پ.د. نەزاكەت حسێن جیا لەوەی كە ئەندامی بەشی ڕۆشنبیری و ڕاگەیاندنی پارتی دیموكراتی كوردستانە و لە هەمانكاتدا مامۆستای زانكۆی سلێمانی و سەرۆكی لێژنەی داكۆكیكاری مافی ڕۆژنامەنووسانیشە لە سەندیكای ڕۆژنامەنووسانی كوردستان و یەكێكە لە خاتوونە چالاكەكانی بواری میدیا و پسپۆڕە لە بوارەكانی ڕاگەیاندن و كاریگەرییەكانی پێشكەوتنی تەكنەلۆژیا و بە دەیان توێژینەوەی زانستیی تایبەت بە گەنج و میدیا و ئافرەتان كردووە و لە ئەلقەی ئەمجارەی بازنەی گفتوگۆدا وێڕای ئەوەی پەنێڵەكەی بەڕێوەبرد، لە هەمانكاتدا چەند بۆچوونێكیشی لەسەر گرفتی گەنجان بەمجۆرە خستە ڕوو:

 

لەگەڵ ئەوەی بە سوپاسەوە بەشداربووانی ئەم پەنێڵە، زانیاری و داتای زۆریان خستە ڕوو، دەروازەیەكیان بۆ كۆمەڵێك بۆچوون و پێشنیاری بە نرخ و ئاست بەرزیان خستە ڕوو، كە هەم بۆ ڕای گشتی گرنگە و هەمیش بۆ حزبە سیاسییەكان و بڕیاربەدەستەكانی ئەم وڵاتەش گرنگ دەبێت، ئەوەی جێگەی خۆشحاڵیمان بوو، وەك بەڕێزان ئەندامانی لێژنەی «بازنەی گفتوگۆ» و بەڕێز دكتۆر سالار عوسمانیش بەرپرسی بەشی ڕۆشنبیری و ڕاگەیاندن ئاماژەی پێ كرد، ئەوە بوو كە ئاستی وتووێژەكان زۆر ئەكادیمی و بەرز بوو و بەشداربووان بە زمانی داتا و ژمارە كێشەكانیان خستە ڕوو، هەرچەندە لە كاتی بەڕێوەبردنی ئەم پەنێڵە لەوانەیە غەدرم لە بەڕێزانی بەشدار بوو كردبێت، كە لەبەر كەمیی كات ڕێگەم نەدەدا هەموو بۆچوونەكانیان بخەنە ڕوو، بۆیە داوامان كرد كە بە ڕاپۆرتی تایبەت دواتر هاوكاریمان بكەن و، ئەو بۆچوون و داتایانەی خۆیانمان بۆ بنێرن، لەبەر ڕۆشنایی ئەو هەموو بۆچوون و پێشینارە بەرزانە منیش حەزم كرد لەسەر گرفتی ئێستای گەنج بۆچوونێك دەربڕم، كە بە بڕوای من ڕاستە قەیرانی دارایی و بێكاری و نەبوونی دەرفەت و دانەمەزراندن و هەندێك گرفتی كۆمەڵایەتی هەن، بەڵام گرفتی گەنج ڕەهەندی جیهانی هەیە و گەنجان ئێستا لە زۆربەی كۆمەڵگەكان و ناوچەكانی جیهان نائارامن، ئەویش بە هۆی گەشەی تەكنەلۆژیا و كرانەوەی جیهان لە بەردەمی و لەبەردەستبوونی زۆری ئامرازەكانی كۆمینیكەیشن و زانیاری. بە نیسبەت هەرێمی كوردستان ئەوەی گەنجی نائارام كردووە، دروستبوونی قەیرانی ناسنامە و شوناسە لە شوناسی نەتەوەیی و نیشتمانییەوە بیگرە كە شانازی پێوە ناكات و قەلەق كراوە بۆی، تا شوناسی كەلتووری و كەسی، ئەویش بە هۆی گوتاری سیاسی و ئیعلامی چەواشەكار كە ساڵانێكی زۆر كاری لەسەر كرا كە گەنج ناڕازی بكات، بێ ئومێدی بكات و ئایندەی لەبەر چاو لێڵ بكات، خۆی بە خاوەن زۆر زیاتر لەو مافانە بزانێت، كە ئەمڕۆ خێزان و حكومەت بۆی دابین كردووە.

ئێستا ئێمە خاوەنی گەنجێكین ئایدیای شپرزە و دەروونی شێواوە و بە هیچ شتێك خۆی نادۆزێتەوەو شانازی بە خۆیەوە ناكات. بە خەیاڵ مژدەی ئایندەی بەهەشتی پێ درا لەلایەن هەندێك حزب و لایەنی سیاسی و گوتارە ئیعلامی و سیاسییەكانیان، بە هۆی سۆشیاڵ میدیا و تەكنەلۆژیاشەوە بە خەیاڵ گەشت دەكات بە جیهاندا، بەڵام بە جەستە لە شوێنێكدایە كە هیچ ئینتیمایەكی بۆی نییە. نە دەتوانێت خۆی و باوان ڕێك بخاتەوە، نە كەلوپەلی پێویستی پێیە وەك ئەوەی سەردەم داوای لێ دەكات. ئەوەی پێویستە بكرێت دەستكاری ئەندێشە و هۆشی گەنجە، دەبێت ڕێكی بخەینەوە و پەروەدەی زەین و هۆش و عاتیفەی بكەین. شوناسی بۆ سەقامگیر بكەینەوە و شوناسی نەتەوەیی و نیشتمانی و كەلتووری پێ بناسێنینەوە، نەك تەنیا بۆ گەنج، بەڵكو بۆ منداڵانیشمان دەبێت بە سیستم و وانەكانی پەروەردەدا بچینەوە و پەروەردەی هۆشی و ناسنامەی لەگەڵ زانستەكانی دی فێری منداڵان بكەین. لەگەڵ ڕەخساندنی دەرفەت و هەلی كاربۆ گەنج، دەبێت میكانیزمی خستەنە گەڕی تواناكانی بۆ بدۆزینەوە، ئەو كات گەنج دەبێتە داهێنەر و بەرهەمهێن. تا گەنچ ڕزگار نەكرێت، لەو قەلەقی شوناس و ئەندێشە شپرز و ماندووە و ئەو و بێ ئومێدیە، ئەستەمە بە ڕەخساندنی دەرفەتەكانیش خۆی بدۆزێتەوە.