سه‌رۆكی په‌رله‌مان له وه‌زاره‌تی ده‌ره‌وه‌ی ئەمەریكا باسی لە پاڵپشتی ئەو وڵاتە بۆ جێبەجێكردنی مادەی 140 كرد
پاشان له‌دانیشتنێكدا باس له‌بارودۆخى ئێستاى هه‌رێمى كوردستان و عیراق كرا و تیشك خرایه سه‌ر به‌هارى عه‌ره‌بی و پێشبینى ئاینده‌ى ئه‌و رووداوه نوێیه له‌ناوچه‌كه و كاریگه‌رى ناوخۆی عیراق له‌سه‌ر ره‌وتى رووداوه‌كان خرایه به‌رباس و گفتوگۆ.
هاوكات تیشك خرایه سه‌ر بۆردومان و تۆپبارانى ناوچه سنوریه‌كانى هه‌رێمى كوردستان له‌لایه‌ن فرۆكه جه‌نگیه‌كانى ده‌وڵه‌تى توركیا و تۆپخانه‌كانى كۆمارى ئیسلامى ئێران و هه‌روه‌ها باس له كێشه هه‌ڵپه‌سێراوه‌كانى نێوان حكومه‌تى ئیتیحادى و هه‌رێمى كوردستان كرا و سه‌رۆكى په‌رله‌مانى كوردستان زۆر به‌وردی تیشكى خسته سه‌ر ماده‌ى 140 و چۆنیه‌تى و گرنگیى جێبه‌جێ كردنى و تا ئێستا چ قۆناغێكى بڕیوه، هه‌روه‌ها كێشه‌كانى یاساى نه‌وت و غاز و ئه‌نجومه‌نى ئیتیحادى و كێشه‌ى پێشمه‌رگه ورۆڵى پێشمه‌رگه له‌ناوچه كێشه له‌سه‌ره‌كان به تایبه‌تى خانه‌قین و مه‌نده‌لى و گرنگى پابه‌ندبوون به جێبه‌جێ كردنى ماده‌كانى ده‌ستورى عیراق گفتوگۆى له‌باره‌وه كراو تیشك خرایه سه‌ر بارودۆخى ئه‌منى هه‌رێمى كوردستان و گشت عیراق.
هه‌ر له‌دیداره‌كه‌دا شه‌ڕى قاعیده و ئه‌نساروئه‌لئیسلام و ئه‌وانه‌ى نایانه‌وێ دیموكراتیه‌ت و فیدرالیه‌ت له‌عیراقى ئیتیحادى هه‌بێ، به‌ڵكو مه‌به‌ستیانه عیراقى فیدراڵ بۆ سه‌ده‌كانى ناوه‌راست بگه‌ڕێته‌وه، خرایه به‌ر گفتوگۆو بیروبۆچوون له‌باره‌ى چۆنیه‌تى مانه‌وه‌ى هێزه‌كانى ئه‌مه‌ریكا له‌عیراق و ژماره‌ى هێزه‌كانى ئه‌مه‌ریكا ئه‌وانه‌ى ده‌مێننه‌وه چ ژماره‌یه‌ك بن و له‌ژێر چ چه‌ترێكى یاسایی بن، باسیان له‌باره‌وه كرا.
هه‌روه‌ها سه‌رۆكى په‌رله‌مانى كوردستان تیشكى خسته سه‌ر كێشه هه‌ڵپه‌سێراوه‌كانى نێوان به‌غدا و هه‌ولێر كه گه‌یشتۆته چ راده‌یه‌ك و ته‌ئكیدى كرده‌وه كه ئێستا پێویستى به چاره‌سه‌رى جیددى و عه‌مه‌لى هه‌یه.
هه‌روه‌ها باس له‌رۆلى ئه‌مه‌ریكا و پاڵپشتى بۆ جێبه‌جێ كردنى ماده ده‌ستوریه‌كان به‌گشتى كرایه‌وه به‌تایبه‌ت ماده‌ى 140 كه به‌ر له‌ئه‌نجامدانى هه‌ڵبژاردن كۆشكى سپى راگه‌ێنراوێكى له‌باره‌وه بڵاوكرده‌وه،
له‌لایه‌ن خۆشیانه‌وه سه‌رۆكى به‌شی عیراق و پسپۆر و شاره‌زایانى كاروبارى عیراق له‌وه‌زاره‌تى ده‌ره‌وه‌ى ئه‌مه‌ریكا دووپاتیان كرده‌وه بۆ پشتیوانى پرۆسه‌ى دیموكراسیی و جێبه‌جێ كردنى ماده‌كانى ده‌ستورى هه‌میشه‌یى عیراق به گشتى خۆشحاڵى و سه‌رسوڕمانى خۆیان به كار و هه‌وڵه‌كانى هه‌رێمى كوردستان كه بۆ چه‌سپاندنى دیموكراتیه‌ت ئه‌نجام ده‌درێت ده‌ربڕى.
سه‌ردانى بانكى نێوده‌وڵه‌تی كرد
هه‌مان رۆژ 25/9/2011 دكتۆر كه‌مال كه‌ركوكى سه‌رۆكى په‌رله‌مانى كوردستان و شاندى یاوه‌رى، سه‌ردانى بانكى نێوده‌وڵه‌تییان كرد و له‌لایه‌ن سید فرانك به‌رێوه‌به‌رى پرۆگرامى رۆژهه‌ڵاتى ناوه‌راست و په‌ره‌پێدانى كۆمه‌ڵایه‌تى و پلاندانانى بیناسازى و احمد حسین به‌رێوه‌به‌رى پرۆگرامى ئاسیا له‌په‌ره‌پێدانى كۆمه‌ڵایه‌تى به‌گه‌رمى پێشوازى كران.
له‌دیدارێكدا گفتوگۆ له‌سه‌ر دانانى به‌رنامه‌ى گه‌شه‌پێدان و په‌ره‌پێدان له هه‌رێمى كوردستان كرا.
دكتۆر كه‌مال كه‌ركوكى سه‌رۆكى په‌رله‌مانى كوردستان تیشكى خسته سه‌ر ئه‌و خاڵه گرنگانه‌ى كه ده‌بێت له كاتى جێبه‌جێ كردنى پلانى به‌رنامه‌ى گه‌شه‌پێدان جێبه‌جێ بكرێن و زۆریش گرنگ و پێویسته له‌گه‌ڵ حكومه‌تى هه‌رێمى كوردستان و حكومه‌ته خۆجێیه‌كان هه‌ماهه‌نگى بكرێت بۆ جێبه‌جێ كردنى پلانى دارێژراوو ئه‌و كه‌رتانه‌ى له هه‌رێمى كوردستان كه زۆر پێویستیان به خزمه‌تگوزارى هه‌یه خرانه به‌ر گفتوگۆ بۆ ئه‌وه‌ى ئیداره‌ى پرۆژه‌كان به‌رێكوپێكى بكرێ و ئامانجى دیار بێ و پاره‌كانیش بزر نه‌بن.
وه‌ك بریاریشه تیمێكى كارى پرۆگرامى رۆژهه‌ڵاتى ناوه‌راست له‌مانگى تشرینى دووه‌مى دادێ سه‌ردانى هه‌رێمى كوردستان بكه‌ن و له‌گه‌ڵ وه‌زاره‌تى پلاندانان و لایه‌نه په‌یوه‌نداره‌كان ده‌ست به كار بن.
سه‌نته‌رى میدیاى نیشتمانى ئه‌مه‌ریكى به‌سه‌ركرده‌وه
سه‌نته‌رى میدیاى نیشتمانى ئه‌مه‌ریكى وێستگه‌یه‌كى سه‌ردانه‌كه‌ى سه‌رۆكى په‌رله‌مانى كوردستان و شاندى یاوه‌رى بوو به‌گه‌رمى له‌لایه‌ن به‌رپرسانى ئه‌و سه‌نته‌ره پێشوازى كران.
له‌دیدارێكدا دكتۆر كه‌مال كه‌ركوكى سه‌رۆكى په‌رله‌مانى كوردستان پوخته‌یه‌كى له‌باره‌ى بارودۆخى هه‌رێمى كوردستان و عیراق و رۆژهه‌ڵاتى ناوه‌راست خسته ڕوو، تیشكى خسته سه‌ر تۆپباران و بۆردومانى ناوچه سنوریه‌كانى هه‌رێمى كوردستان له‌لایه‌ن تۆپخانه‌كانى كۆمارى ئیسلامى ئێران و فرۆكه جه‌نگیه‌كانى كۆمارى توركیا و باسی له‌و كێشه هه‌ڵپه‌سێراوانه كرد كه له‌نێوان هه‌رێمى كوردستان و عیراق ماونه‌ته‌وه‌و بۆچونه‌كانى بۆ چاره‌سه‌ركردنیان خسته روو، هاوكات پوخته‌یه‌كى له‌باره‌ى په‌رله‌مانى كوردستان و پێكهاته‌كانى و چۆنیه‌تى كاره‌كانى خسته ڕوو تیشك خرایه سه‌ر گرنگى هه‌ڵبژاردن له هه‌رێمى كوردستان و ئه‌نجامدانى سه‌ر ژمێرى له‌گشت عیراق.
