سه‌رۆكی هه‌رێمی كوردستان پێشوازی له باڵیۆزی ئوسترالیا له عیراق ده‌كات
له دیدارێكدا كه هه‌ڤال ده‌سكۆ عه‌زیز نوێنه‌ری حكومه‌تی هه‌رێم له ئوسترالیا ئاماده‌ی بوو ، خاتوو لیندال ساكس وێرای خۆشحاڵی ده‌ربڕین به سه‌ردانی هه‌رێمی كوردستان رایگه‌یاند كه مه‌به‌ست له سه‌ردانه‌كه‌ی بۆ ئه‌وه‌یه له نزیكه‌وه ئاشنای ره‌وشی هه‌رێم بێت و ، پشتگیری ته‌واوی وڵاته‌كه‌شی له عیراقێكی دیموكرات دووپاتكرده‌وه و ستایشی پێشووه‌چوونه‌كانی هه‌رێمی كوردستانی كرد له گشت بواره‌كاندا و ئاماده‌یی وڵاته‌كه‌شی ده‌ربڕی له هاریكاركردنی هه‌رێمی كوردستان له بواره‌كانی كشتوكاڵ و په‌روه‌رده و خوێندنی باڵا و پیشه‌سازی و راهێنانی كارمه‌ندانی حكومه‌تی هه‌رێم و رایگه‌یاند كه هه‌ر چۆن وڵاتی ئوسترالیا هاوسۆز بووه له‌گه‌ڵ نه‌هامه‌تیه‌كانی گه‌لی كوردستان و عیراق ، هه‌روا هاوسۆزه له یارمه‌تیدانیان له ڕووی گه‌شه‌پێكردنیان و هاریكاری كردنیان له بنیاتنانه‌وه‌ی ژێرخانی ئابووری .
سه‌رۆك بارزانی ، وێرای سوپاسكردن و به‌رزنرخاندنی رۆڵی كاریگه‌ری ئوسترالیا له رزگاركردنی عیراق ، تیشكی خسته سه‌ر تێروانینه‌كانی حكومه‌تی هه‌رێم سه‌باره‌ت به گه‌شه‌پێدانی هه‌رێم و رۆڵی ئه‌و وڵاته له هاریكاریكردنی و داوای كرد كه وڵاتی ئوسترالیا ده‌توانێ له رێی كۆمپانیاكانیه‌وه هاریكار بێت له ئه‌نجامدانی پرۆژه‌ی بازرگانی و وه‌به‌رهێنان و ئاماده‌یی هه‌رێمیشی ده‌ربڕی له پێشكه‌شكردنی ئاسانكاری پێویست.
تاوتووێكردنی په‌یوه‌ندییه‌كانی نێوان هه‌رێم و حكومه‌تی فیدراڵ ته‌وه‌رێكی دیكه‌ی دیداره‌كه بوو.
