كەمن ئەو توێژەرانەی هەوڵیان دابێت حوكمڕانی لە چوارچێوەی «فەرمانڕەوا و فەرمانپێكراو» دەربهێنن و، لە چوارچێوەی دوو تۆڕی كارلێكدا «حكومەت و خەڵك» دووبارە پێناسەی‌ بكەنەوە، ئەمەش بەو مانایەی تیمی حكومەت خۆیان دەبنە تۆڕێك و خەڵك و هاووڵاتییش دەبنە تۆڕێك، كاتێك لە بەرەیەكەوە جووڵە دروست دەبێت و، لە بەرەكەی دیكە بە جووڵەیەك وەڵامدانەوە دەست پێ دەكات، ئەوا لەم حاڵەتەدا حكومەت دەبێتە وەڵامدەرەوەی خواستی خەڵك و دابینكردنی پێداویستییەكانیان، لە بەرامبەریشدا خەڵك دەبنە پشت و پەنای حكومەتی خۆیان و بەمەش نەك هەر حاڵەتە تەقلیدییەكەی «فەرمانڕەوا و فەرمانپێكراو» دەگۆڕێت بۆ شتێكی جوانتر، كە جووڵەی هاوشانی خەڵك و حكومەتە، لە هەمانكاتدا دیاردەی نەشازی پۆپۆلیستی بە ڕێگەی ڕیسواكردنیان لەسەر سندوقی دەنگدان كۆتایی پێ دێت.

دەستپێكی كابینەی نۆیەمی حكومەتی هەرێمی كوردستان بە دوو خاڵی گرنگ دەستی پێ كرد، كە بریتی بوون لە:

1- ڕاگرتنی گەندەڵی لە شوێنی خۆیدا و بەجێهێشتنی لێپرسینەوە بۆ دەسەڵاتی دادوەری و سەروەریی یاسا.

2- پێداگری لەسەر دەرچوونی یاسای چاكسازی و دەستپێكردنی پرۆسەی چاكسازی بە یاسا.

بۆ ئاستەنگ دروستكردن بۆ جێبەجێكردنی ئەم دوو هەنگاوە گرنگە، جیا لە هاتنی پەتای كۆرۆنا و پەكخستنی توانا داراییەكانی حكومەت، لە هەمانكاتدا بانگەشەی پۆپۆلیستییانەش لە ناو ئەو حزبانەوە و بەشێكی ئەوانەی لە حكومەتیشدا بەشدار بوون بۆ شكستی كابینەی نۆیەم دەستی پێ كرد، بەڵام لەبەر ئەوەی مسرور بارزانی سەرۆكی حكومەتی هەرێمی كوردستان پێشوەختە لەسەر بنەمایەكی فیكری و پشت بە ئیرادەی گەلی كوردستان ئەم دوو خاڵەی كردبووە ئەولەوییەتی بەرنامەی حكومەتەكەی، ئەوا لەگەڵ ئەوەی بارودۆخەكە زۆر زۆر سەخت بوو لە ڕووی دارایی و سیاسییەوە، بەڵام سەرئەنجام جووڵەكانی حكومەت بۆ خزمەتی بەرژەوەندیی گشتی، ئیرادەی هاووڵاتیانی كردە پشت و پەنا، بۆ درێژەپێدان بە بەرنامەی حكومەت و سەركەوتنی ئەو بەشە گرنگەی كە بۆ دوو ساڵی یەكەمی دانرابوون جێبەجێ بكرێن.

مسرور بارزانی وەك دەوڵەتمەدارێكی لێهاتوو و بەئەزموون، گەیشتبووە قەناعەتی تەواو كە حوكمڕانیی باش و سەركەوتوو، پێویستی بە ژێرخانێكی پتەوی هەماهەنگی و هاوكاریی جددیی نێوان تەواوی ئەندامانی ئەنجومەنی وەزیران هەیە، ئەمەش لە پێناوی ئەوەی كە دەبێت هەموو وەك یەك تیم و یەك جەستە تواناكان یەك بخەن و، پێكەوە شانی بدەنە بەر، بۆ ئەوەی بەرنامەی حكومەت بە سەركەوتوویی جێبەجێ بكەن، لە ماوەی دووساڵی ڕابردوودا، ئەو ژیرخانە پتەوەی بۆ حوكمڕانیی باش و سەركەوتوو بونیادی ناوە، پێمان دەڵێت:

1- ئێستا لە ناو ئەندامانی ئەنجومەنی وەزیراندا (وەزیرەكان) هیچ ڕۆژنامەنووسێكی ناوخۆیی و بیانی بەو جۆرە پێناسەی وەزیرێكی بە پاشكۆی حزبەكەی نەكردووە، هەروەها هاووڵاتیانیش لە میانەی بەڕێوەبردنی كاروباری ڕۆژانەیاندا هەست ناكەن كام وەزیر پشكی كام حزبی سیاسییە، لەمەش جوانتر ئەوەیە، ئەدایەكی هاوسەنگ لە نیوان وەزارەتەكاندا دروست بووە، كە هەست ناكرێت كام وەزارەت پشكی كام حزبە.

2- چەمكی بۆگەنی گەندەڵی كە باشترین چەكی دەستی پۆپۆلیستەكانە، ئەم ژێرخانە پتەوەی حوكمڕانیی كابینەی نۆیەم ئەو چەكەی لە دەستی پۆپۆلیستەكان دەرهێناوە، لەبەر ئەوەشی كابینەی نۆیەم بە پەنابردنە بەر یاسا ڕووبەڕووی پۆپۆلیستەكان دەبێتەوە، ئیستا كەس ناتوانێت حكومەت بە وەزارەتەكانیشەوە تێكەڵاوی گەندەڵی بكات، ئەمەش لەبەر ئەوەیە ئەگەر گەندەڵی و بەڵگە هەبێت، حكومەت چاوپۆشیی لێ ناكات و، لە هەمانكاتدا ڕێگە بە چەواشەكاریی پۆپۆلیستەكانیش نادات.

3- فراوانكردنی كەرتی وەبەرهێنان وەك كەرتێكی بەرهەمهێن و كردنی بە سەرچاوەیەك بۆ دۆزینەوەی هەلی كار و بایەخدان بە كشتوكاڵ و پیشەسازیی كشتوكاڵ و پیشەسازیی گەورە و مامناوەندی بچووك، ئەم هەنگاوانە ئومێدێكی گەشبینیی بۆ خەڵكی كوردستان بونیاد ناوە و، متمانەی بۆ وەبەرهێنان دروست كردووە، كە بە دەیان ملیار دۆلار لە كوردستاندا وەبەرهێنان بكەن.

4- میتۆد و ئاراستەی حوكمڕانی لە كابینەی نۆیەمدا خەریكە وەرچەرخانێكی گەورە بەسەر نائومێدیدا دەهێنێت و، چەكەرەی ئومێدێكی گەورە لە ناخی هەموو هاووڵاتییەكی كوردستاندا دەچێنێت و، ڕۆژ لە دوای ڕۆژ پڕۆژەی ستراتیژی و گەورەتر ڕادەگەیەنێت.

ئەم چەند خاڵە كەمەی لەو وەرچەرخانە گەورەیەدا ئاماژەمان پێ كرد، كە لە میانەی دووساڵی حوكمڕانیی كابینەی نۆیەم هاتوونەتە ئاراوە و، سەقامگیرییەكی باشی لە ناو پرۆسەی حوكمڕانیدا دروست كردووە‌، ئیستا زەمینەی ئەوەی دروست كردووە كە سەقامگیریی حوكمڕانی، كاریگەریی تەواوی لەسەر سەقامگیریی سیاسی هەبێت و، لە ئایندەیەكی نزیكدا كوردستان وەرچەرخانی گەورە بە خۆیەوە ببینێت.

 شەترەنجی حوكمڕانی و زیرەكی لە جووڵاندنی توخمەكاندا

سەركەوتنی نەتەوەكان لە بونیادنانەوەی خۆیان و بەرهەمهێنانی كۆمەڵگەیەكی خۆشگوزەران و شایستە، پەیوەست نییە بەو نەتەوانەی كە خاوەنی سامانی سرووشتیی نەوت و كانزای گرانبەهای وەك زێڕ و ئەڵماسن، بەڵكو پەیوەستە بە ئاست و شێوازی بیركردنەوەی ئەو كاریزمایەی كە پێش ئەوەی پشت بە هەر شتێك ببەستێت، پشت بە ئیرادەی سامانی مرۆیی نەتەوەكەی خۆی دەبەستێت و، لەناو ئیرادەی متبووی ئەوانەوە، ئیرادەیەكی زیندووی ئەوتۆ دروست دەكات، كە جیهان لە ئاستیدا شۆك بێت و ڕابوەستێت.

مێژوو و ئەزموونی ئەو دەوڵەتانەی كە خاوەنی سامانی سرووشتیی وەك نەوت و گاز و كانزای گرانبەهای وەك زێڕ و ئەڵماسن، ئەوەیان فێركردووین، ئەگەر نەتەوەیەك ئەو ئیرادەیەی نەبێت كە بە بێ سامانی سرووشتی و كانزای گرانبەها بناغەیەكی پتەوی حوكمڕانی دابڕێژێت، ئەوا ئەگەر خاوەنی هەموو سامانی سرووشتی و كانزا گرانبەهاكانیش بێت، هەر سەركەوتوو نابێت. پڕۆفیسۆر ستیفن ڤایبەر لە كتێبی «بۆ هەندێك لە نەتەوەكان شكست دەهێنن و هەندێك هاوشانی یەكتری بە سەركەوتوویی دەڕۆن؟» نووسیویەتی: «دەوڵەتێكی وەك پتسوانا-ی هاوسنووری باشووری ئەفریقیا، لەگەڵ ئەوەی 70%ی خاكەكەی بیابانە و خەڵكەكەی لەسەر بەخێوكردنی مانگا ژیان دەبەنە سەر، بەڵام توانییان بە بە دامەزراوەكردنی دامەزراوەی هەناردەكردنی گۆشتی مانگا، دەوڵەتێكی سەركەوتوو و حوكمڕانییەكی باش لە وڵاتی خۆیان پیادە بكەن». ستیفن دەڵێت: «ڕاستە دوای سەركەوتن لە دەوڵەت و حوكمڕانی كانزای ئەلماسیش لەو وڵاتە دۆزرایەوە، بەڵام چۆن دامەزراوەی هەناردەكردنی گۆشتی مانگایان بە دامەزراوەیی كرد، بە هەمان شێوەش مامەڵەیان لەگەڵ ئەلماسەكەش كرد، بۆیە ئەم كانزایە بووە خێر و بەرەكەت، نەك نەگبەتی بۆ میللەتەكەی.»

ئەم ئاراستەیە بەرەو ئەوەمان دەبات، بڵێین: حوكمڕانی پێش ئەوەی بونیادنانی دامەزراوە، یان لێپرسینەوە و وەرگرتنی ڕێوشوێنی پێویست بێت، «فیكرە»، لە سەر ئەم پرسە لە ساڵی 2008 و لە میانەی كۆڕبەندێكی ئابووریدا كە لە سعودیە ئەنجام درابوو، لە «لی كوان یۆ» سەرۆكی پیشووتری سەنگافورەیان پرسی: ئەگەر تۆ خەڵكی سعودیە بوویتایە، چۆن سعودیەت بونیاد دەنایەوە؟ لەوەڵامدا گوتی: «لە بری ئەوەی نەوتم هەناردە بكردایە، پیشەسازیی نەوتم پەرە پێ دەدا»، ئەم وەڵامەی «لی كوان یو» ئەوەمان پێ دەڵێت، كە زۆر جار وەرچەرخانی حوكمڕانی، جووڵەیەكی زیرەكانەی سەر تەختەی شەترەنجی حوكمڕانیی دەوێت و، ئەم جووڵەیەش گۆڕانكاریی زۆر گەورە دروست دەكات.

لەسەر ئەم نەخشەیە ئەگەر هەڵوەستەیەك لە جووڵەكانی مسرور بارزانی لەسەر شەترەنجی حوكمڕانیی كوردستان بكەین، دەبینین بە جووڵەی زیرەكانە، وەرچەرخانی گەورەی دروست كردووە، هەر بۆ نموونە: لە بواری وەبەرهێنان تەنیا ئاراستەی بایەخی گەورەی وەبەرهێنانی لە كەرتی نیشتەجێەوە گواستووەتەوە بۆ كەرتی پیشەسازی و بە پیشەسازیكردنی كەرتی كشتوكاڵ و گەشتیاری.

ئەگەر سەرنج بدەین، ئەم جووڵەیە ئەو گۆڕانكارییە گەورانە بۆ ئایندە دروست دەكات، گریمان ئێمە شارێكی نیشتەجێبوون دروست دەكەین و هەلی كار بۆ سەدان گەنج و كاسبكار دروست دەكەین، بەڵام ئەم هەلە كاتییە و لەگەڵ تەواوبوونی پڕۆژەكە كۆتایی دێت، بەڵام ئەگەر ئەم وەبەرهێنانە گۆڕدرا بۆ دروستكردنی چەندین سایلۆ و چەندین كارگەی بەرهەمە كشتوكاڵییەكان (كە ئێستا بەشێكی زۆیان تەواو بوون)، ئەوە هەم لە كاتی پڕۆژەكە هەلی كار دروست دەكات، هەمیش لەدوای تەواوبوونی پڕۆژەكە سەدان و هەزار كاری بەردەوام لەناو كۆمەڵگەدا دروست دەكات.

خاڵێكی دیكەی گرنك كە دیسان بە جووڵەیەكی زیرەكانە وەرچەرخانی گەورەی دروست كردووە، ڕێكخستنەوەی باجەكانە بەپێی یاسا بەردەستەكانی حكومەت «بەبێ ئەوەی یاسای تازە دەربكات»، ئەمە بووەتە هۆكاری ئەوەی داهاتی حكومەت 100% زیاد بكات و، ئیمكانییەتی حكومەت بگاتە ئەو ئاستەی كە بەبێ بەغدا 80%ی مووچەی فەرمانبەران دابین بكات و، پڕۆژە خزمەتگوزارییەكان بەردەوامییان هەبێت، كە ئێستا بەغدا تەنیا 137 ملیۆن دۆلار دەنێرێت، بەڵام حكومەتی هەرێم 100%ی مووچەی فەرمانبەران دابین دەكات.

  ژیرخانی حوكمڕانیی پتەو

 هەنگاوەكانی چاكسازی و دابینكردنی خزمەتگوزاری خێراتر دەكات

لە قۆناغی شۆڕشی پیشەسازیی چوارەمدا، هەموو كاتێك چاكسازی مانای ڕاستكردنەوە، یان چاككردنەوەی هەڵە و كەموكووڕییەكانی یاسایەك، یان ڕێوشوێنێكی ئیداری ناگەیەنێت، بەڵكو پێشكەوتنی تەكنەلۆژیا و كاریگەرییە ئەرێنی و نەرێنییەكانی لەسەر ژیانی كۆمەڵگە، ناچار دەكات كە چاكسازی لە میتۆدە كۆنەكەدا بكرێت و، میتۆدێكی تازە پەیڕەو بكرێت، هەر وەك چۆن ئێستا لە كابینەی نۆیەمدا كە هەنگاو بەرەو حكومەتی ئەلیكترۆنی هەڵدەگیرێت و، هاووڵاتیان دەتوانن بە شێوازێكی تازە چاودێریی مامەڵەكانیان لە ناو وەزارەت و فەرمانگە حكوومییەكاندا بكەن.

بەشێكی گرنگی چاكسازی لە كابینەی نۆیەمدا، پیادەكردنی ڕیتمێكی نوێیە لە شێوازی بەڕێوەبردنی كاری هاووڵاتیان و، هاووڵاتیان دەتوانن لە ماڵەوە و بە ڕێگەی مۆبایلەكەی دەستیان چاودێریی زۆر لە مامەڵەكانی خۆیان لە وەزارەت و فەرمانگاكانی حكومەتدا بكەن.

لەم چوارچێوەیەدا كابینەی نۆیەمی حكومەتی هەرێمی كوردستان هەوڵی داوە سیاسەتی یەك پەنجەرە (Single window) پیادە بكات، ئەمەش بەو مانایەی كە هاووڵاتییەك دەتوانێت لە یەك پەنجەرەی فەرمانگایەكەوە تەواوی مامەڵەكانی خۆی كۆتایی پێ بهێنێت، ئەم گۆڕینی میتۆدە هەم پڕۆژەی چاكسازیی بە شێوەیەكی بەرچاو ئاسان كردووە، هەمیش گەیاندنی خزمەتگوزارییەكانی خێراتر كردووە.

حوكمڕانی لە سەدەی بیست و یەكەم و لە سەردەمی شۆڕشی تەكنەلۆژیای چوارەمدا، بووەتە كارێكی قورس و، حكومەتەكان بە ئاسانی بڕیاریان پێ نادرێت و بە ئاسانی ناتوانن هەنگاوی كاریگەر هەڵبگرن، بەشێكی قورسبوونی كاری حوكمڕانی بۆ ئەوە دەگەڕێتەوە كە حكومەتەكانی جیهانی سێیەم، یان وڵاتانی تازە پێگەیشتوو، كەمتر هەوڵیان داوە خۆیان لەگەڵ ئەم ئاراستەی پێشكەوتنە بگونجێنن، هەر بۆیە كاتێك تەكنەلۆژیا گۆڕانكاریی گەورە لە كۆمەڵگەدا دروست دەكات و، حكومەتەكان بە میتۆدی كۆن مامەڵەی لەگەڵ دەكەن، دەبینین هەم كاری حوكمڕانی دەبێتە كارێكی قورس، هەمیش وەرگرتنی بڕیاری دروست قورستر دەبێت.

ئەگەر لەم چوارچێوەیەوە هەڵسەنگاندن بۆ ئاراستە و ئەدای حوكمڕانی لە كابینەی نۆیەمی حكومەتی هەرێمی كوردستان بكەین، ئەوا دەبینین هەم هاووڵاتیان هەست بە كەمكردنەوەی ڕۆتین دەكەن، هەمیش وەرگرتنی بڕیاری دروست بۆ چارەسەركردنی كیشەكان لای فەرمانبەرانی فەرمانگاكانی حكومەت كارێكی قورس نەبووە، ئەم میتۆدەی كە كاری هاووڵاتیان و وەرگرتنی بڕیاریش لای كاربەدەستان ئاسانتر دەكات، دینامیكییەتێك بە جووڵەی ئەدای حكومەت دەبەخشێت، كە بتوانێت خێراتر كارەكانی خۆی ئەنجام بدات.

  پڕكردنەوەی بۆشایی.. نێوان خەڵك و حكومەت

دەركەوتنی مسرور بارزانی سەرۆكی حكومەتی هەرێمی كوردستان بە جووتێك جزمەوە لە ناو قوڕ و لیتەی شاری زێڕین و، دڵدانەوەی زیان لێ كەوتووانی لافاوەكە، بەوەی پێی ڕاگەیاندن «من خزمەتكاری ئێوەم، نەك هەر خۆم وەزیرەكانیش هەر خزمەتكاری ئێوەن..»، ئەمەش وەرچەرخانێكی دیكە بوو لە پەیوەندیی ڕاستەوخۆی نێوان خەڵك و سەرۆكی حكومەتی هەرێمی كوردستاندا.

پێش دامەزراندنی كابینەی نۆیەم، لە سەر فەرمانی سەرۆك مسعود بارزانی، تەواوی كەموكورتییەكانی پرۆسەی حوكمڕانیی كوردستان كاری زۆر جددی لەسەر كرابوو و، خەڵكانی پسپۆڕ لێكۆلینەوە و بەدواداچوونی زۆر گرنگیان لەسەر كردبوو، دوو خاڵی گرنگ كە لە پرۆسە چاكسازییەكەی سەرۆك بارزانی وەك دوو خاڵی سەرەكی دەستنیشان كرابوون، ئەمانە بوون:

1- بوونی بۆشایی لە نێوان خەڵك و حكومەتدا.

2- نەبوونی متمانە لە نێوان خەڵك و حكومەتدا.

ئەم دوو خاڵە گرنگە كە دەرهاویشتەی خراپیی پرۆسەی سیاسی و سیستمی حزبایەتیی كوردستان بوون، پێویستی بە بڕیاری بوێر و قورس و بانگەشەكردنی بۆ كوردستانێكی بەهێزی پێویست بوو، ئەم دوو بڕیارە قورسە و هەنگاوهەڵگرتن بۆ كوردستانێكی بەهێز، وەك بەرنامە لە ناو كابینەی نۆیەمدا كاری جددی لەسەر كرا، بۆیە وەك چاودێرانیش بە ڕاشكاوی ئاماژەی پێ دەكەن، ڕۆژ بە ڕۆژ بۆشایی نێوان خەڵك و حكومەت لە كەمبوونەوەدایە و، خەڵك وەك ئامرازی بەردەستی خۆی و حكومەتی خۆی مامەڵە لەگەڵ حكومەتی هەرێمی كوردستاندا دەكات، لە بەرامبەریشدا كۆی دامەزراوەكانی حكومەتی كوردستان وەك خزمەتكار لە بەرامبەر هاووڵاتیاندا خزمەتگوزاری پیشكەش دەكەن. لێرەدا ئەمە مانای ئەوە نییە كە حكومەت هیچ كەموكورتییەكی نییە و لە تەواوی وڵاتدا خزمەتگوزارییەكان بۆ هاووڵاتیان فەراهەم كراوە، بەڵام ئەوەی گرنگە وەك ڕاستییەك لەبەر چاو بگیرێت و بە تەقدیرەوە هەڵسەنگاندنی بۆ بكرێت، ئەم خاڵانەی لای خوارەوەن:

1-  بۆ هەموو كێشە و گرفتێك كە لە ناو كۆمەڵگەی كوردستاندا دروست دەبێت، حكومەتی هەرێمی كوردستان بەپێی ئەو ئیمكاناتەی لەبەر دەستیەتی، بە گیانی پێشمەرگانە خۆی دەكاتە خاوەنی كێشەكە، ئەوەی جێگەی دڵخۆشییە، ئەوەیە كە هاوكات لەگەڵ ئەم بەدەنگەوە هاتنەی حكومەت هاووڵاتیانیش لەگەڵ حكومەتی باشتر هاوكار دەبن.

2- لە ماوەی ڕابردوودا لە پڕۆگرامكردنی تۆماركردنی ناوی قوتابیان بۆ زانكۆكانی كوردستان، بە شێوەی ئەلیكترۆنی، ژمارەیەكی زۆری قوتابیان (ئەوجا بە هۆی ئەو پڕۆگرامەوە بێت كە زانكۆكان دایانناوە، یان هەڵەی ئەلیكترۆنی، یانیش كەمتەرخەمیی قوتابی لە پڕكردنەوەی فۆڕمەكاندا بە شیوەیەكی دروست بێت)، كیشەیەك بۆ قوتابیانی ئەمساڵی زانكۆكانی كوردستان دروست بوو، حكومەتی هەرێمی كوردستان پینەی ئەم كێشەی بەوە نەكرد كە پرسەكە پرسێكی ئەلیكترۆنییە و لە دەسەڵاتی ئەودا نییە، بەڵكو بەپەلە وەڵامی قوتابیانی دایەوە و كێشەكانی چارەسەر كرد.

3- گەڕەكە میللییەكانی ناو شارەكان، هەموو كات لە گەیاندنی خزمەتگوزارییەكان پشتگوێ خراون، یان نەتوانراوە وەك پێویست خزمەتگوزارییان بۆ دابین بكرێت، لە كابینەی نۆیەمی حكومەتی هەرێمی كوردستاندا، جیا لەوەی ئەولەوییەت زیاتر بە گەڕەكە میللییەكان دراوە، لە هەمانكاتدا بۆ كێشەیەكی وەك كێشەی زەوییەكانی گەڕەكی هەشتی حەسارۆك لە شاری هەولێر، سەرۆكی حكومەت خۆی بە مەیدانی سەردانی ئەو زەوییانەی كرد و، هەر لەوێ لەسەر ماستەر پلان فەرمانی گەیاندنی خزمەتگوزاریی دەركرد.

لە دوماهی ئەم باسەدا دەخوازم جەخت لەسەر ئەوە بكەمەوە، كە دەستپێكی كابینەی نۆیەمی حكومەتی هەرێمی كوردستان، بە هۆی بڵابوونەوەی پەتای كۆرۆنا و دووبارە بڕینی بودجە و مووچەی كوردستان لەلایەن بەغداوە، هەروەها هەوڵدانی هەندێك لایەنی پۆپۆلیستی بۆ ئەوەی كەموكورتییەكان بكەنە ئاستەنگ بۆ شكستهێنانی كابینەی نۆیەم، دەستپێكێكی قورس بوو، بەڵام وێڕای هەموو ئەو ئاستەنگانەش، حكومەتی هەرێمی كوردستان نەك هەر تەسلیمی ئەو واقیعە تاڵە نەبوو، بەڵكو بە گوڕوتینێكی تازەوە هاتەوە مەیدان و، بە دانانی بەردی بناخەی شەقامی 100 مەتریی سلێمانی دەرگای بۆ چەندین پڕۆژەی گەورە كردەوە و، ئێستا بە شێوەیەكی مەیدانی ڕۆژانە پڕۆژەی گەورە و ستراتیژی دەكرێنەوە و بەردی بناغەیان بۆ دانرێت، مانای ئەوەیە وەك مسرور بارزانی لە ڕێوڕەسمی دەرچوونی لاوانی زانكۆی كوردستاندا ئاماژەی پێ كرد و جەختی لەسەر كردەوە، كوردستان بەرەو ئەوە هەنگاو دەنێت كە ببێتە گەورەترین شوێنی بزنێس و بازرگانی و پیشەسازی لە عێراق و ناوچەكەشدا.