لە لێواری زۆربەی شەقامەكاندا یاخود لەسەر ڕێگاكاندا ژمارەیەك پارچەی پلاستیكی دادەنرێت كە ئەمەش بۆ ئەوەیە شۆفێران ئاگاداری دەرچوونیان بن لە ڕێڕەوی شەقامەكە بەتایبەت لە شەواندا,هەر بە ئەم بیرۆكەیە بەهۆی پێشكەوتن و تەكنەلۆژیاوە شتی نوێ دێتە ئاراوەو زانایان و ئەندازیاران لە وڵاتانی پێشكەوتوو هەمیشە هەوڵی داهێنان و كاری جیاواتر دەدەن .

ڕێگای موزیكی..لە چەندین وڵاتی جیاوازی جیهان وەك دەنمارك و هەنگاریا و ژاپۆن و چین و ئەمریكا و تایوان و فەرەنسا و هۆڵەندا و چەندین وڵاتی دیكە بیرۆكەیەك درووست بووە كە نۆتی موزیك لەسەر ڕێی ئۆتۆمبێڵەكان درووستكراوە, بەڵام ئەم نۆتانە بەو شێوەیە نییە كە ئاوازدانەر و هونەرمەندەكان دەینووسنەوە ,بەڵكو نۆتەكان لەسەر ڕێگاكاندا بە شێوەی چەند ڕاستە هێڵێكی هەڵكەندراو یاخود بەشێوەی خاڵ دارێژراوەو درێژی نۆتەكان و دووری نێوانیان بەپێی ئەو خێراییە درووستكراون كە بۆ ڕێگاكە دیاریكراوە .