فەرەنسا کۆنسۆڵی نوێی وڵاتەكەی لە كوردستان دەستنیشاندەكات
ئەو مەراسیمە، بە ئامادەبوونی نوێنەرانی وەزارەتی دەرەوەی فەرەنسا و نوێنەری كۆمانیایی تۆتال و ژمارەیەكی زۆری كوردانی دانیشتووی فەرەنسا و نوێنەرانی حزب و دامودەزگاكانی فەرەنسی و چەندین كەسایەتی سیاسی و رۆشنبیر لە بارەگای نوێنەرایتیی كورد لە فەرەنسا بەرێوەچوو.
لە سەرەتادا خەمان زرار نوێنەری حكومەتی هەرێمی كوردستان لە فەرەنسا، پیرۆزبایی لە ئالان گیپرات وەك کۆنسۆڵی نوێی فەرەنسا لە هەولێر كرد و هیوای خواست چۆن فەرەنسا لەكاتە ناخۆش و دژوارەكاندا هاوكاریی خەڵكی كوردستان بووە، بەتایبەت لە پاش رووخانی رژێمی پێشوو و ئەو گۆِرانەی بەسەر عێراقدا هات كە دانپێنان بە كوردستان وەك هەرێمێكی فیدراڵ و خاوەن دەزگا وكۆمەڵێك ماف لە دەستوری نوێی عراقدا لەلایەن فەرەنسا پاڵپشتێكی گەوەری گەلی كورد بوو.
خەمان زرار، گوتی: فەرەنسا لە سەرەتای ئەو وڵاتانە بوو كە کۆنسۆڵییەی خۆی بە فەرمی لە كوردستان كردەوە و فرێدریك تیسۆ لە ساڵی ٢٠٠٨وەك دۆستیێكی میللەتی كورد و یەكەم کۆنسۆڵی فەرەنسا دەست بەكار بوو. هیوادارین لەسەردەمی کۆنسۆڵی نوێشدا پەیوەندییەكان بەرەو پێشتر بچن.
ئالان گیپرات، کۆنسۆڵی نوێ ر سوپاسی نوێنەرایەتی حكومەتی هەرێمی كوردستانی كرد بۆ ئەم دەرفەتە تا لە نزیكەوە رەوەندی كوردی لە فەرەنسا بناسێت و بەڵێنیشیدا لە پەرەپێدان و پێشخستنی پەیوەندییەكاندا هاوكارێكی باش بێت.
کۆنسۆڵی نوێی فەرەنسا، هه‌وه‌ها گوتی: هەروەك لە ساڵی رابردوودا دوای سەركەوتنی كۆنفراسی ئابووری، ئەمساڵیش لە چەند مانگی داهاتوودا شاندێكی گەورەی ئابووری و سیاسی دێته هه‌رێمی کوردستان، تا لە تەك كۆمپانیا فەرەنسیەكانی تر زیاتر بۆ وەبەرهێنان لە هەرێمی كوردستان هانبدرێن.
کۆنسۆڵی نوێی فەرەنسا لە هەرێمی كوردستان، له‌کۆتاییدا گوتی: بێگومان پەیوەندییەكانی تری وەك پەیوەندییە زانكۆییەكان و پەیوەندییە فەرهەنگی و كولتورییەكان لە نێوان هەرێمی كوردستان و فەرەنسادا، لە پێشەنگی كاری هاوبەشی نوێنەرایەتی و کۆنسۆڵی دەبن.
