ئەنجوومەنی نیشتمانیی بەرهەڵستكاری سووریا لە كۆبوونەوەی ئێوارەی دوێنێ شەموو لە ئیستەنبوڵ، عەبدولباست سەیدا چالاكی سیاسیی كوردی بۆ جێگرتنەوەی بورهان غەلیوون وەك سەرۆكی ئەنجوومەنەكە هەڵبژارد.
بەپێی بەیاننامەیەكی ئەنجوومەنەكە، دوای لێدوانی ژمارەیەك لە بەرپرسانی ئەنجوومەنەكە كە لایەنی ئیسلامی و لیبرال و سەربەخۆكان لەخۆ دەگرێ، لەبارەی گەیشتن بە تەوافوق، عەبدولباست سەیدا ئەندامی نووسینگەی جێبەجێكاری ئەنجوومەنەكە وەك سەرۆكی ئەنجوومەن هەڵبژێردرا.

لە كۆبوونەوەی 33 ئەندامی ئەمینداریەتیی ئەنجوومەنەكەدا، سەیدا تاكە پاڵاوك بوو و پێشتر سەرۆكایەتیی نووسینگەی مافی مرۆڤی لە ئەنجوومەنەكە دەكرد، سەیدا لە 1956 لە شاری عاموودا لەدایك بووە و خاوەنی بڕوانامەی دكتۆرایە لە فەلسەفە و سەر بەهیچ پارتێكی سیاسی نییە و لە سوێد دادەنیشێ.

دوای هەڵبژاردنی بە سەرۆكی ئەنجوومەنەكە سەیەدا گوتی، ئێستە كار بۆ رێكخستنەوەی ناوماڵ و یەكخستنی هەوڵەكان دەكەین و دووپاتی لە هاوئاهەنگی لەگەڵ هێزەكانی تری بەرهەڵستكار كردەوە و ئاماژەی كرد، كاری لەپێشینەمان فرەوانكردنی ئەنجوومەنەكە و ئەنجامدانی وتوێژە لەگەڵ كەسایەتییە بەرهەڵستكارەكان بۆ هاتنە ناو ئەنجوومەنەكەیە، كە هەندێك كەس بە كۆنترۆڵكردنی لەلایەن ئیسلامییەكانەوە تۆمەتباری دەكەن.

ئەنجوومەنی نیشتمانیی بەرهەڵستكاری سووریا لە سەرەتای تشرینی یەكەم/ئۆكتۆبەری رابردوو هاتە دامەزراندن و لە گرووپەكانی، ئیخوان موسلمین و راگەیاندنی دیمەشق بۆ گۆڕانكاریی دیموكراسی و سەربەخۆكان پێك هاتبوو، هاوكات پارتە كوردییەكان ئەندامەتیی خۆیان هەڵپەسارد و ئەنجوومەنی نیشتمانی كوردی سووریایان دامەزراند.




ئاكانیوز