فازل میرانی سكرتێری مهكتهبی سیاسی (پ.د.ك) لهگهڵ شاندی پهرلهمانی سوید كۆبووهوه
د رونشتنهكێ ده كو ئهندامێن مهكتهبا سیاسى و جڤاتا سهركردایهتى و مهكتهبا تێكلى یێن دهرڤه یا پارتیا دهمۆكراتا كوردستانێ ئامادهبوون؛ میرانى باسا دیرۆكا پارتیا دهمۆكراتا كوردستانێ ل سالا ههزار و نههسهد و شێست و چارێ تا نها كر ب تایبهت پشتى سهرهلدانا سالا 1991 كو دهرفهتهك ژبۆ كوردان چێبوو بخوه ئیدارهیا باژێر و باژێركێن ژێر دهستهلاتا خوه بكه و كار ژبۆ پراكتیزهكرنا دهمۆكراسیێ ل دهڤهرێ بكه و گۆت ئهم شانازیێ ب وێ یهكێ دكین كو پارتى ل دهستپێكا ئاڤاكرنێ تا نها ههموو تهخ و جون و ئۆل و نهتهوه تێدهنه و تهكهزێ لسهر وێ یهكێ دكین كو بێتر بكهڤین ناڤا جهماوهر ب تایبهت ژبۆ گارانتیكرنا مافێن لاوان و ئافرهتان داكو بكارن بێتر پێشده بچن د ناڤا جڤاكا كوردى ده.
بال كشانده سهر وێ یهكێ ژى كو پارتیا دهمۆكراتا كوردستانێ و سهرۆكاتیا وێ ههموو ههول و كارینێن خوه ژبۆ گارانتیكرنا ئاسایش و سهروهریا یاسایێ و پێشدهبرنا دهمۆكراسیێ ل ئیراقا فهدهرال ب تایبهت ل ههرێما كوردستانێ؛ بكارتینه. ژبال خوه ڤه فریدریك مالم ب ناڤێ خوه و شاندا پارلهمێنتارێن سوێدێ ئامادهییا خوه یا ههر ئاواكى هاریكاریێ ژبۆ سهرخستنا دۆزا گهلێ كورد دیاركر و ب ئاواكى د ههموو وارێن جڤاكى و پهروهردهیى ده ل ههرێما كوردستانێ هاریكار بن و حیبهتیا خوه ژى ب پێشكهتن و تهناهیا ئاسایشا ههرێما كوردستانێ دیاركر و خویاكر كو دڤێ ههموو ئالى هاریكار و پشتگیرێن پێشخستنا ڤان بدهستخستی یێن مهزن بن.
پشتره ئهندامێن پارلهمێنتا سوێدێ هن پرسیار ل فازل میرانى كرن و میرانى ژى تهڤى بهرسڤدانا پرسێن وان؛ ههروهها بال كشاند سهر ههولێن برێز نێچیرڤان بارزانى ژبۆ ئاڤاكرنا كابینهتا نوو یا هوكوومهتا ههرێما كوردستانێ كو كهساتیهك سیاسیێ لاو و خوهدى كارین و خوهدى ئازموونه د ڤى وارى ده.