نێچیرڤان بارزانى: دادوه‌رى و دادگاکانى هه‌رێم پێویستیان به پێداچوونه‌وه‌یه و ده‌بێ ده‌سه‌ڵاتى دادوه‌رى بێلایه‌ن و دوور له کاریگه‌ریى سیاسى بێت
له کۆبوونه‌وه‌که‌دا که هه‌ردوو وه‌زیرى داد و ناوخۆى حکوومه‌تى هه‌رێمى کوردستان و سه‌رۆکى داواکارى گشتى ئاماده‌ى بوون، ڕه‌وشى دادوه‌رى و ده‌سه‌ڵاتى دادوه‌رى و کاروبارى دادگاکانى هه‌رێمى کوردستان و دابینکردنى پێدوایستییه‌کان و چۆنیه‌تیى چاره‌سه‌رکردنى کێشه و گرفته‌کانى به‌رده‌م بوارى دادوه‌رى له هه‌رێمى کوردستان؛ گفتوگۆیه‌کى تێروته‌سه‌لى له‌باره‌وه کرا. هه‌روه‌ها چۆنیه‌تیى باشترکردنى کارى ده‌زگاکانى دادوه‌رى و دادگاکان خرایه به‌ر باس و ئه‌نجوومه‌نى دادوه‌رى داوایان له سه‌رۆکایه‌تیى حکوومه‌ت کرد پشتگیرى له به‌هێزکردنى دادگاکان و ده‌سه‌ڵاتى دادوه‌رى بکات.
له کۆبوونه‌وه‌که‌دا سه‌رۆکى حکوومه‌تى هه‌رێمى کوردستان ڕایگه‌یاند:\"به دڵنیاییه‌وه ڕه‌وشى دادوه‌رى و دادگاکان له هه‌رێمى کوردستان پێویستى به پێداچوونه‌وه هه‌یه و ئه‌م کۆبوونه‌وه‌یه‌شمان بۆ ئه‌وه‌یه چۆن بتوانین ده‌زگاى دادوه‌رى به شێوه‌یه‌ک ڕێکوپێک و بێلایه‌ن و کارا بکه‌ین که ببێته مایه‌ى ڕێزى هه‌موو لایه‌ک\"".
نێچیرڤان بارزانى هه‌روه‌ها هه‌موو پشتگیرییه‌کى حکوومه‌تى هه‌رێمى کوردستانى بۆ ده‌سه‌ڵاتى دادوه‌رى دووپات کرده‌وه و گوتى:\""به‌و په‌ڕى جددیه‌ته‌وه کار بۆ پشتگیریى ده‌سه‌ڵاتى دادوه‌رى ده‌که‌ین و ده‌بێ ده‌سه‌ڵاتێکى دادوه‌ریى بێلایه‌ن و دوور له هه‌ر کاریگه‌رییه‌کى سیاسى له هه‌رێمى کوردستان هه‌بێت، به هیچ شێوه‌یه‌کیش نابێ له هیچ لایه‌نێکه‌وه ده‌ست بخرێته کاروبارى دادگاکان و ده‌سه‌ڵاتى دادوه‌رییه‌وه، چونکه بنه‌ماى هه‌ر وڵاتێک سه‌روه‌ریى یاسا و ڕێکوپێکیى دادگاکان و ده‌سه‌ڵاتى دادوه‌رى یه\"".
هه‌ر له کۆبوونه‌وه‌که‌دا، سه‌رۆکى حکوومه‌تى هه‌رێمى کوردستان پشتگیریى حکوومه‌تى له کردنه‌وه‌ى په‌یمانگه‌ى دادوه‌رى له هه‌رێمى کوردستان و هه‌موارکردنه‌وه‌ى یاساى دادوه‌رى ده‌ربڕى و ڕه‌زامه‌ندیشى له سه‌ر چه‌ند داواکارییه‌کى ئه‌نجوومه‌نى دادوه‌ریى هه‌رێمى کوردستان نیشان دا، وه‌ک دروستکردنى بیناى ئه‌نجوومه‌نى دادوه‌رى و بیناى دادگاى پێداچوونه‌وه له گه‌رمیان، پیره‌مه‌گروون، سۆران و ئامێدى دامه‌زراندنى کارمه‌ند و فه‌رمانبه‌رى پێویست بۆ ئه‌م دادگایانه. هه‌روه‌ها بڕیار درا ڕێکخه‌رێک بۆ په‌یوه‌ندیى نێوان سه‌رۆکایه‌تیى ئه‌نجوومه‌نى وه‌زیران و ئه‌نجوومه‌نى دادوه‌ریى هه‌رێمى کودستان ده‌ستنیشان بکرێت."
