بە یەك گەیشتن هۆكارێكی گەورەی گۆڕینەوەی ئەزموونەكانی مرۆڤایەتییە لە ڕووی كەلتوورییەوە، چونكە لە كاتێكدا لە ڕووی بیركارییەوە (یەك كۆ یەك دەكاتە دوو)، بەڵام لە ڕووی كەلتوورییەوە یەك كۆ یەك دەكاتە (سێ)، چونكە هەر یەكێك ئەزموونێكەو لە بە یەكگەیشتنی هەردوو ئەزموونەكەدا زۆرجار ڕێگەیەكی نوێ دێتەئاراوە، یان ڕێگەی سێیەم و ڕای سێیەم لە دایك دەبێت.
لە بەیەكگەیشتندا باشترینی هەردوولا و هەردوو بۆچوونەكان موتوربە دەكرێن، بۆیە زیادەڕەویمان نەكردووە ئەگەر بڵێین زانستی گواستنەوە و گەیاندن هۆكاری یەكەمی پێشكەوتنەكانە، چونكە مرۆڤ كە جووڵەی كرد ڕێگەی پێویستە، لە ڕێگەشدا كەند و كۆسپ هەیە، لێرەوە مرۆڤ پردی دروست كرد .
دروستكردنی پردەكان سەرەتایەك بوو بۆ پەڕینەوە بۆ ئەو بەر، بۆ جیهانێكی دی، بۆ ئەزموونێكی دی، بۆ بەیەك گەیشتن و بۆ لەیەك گەیشتن .
گواستنەوەی مرۆڤ چ بە پێ بووبێت، یان دواتر بە ئۆتۆمبێل و شەمەندەفەر و فڕۆكە و كەشتی، هۆكاری گەورە بوون لەم بوارەدا، گەیاندنیش لە داهێنانی تەلەفۆن، تەلەفزیۆن، ڕادیۆ، ئینتەرنێت، ڕۆژنامە، گۆڤار، سایتی ئەلكترۆنی، ئیمێل، مۆبایل، كورتەنامە، ئێم ئێم ئێس و ڤیدیۆ كۆنفرانس و تۆڕە كۆمەڵایەتییەكان و.. تاد، هەموو ئەمانە پردی نوێ بوون بۆ بەیەكگەیشتن لە پێناو لەیەكگەیشتندا .
پرد. لە مەترسیی كەند و دۆڵەكان دەمانپارێزێت، لە كەمكردنەوەی كاتی بەفیڕۆدراودا یارمەتیمان دەدات، لە كۆكردنەوەی تواناكان و گۆڕینەوەی ئەزموونەكانیشدا هاوكاریمان دەكات.
پردەكان. پڕكردنەوەی بۆشاییەكانن، نەهێشتنی كۆسپ و كەندەكانن، پەڕینەوەن بە سەر ڕووبار و ئاوەكاندا و، نەهێشتنی دیاردەی دابڕانن. لە هاتۆچۆشدا بەرزەپردەكان مایەی سەلامەتی و بەریەك نەكەوتن و خێراتر بوونی هاتوچۆن. گەشتە ئاسایی و گەشتە زانستییەكانیش پردی گۆڕینەوە و بەدەستهێنانی شتی تازەن، ڕێك وەك ئەوەی ڕۆژهەڵاتناسەكان كە پەڕینەوە ئەمبەر، شتی زۆریان زانی و ئەزموونی زۆر فێربوون. ئەمڕۆش ئێمە پێویستیمان بە جووڵەیە، جووڵەش ڕێگەی دەوێت، لە ڕێگەشدا پردێك، یان زیاتر پێویستن بۆ ئەوەی ڕێگە لە یەك دابڕاوەكان پێكەوە گرێ بدەن. لە ڕووی زەمانیشەوە ئەمڕۆیەكی گەش پێویستی بە پردێك هەیە لە نێوان ئەزموون و حیكمەتەكانی ڕابردوو، خەونەكانی ئایندەدا، دوور لە هەستیاری، دوور لە ترسان، دوور لە ڕق و كینە.
بۆ ناسینی هەر نەزانراوێك، یان نەناسراوێك، پەڕینەوە و بە یەك گەیشتنمان پێویستە، لێرەوە پرد وەك هۆكارێكە بۆ پەڕینەوە، دەرفەتێكیشە بۆ شتی نوێ و جیهانێكی نوێ.
ئێمە وەك كورد زۆرمان پێویستیی بە چەمكی پرد هەیە، چونكە لە ڕووی كەلتوورەوە چەندین ئەزموونی ناخۆشی مێژووییمان هەبووە، كە وایان لە پێشینانمان كردووە، پەندەكانیان رەنگدانەوەی ئەو ئەزموونانەیان بێت، وەك گوتوویانە: دووریی و دۆستی، ئەمە لە كاتێكدا زەحمەتە دۆستایەتی لە دوورەوە سەركەوتوو بێت.
هەروەها لە ڕووی ژینگەشەوە، ساڵانێكی زۆر لێكدابڕان هەبووە، بە هۆی بوونی كەند و رووبار و چیا و بەرز و نزمی و رێبەندانی بەفر و باران.
ئەمە سەرباری جۆرێك لە بوونی دابەشكردنی دووانەیی لە ئەقڵی كوردیدا، وەك یان حەڵاڵ، یان حەرام، یان كافر، یان موسڵمان، یان نیشتمانپەروەر، یان خائین، یان من، یان تۆ و.. هتد.
ئەمە جگە لەوەی ئێمە راستە زۆر تێكەڵین، بەڵام كەمتر تەباین، یەكدی زۆر دەبینین، بەڵام كەمتر گوێ لە یەكدی دەگرین.
زۆرجار بەو لۆژیكە كار دەكەین كە دەڵێت: كاتێك خۆم هەموو شتێكم هەیە، یان كە خۆم هەموو شتێك دەزانم، چ پێویستییەكەم بە ئەوی دی هەیە؟! زۆر جاریش لەو كەلتوورەدا ڕۆدەچین كە فێری نەكردین دان بە هەڵەكانی خۆماندا بنێین، چونكە تەنها فێری ئەوە بووین كە بڵێین: خەتا خڕە، بە سەر كەسەوە ناوەستێت، یان پیاو ئەو پیاوەیە كە لە قسەی خۆی پەشیمان نەبێتەوە، یان سواربوون عەیبێك و دابەزین دوو عەیبە!
كەواتە ئێستا چی بكەین بۆ بەهێزكردنی كەلتووری پرد بونیادنان و بەیەكگەیشتن؟
یەكەم: هەوڵدان بە دوای میكانیزمێك بۆ دۆزینەوەی رێگەی سێیەم كە زۆربەی كات نزیكمان دەكاتەوە لە چارەسەر، چونكە سیاسەت زۆرجار پێویستیی بە چەمكی كۆمپڕۆمایز و نێوانیی هەیە، ئەمەش بە هۆی پردی بەیەكگەیشتنەوە دەبێت، چونكە لە بەیەكگەیشتندا باشترینی هەردوولا و هەردوو بۆچوونەكان موتوربە دەكرێن و رای سێیەم دێتەئاراوە.
دووەم: كاركردن بە بنەمای: بەیەكگەیشتن بۆ لەیەكگەیشتن، چونكە هەمیشە دابڕانی بەردەوام وێنەی ناڕاستمان پێدەدەن، بۆیە لە كاتێكدا تەكنۆلۆژیا جیهانێكی گەورەی بچووك كردۆتەوە، نابێت ماڵێكی بچووكیشمان لێ گەورە بكاتەوە و لە یەكدیمان داببڕێت.