لەهێرشێک بە چەقۆ بۆ سەر شەمەندەفەرێک لە ئەڵمانیا؛ ٢ کەس کوژران
لە ئەنجامی هێرشێکی چەقۆ بۆ سەر شەمەندەفەرێکی نەفەر هەڵگر کە لە کیلەوە بەرەو هامبۆرگی ئەڵمانیا دەڕۆیشت، ٢ کەس گیانیان لەدەستدا و ٥ کەسیش برینداربوون.
سابین سوتەرلین واک، وەزیری ناوخۆی ویلایەتی شلسویگ-هۆڵشتاین لە ئەڵمانیا ڕایگەیاند: نزیک کاتژمێر ١٥:٠٠ بە (کاتی ناوخۆ) لە وێستگەی شەمەندەفەری بروکسێد لە نزیک شاری هامبۆرگ کەسێک بە چەقۆ هێرشی کردە سەرخەڵكەكە و لەهێرشەكەدا دوو کەس کوژران و پێنج کەسیش بریندار بوون.
لە لایەکی دیکەوە وتەبێژی پۆلیسی ئەم ویلایەتە ڕایگەیاند، کە گومانلێکراوێک لە پێوەندی لەگەڵ ئەم هێرشەدا دەستبەسەر کراوە.
گەشتەکانی شەمەندەفەری RE7 ی شوێنی ڕووداوەکە هەڵوەشایەوە و ئەفسەرانی پۆلیس ڕایانگەیاند کە چوونە ژوورەوەی قەدەغەیە.
تا ئێستا هۆکاری ئەم هێرشە نەزانراوە و چەندین ئامبولانس و هەلیکۆپتەرێکی ئامبولانس ڕەوانەی شوێنی ڕووداوەکە کران.
گوڵان: سەردار خەلیل
