ئه‌مرۆ له‌ ئیتاڵیاوه‌ به‌رێز مه‌سعوود بارزانی سه‌رۆكی هه‌رێمی كوردستان په‌یوه‌ندییه‌كی ته‌له‌فۆنی له‌ جۆبایدن جێگری سه‌رۆكی ئه‌مه‌ریكاوه‌ پێگه‌یشت ، له‌م په‌یوه‌ندییه‌ ته‌له‌فۆنییه‌دا ره‌وشی گشتی عێراق و په‌ره‌سه‌ندنه‌كانی پێكهێنانی حكومه‌تی نوێی عێراقی فیدراڵیان شیكرده‌وه‌ ، له‌مرووه‌شه‌وه‌ هه‌ریه‌ك له‌سه‌رۆك بارزانی و جێگری سه‌رۆكی ئه‌مه‌ریكا نیگه‌رانیی خۆیان له‌دواكه‌وتنی پێكهێنانی حكومه‌تی عێراق نیشاندا و ئاسته‌نگ و ته‌گه‌ره‌كانی به‌رده‌م پرۆسه‌كه‌شیان روونكرده‌وه‌.

سه‌باره‌ت به‌ وتووێژ و راگۆرینه‌وه‌ی لایه‌نه‌كانیش ، قۆناغ و ئاكامی دانوستان و وتووێژی لایه‌نه‌ عێراقییه‌كانیان بۆ پێكهێنانی حكومه‌ت هه‌ڵسه‌نگاند.

له‌مباره‌یه‌شه‌وه‌ جۆ بایدن جێگری سه‌رۆكی ئه‌مه‌ریكا ده‌ستپێشخه‌رییه‌كه‌ی سه‌رۆك بارزانی بۆ رزگاركردنی عێراق له‌م قه‌یران و ئاڵۆزییه‌ی تێیكه‌وتووه‌ به‌گرنگ له‌قه‌ڵه‌مدا و داواشی له‌سه‌رۆك بارزانی كرد كه‌ ئه‌و ده‌ستپێشخه‌رییه‌ی خۆی چالاك بكات و بیخاته‌ گه‌ر .