(هاملێت) .. لە دەزگای رۆشنبیری زانكۆكانی جیهان لە هەولێر
دەرهێنەری بەتوانا هونەرمەند (ئەرسەلان دەروێش) گەورەترین شاكاری شانۆی جیهانی لەكۆتایی ئەم مانگەدا لە هەولێری پایتەخت نمایش دەكات، شانۆگەری (هاملێت) كە بە بەناوبانگترین دەقی شانۆیی شەكسپیریی و جیهانی دادەنرێت، دەبێتە نۆبەرەی بەرهەمەكانی (تیپی شانۆی ئەكادیمی زانكۆكانی جیهان) كە لە مانگی(شوبات)ی 2022 دا لەلایەن (دەزگای رۆشنبیریی زانكۆكانی جیهان) لە شاری هەولێر دامەزراوە.لەم شانۆگەرییەدا كە بۆ یەكەمین جارە دوای تێپەڕبوونی سەدەیەك لە بزاڤی شانۆیی لە هەولێر پێشكەش دەكرێت وێڕای دەقئاوێزانكردنی تێكستە (شەكسپیریی)یەكە لەگەڵ چەند تێكستێكی شانۆیی (هادی مەهدی) و (مەمدوح عەدوان)،كۆمەڵێك ئەكتەری ئەكادیمی رۆڵەكان بەرجەستە دەكەن، (گوڵان) لە كۆتا مەشقەكانی ئەم بەرهەمەدا ئامادە بوو بۆ دواندنی ستافی شانۆگەرییەكە و ناساندنی ئەم ئەزموونە هونەرییە گرنگە بە خوێنەرانی ئازیز. سەرەتا دامەزرێنەری تیپەكە دەرهێنەر(ئەرسەلان دەروێش) رووناكی خستە سەر بایەخی ئەم شانۆگەرییەو ئەو دیدە دراماتۆرگییەی نمایشی لەسەر دامەزراوە.
دیداری : خەلیل بلەیی
ئەرسەلان دەروێش: كاركردن لە شانۆگەری (هاملێت) كە بە مەزنترین و درێژترین دەقی نووسەری ئینگلیزیی بلیمەت(ولیام شەكسپیر) دەژمێردرێت، خەونی هەموو شانۆكارێكە لەهەر شوێنێك بێت، بەتایبەتی زیندوێتی ئەم دەقە كە (420) ساڵ بە سەر نووسیندا تێدەپەڕێت،شانۆگەریی (هاملێت) پانتاییەكی فراوان بۆ بەركەوتن لەگەڵ پرسە وجودی و فەلسەفی و سیاسییەكانی هەر كۆمەڵگایەك دەڕەخسێنێت. لێرەوە گرنگی دەست بردنمان بۆ نمایشكردنی (هاملێت) لە شكاندنەوەی بەشێك لە كۆنسێپتەكانییەتی لەسەر واقیعی ژیانی كۆمەڵگاكەمان و تاكەكانی سەرچاوە دەگرێت، بۆیە سەرەڕای دەقە سەرەكییەكەی (ولیام شەكسپیر) كە لەلایەن هاوڕێی ئازیزمان (شێرزاد حەسەن)ی نووسەرەوە كراوە بەكوردی دەقی چەند نووسەرێكی ترمان ئاوێزانكردووە و هەوڵمانداوە بە پشت بەستن بە توانای ئەكتەرەكان و ستافی هونەریی، دیدگای خۆمان بۆ نمایشكردنی (هاملێت) لە ستایلێكی هاوچەرخدا بخەینە بەرچاو، سوپاسی ستافی خۆبەخشی ئەم بەرهەمە دەكەم كە بریتین لە شانۆكاران: (سدیق حسێن، پشكۆ شێخ عەلی، ئاواز ئەحمەد، زیاد كەریم، ریشوان ئەحمەد، وەیلان كەیفی سدیق، كارمەند خدر) هەروەها هونەرمەندان (دانا محەمەد، كارزان كەمال، تریفە كەریمیان، ئەمین فەقیر، سەرهەنگ غەریب)، سوپاسی تایبەتیمان بۆ بەرێزان (د. نەوزاد یەحیا باجگر ـ ئەمینداری گشتی زانكۆكانی جیهان) و ئەندازیار (بورهان سابیر)ی هونەرمەند بەرپرسی دەزگای رۆشنبیری جیهان، كە دابین كردنی پێداویستییەكانی بەرهەمەكەیان لە ئەستۆگرتووە، سوپاسی هونەرمەند (هۆشیار مەرجان) بەرێوەبەری چالاكی هونەریی قوتابخانەكان دەكەین كە هۆڵەكەی خۆیان بۆ تەرخان كردین.
پاشان بەشدارانی نمایشەكە دەربارەی رۆڵەكانیان بۆمان دوان،هونەرمەند خاتوو (ئاواز ئەحمەد ـ لە رۆڵی شاژن) وتی:ئەمە بەشداریی هونەریی سێیەممە لەگەڵ دەرهێنەری ئازیز هونەرمەند (ئەرسەلان دەروێش) لە ساڵانی 2002 و 2003دا لە (دەستبەسەراگرتن) و (هێرۆسترات لەیادكەن) رۆڵی سەرەكیم گێڕاوە، بۆیە مایەی خۆشحاڵیمە كەدوای ئەو ساڵانە جارێكی تر پێكەو كاردەكەینەوە، من لەم شانۆگەرییەدا رۆڵی (گیرترۆد) شاژنی دانیمارك ودایكی (هاملێت)دەبینم. لە راستیدا كارەكتەرێكی فرە رەهەندە و رۆڵێكی زۆر گرنگە (شاژن) لەم نمایشەدا كەسێكی نەرێنی و ئاڵۆزە بۆیە تواناو مەشقێكی باشی دەوێت.
هونەرمەند (سدیق حوسێن ـ لە رۆڵی هاملێت) دەربارەی كاركردنی لەم نمایشەدا وتی:
(هاملێت) لەهەر سەردەمێكدا كاكڵەی پرسێكی تازەیە، چونكە كێشەی وجودو ئینسانی لەخۆ گرتووە هەر لە هاتنە ژیانەوە تاكو پرسە مردن،بۆیە دەرفەتێكی بێسنوور بەهەر دەرهێنەرو ئەكتەرێك دەبەخشێت ئەسپی خەیاڵ و تواناو كاركردنەكانی خۆیانی تیا تاوبدەن. كاری نواندن لە هاملێت زۆر زەحمەت و فرە مەودایە زۆر جاریش ئەكتەرێك بریندارترە لە كارەكتەرەكەی بۆیە من خۆم ناشارمەوە لە پشتی شەكسپیر و هاملێتەوە بەڵكو هەوڵمانداوە ئاوێتەیەكی رۆحی لەگەڵ ئەم كارەكتەرەدا دروست بكەین..لەراستیدا ئەم جۆرە شاكارانە زەحمەتە هەموو دەرهێنەر و ئەكتەرێك خۆی لە قەرەی بدات، وێڕای توانای هونەریی ژێرخانێكی مەعریفی قوڵیشی دەوێت، بۆیە لەم ئەزموونەدا كە یەكەمین بەركەوتنی هونەریمە لەگەڵ مامۆستا (ئەرسەلان دەروێش)ی دەرهێنەر وێرای جیاوازیمان لە شێوازی كاركردنی پێشترمان بەڵام یەكتر قبوڵكردنێكی مەعریفیی و زانستی لەبواری شانۆداو تەنانەت لە پەیوەندییە رۆحی و ئینسانییەكەشەدا، لێك حاڵی بوونێكی سەركەوتووی لەلا دروستكردووین.
هونەرمەند (پشكۆ شێخ عەلی لە رۆڵی پادشا) بەم شێوەیە هاتە ئاخافتن: ئەزموونەكە گرنگ و دانسقەیە، كاركردن لە دەقەكانی شەكسپیردا رۆچوون و هەڵكۆڵینێكی قۆڵی دەوێت بەتایبەتی ئەگەر بتەوێت بە دیدو روانینێكی نوێوە نمایشی بكەیت، ئومێد دەكەم كاركردنمان لەم دەقە مەزن و زەحمەتە لەم هەلومەرجە سەختەدا كە ئاڵنگارییەكی گەورەیە بۆ شانۆكاری كورد بەتایبەتی لەشاری هەولێری پایتەختدا كە بزاڤی شانۆ دووچاری فشاری جۆراوجۆر بووەتەوە، مایەی نرخاندن و بەركەوتنێكی شایستە بێت لەلایەن وەرگرو رەخنەگران و ناوەندەكەوە.
هونەرمەند خاتوو (وەیلان سدیق ـ لە رۆڵی ئۆفیلیا) لەم نمایشەدا بەشدارە لەم رووەوە وتی: ئوفیلیا كارەكتەرێكی پەراوێزخراوی ژێر هەژموونی باوك و براو خۆشەویستەكەیەتی كە (هاملێت)ی شازادەیە،كیژۆڵەیەكی سادەو خۆش باوەڕە ناچارە رووبەرووی دەوروبەری ببێتەوە، پێویستە ئەوە بڵێم كە كاركردن لە شانۆگەری (هاملێت)دا هەڵبژاردەیەكی سەركەوتووی مامۆستا (ئەرسەلان دەروێش)ی دەرهێنەرە كە خۆشبەختانە لەدوای (دووژمنی گەل)ی (هێنریك ئەبسن)كە لە ساڵی 2019دا وا جارێكی تر لەم شاكارەدا بەشداریی لەگەڵدا دەكەم.
هونەرمەند و میدیاكار زیاد كەریم دەڵێت: رۆڵەكەی من (هۆراشیۆ) كارەكتەرێكی سەرەكییە بەتایبەتی كە بە شێكی گەورەی دیدو روانینی هونەریی مامۆستا (ئەرسەلان دەروێش)ی لەسەر هەڵچنراوە، (هۆراشیۆ) ویژدانی گەل و دەنگی ستەمدیدەكان.
