ئەمڕۆ یەكشەممە نێچیرڤان بارزانى سەرۆكی هەرێمی كوردستان، بۆ يادى مه‌ولوودى پێغه‌مبه‌ر (د.خ) پەیامێكی پیرۆزبایی بڵاوكردەوە.

لە پەیامەكەی سەرۆكی هەرێمی كوردستاندا هاتووە "له‌ يادى له‌دايكبوونى پێشه‌وا و پێغه‌مبه‌رى مه‌زنى ئيسلامدا، حه‌زره‌تى محه‌ممه‌د دروودى خواى له‌سه‌ر بێت، گه‌رمترين پيرۆزبايى له‌ هه‌موو موسڵمانان له‌ كوردستان، عێراق و ته‌واوى جيهان و مرۆڤايه‌تى ده‌كه‌م. ‌ هيوادارم ئه‌م ياده پيرۆزه‌ خێر و خۆشى و ئاسووده‌يى بۆ ته‌واوى مرۆڤايه‌تى له‌گه‌ڵ خۆيدا بهێنێت و ببێته‌ هانده‌رێك بۆ هه‌مووان كه‌ گيانى خۆشه‌ويستى و ئاشته‌وايى و ميهره‌بانى له‌ناو خۆمان و ده‌وروبه‌ر و هه‌مووماندا پته‌وتر بكات".

هەروەها دەڵێ "با له‌م ياده‌دا چاكه‌ و مرۆڤايه‌تى و په‌يره‌وكردنى په‌يامى ئاشتيخوازانه‌ و مرۆڤدۆستى و مرۆڤپه‌روه‌ريى حه‌زره‌تى پێغه‌مبه‌ر كۆمانبكاته‌وه‌ و هه‌موومان له‌سه‌ر بنه‌ماى ڕێنمايى و ئامۆژگارى و به‌ها باڵاكانى، بۆ پێکه‌وه‌ژیان و لێبورده‌یی و بۆ ئێستا و داهاتوويه‌كى باشترى مرۆڤايه‌تى كار بكه‌ين. ئه‌م ياده‌ له‌ هه‌موو لايه‌ك پيرۆز بێت و هه‌موو ساڵێك به‌ خێر و خۆشى".