بەرپرسانی پاکستان داوای دروستکردنی دەروازەی نوێیان کرد لە سنووری ناوچەی مەکران بۆ بازرگانی و دابینکردنی کەلوپەلی خواردەمەنی و هەروەها لولەی گازە سروشتییەکان.

بەپێی زانیارییەکانی ڕۆژنامەی داون، شاندی پاکستانی بە سەرۆکایەتی جێگری کۆمیسیاری پەنجگوری پاکستان لە چاوپێکەوتنێکیدا لەگەڵ شاندی ئێرانی پێشنیاری دروستکردنی خاڵی چوونەژوورەوە و دەرچوونی نوێیان لەسەر سنووری گار و لە تەنیشت دەروازەکانی 169 و 170 و 171 کردووە، هەروەها دروستکردنی ڕێگای گشتی  بۆ گەلانی ئێران و پاکستان کە لە هەردوولای سنوورەکە خزمیان هەیە لە تەوەری کۆبوونەوەکەدا بوو.

جێگری کۆمیسیاری شاری پەنجگوری پاکستان گوتیشی: کە ڕاوێژكردن لەسەر ڕێگەپێدانی هەناردەکردنی پارچەی ئۆتۆمبێلی ئێرانی بۆ ناوچەکانی مەکران و ڕەخشانی پاکستان ئەنجام درا، زۆربەی ئەو ئۆتۆمبێلانە بەکاردێن بۆ گواستنەوەی بەنزین و گاز لە ئێرانەوە بۆ ناوچە جیاجیاکانی بەلوچستان.

بەپێی ئەو هەواڵە، پرسی دابینكردنی کارەبا و ئاو بۆ بەڕێوەبەرایەتیی سنووری پاکستان ودانیشتوانی سنوورەکەش بەرزکراوەتەوە و بەرپرسانی ئێرانیش بەڵێنیان بە لایەنی پاکستان داوە بەزوویی بەدواداچوون و چارەسەرکردنی ئەو کێشانە بكەن.

 

 

 

گوڵان: سەردار خەلیل