سوپای ئوردن ڕایگەیاند، فڕۆکەیەکی بێفڕۆکەوان کە مادەی هۆشبەری هەڵگرتبوو، لە سوریاوە هاتبووە خاكی ئەم وڵاتە، خستە خوارەوە.

سوپای ئوردن لە بەیاننامەیەکدا لە ماڵپەڕی فەرمیی خۆیدا ڕایگەیاند: هێزە سنوورییەکان بە هەماهەنگی لەگەڵ هێزە ئەمنییەکان و هێزەکانی دژە ماددەی هۆشبەر، فڕۆکەیەکی بێفڕۆکەوانی هەڵگری مادەی هۆشبەریان خستە خوارەوە کە لە سوریاوە هاتبووە ناو ئەو وڵاتە.

لە ڕاگەیەندراوەکەدا ئاماژە بەوەشکراوە، ئەو بارەی لە فڕۆکە بێفڕۆکەوانەکەوە دەستکەوتووە، کە نزیکەی ٢ کیلۆ گرام مادەی هۆشبەرە، دەستی بەسەردا گیراوە.

سوپای ئوردن لە مانگی حوزەیرانی ڕابردوودا ڕایگەیاندبوو، سێ فڕۆکەی بێفڕۆکەوانیان خستۆتە خوارەوە، کە یەکێکیان پڕ بووە لە چەک و هەوڵیانداوە لە سوریاوە بی پەڕێننەوە بۆ ئوردن.

دوێنێ سوریا و ئوردن کۆبوونەوەیەکی ئەمنییان بۆ بەرەنگاربوونەوەی بازرگانیکردن بە ماددە هۆشبەرەکان بە ئامادەبوونی سەرۆک ئەرکانی سوپای ئوردن و وەزیری بەرگری سوریا و سەرۆکی هەواڵگری سوریا ئەنجامدا.

لەم دیدارەدا باس لە مەترسی ماددە هۆشبەرەکان و سەرچاوەکانی بەرهەمهێنان و قاچاخکردن و هاوکاری لە بەرەنگاربوونەوەی ئەو كەسانەی کە ئۆپەراسیۆنەکانی قاچاخکردن ڕێکدەخەن و بەڕێوەی دەبەن و هاتنە ناوەوەی نایاسایی ماددە هۆشبەرەکان بۆ ناو ئوردن لە ڕێگەی سنوورەوە تاوتوێ کران.

لە ماوەی ساڵانی ڕابردوودا سنووری ئوردن لەگەڵ سووریا و عێراق بە سەدان هێرشی قاچاخچییەکانی بەخۆیەوە بینیوە.

 

 

 

گوڵان: سەردار خەلیل