك هەیە لەم جیهانە دەتوانێت تیرۆریستانی داعش لەسەر زەوی تێك بشكێنێت، كە ئەویش هێزی پێشمەرگەی كوردستانە بە ڕابەرایەتیی سەرۆك بارزانی.

ئەم سەركەوتنانەی هێزی پێشمەرگەی كوردستان بەسەر تیرۆریستانی داعش وای كرد، كە سەرۆك ئۆباما لە 11ی ئابی 2014 بۆ یەكەمین جار دیمانەیەكی ڕۆژنامەوانی لەگەڵ تۆماس فریدیمان بۆ ڕۆژنامەی نیۆیۆرك تایمز ئەنجام بدات و بڕیاری ئەوە بدات، ئەمریكا بەشداری لە شەڕی دژی تیرۆریستانی داعش بكات و بیر لەوە بكاتەوە كە هاوپەیمانیی نێودەوڵەتی دژی داعش بە سەركردایەتیی ئەمریكا لەژێر چەتری بڕیاری ئەنجومەنی ئاسایشی نێودەوڵەتی دابمەزرێت.

ئەوەی بەرگی شەشەمی بارزانی و بزووتنەوەی ڕزگاریخوازی كورد، وەك وانەیەكی مێژوویی بۆ نەوەكانی ئێستا و ئایندە گرنگە، ئەوەیە كاتێك ڕابەری كاریزما لە قۆناغە سەختەكاندا بڕیاری چارەنووسساز دەدات، وەك ئەو بڕیارەی سەرۆك بارزانی بۆ تێكشكاندنی تیرۆریستانی داعش دای، بەبێ ئەوەی هێزی پێشمەرگە چەك و تەقەمەنیی پێویستی لەبەر دەست بێت، ئەوا ئەوەمان فێر دەكات، كە ڕابەر و كاریزمای ڕاستەقینە ئەو كەسەیە كە لە ناو ئاسمانی تاریكی نەتەوەدا و لە ڕۆژە سەختەكاندا، پەنجەرەی ئومێد و ڕووناكی بۆ نەتەوەكەی و جیهان دەكاتەوە، تێكشكاندنی تیرۆریستانی داعش بە سەركردایەتیی سەرۆك بارزانی لەسەر دەستی پێشمەرگە، ئەو پەنجەرەی ڕووناكییە بوو كە بارزانی بۆ كوردستان و هەموو جیهانی كردەوە.