ئەكادیمیای ئەمریكیی نەخۆشییەكانی منداڵ جەخت دەكاتەوە كە خواردنەوەی قاوە هەرگیز بۆ منداڵی ژێر تەمەنی 12 ساڵیدا گونجاو نییە، هەروەها لە تەمەنی نێوان 12-18 ساڵیدا پێویستە كە بە بڕی كەم بخورێتەوە، بە مەرجێك بڕی كافائینی ڕۆژانە لە 100 ملگم زیاتر نەبێت. هەروەها ڕێنمایی دەكات كە منداڵ بە دوور بگیرێت لە هەر خۆراك و شلەمەنییەكی دیكە كە ماددەی كافائین لەخۆدەگرێت وەكو: چای، كۆلا، سپۆرت درینك، خواردنەوە وزەبەخشەكان Energy drinks، هەروەها هەموو جۆرەكانی شوكولاتە. كاریگەریی كافائین لەسەر تەندروستیی منداڵ: ماددەی كافائین كاریگەریی زیاتری لەسەر كۆئەندامی دەمار و كۆئەندامی دڵ و سووڕاندا هەیە، بۆنموونە هاندەرە بۆ ناڕەحەتیی منداڵ و كەمبوونەوەی تەركیز كە زیانبەخشە بۆ توانای فێربوون لە قوتابخانەدا، زیادبوونی لێدانەكانی دڵ، بەرزبوونەوەی پەستانی خوێن، تێكچوونی گەدە، لەگەڵ گرفت لە نووستندا بە شێوەی خەوزڕان لەو كاتەی كە منداڵ لە تەمەنی 5-12 ساڵیدا پێویستی بە 11 كاتژمێر خەو هەیە، ئەگەری دروستبونی چاڵی ددان و كلۆربوون، چونكە قاوە لە سرووشتدا ترشە و زیان بە چینی مینای ددان دەگەیەنێت، كەمبوونەوەی ئارەزووی خواردن كە كاریگەریی نەرێنی دەكاتە سەر گەشەی منداڵ، لاوازبوونی ئێسك بۆنموونە هەر 100 ملگم كافائین هۆكارە بۆ لەدەستدانی 6 ملگم كالسیۆم لە ڕێگەی كۆئەندامی میزەڕۆدا، هەروەها وەرگرتنی بڕی زیاتری كافائین بۆ منداڵ مەترسیدارە و هۆكارە بۆژاراویبوون.