دوژمنان یه‌كریزی خاك و نه‌ته‌وه‌یان كردۆته ئامانج ..
رێبوار حەمەلاو شوانی
گه‌لی كورد خاوه‌ن دۆزێكی ره‌وایه و ده‌یان ساڵه خه‌بات و تێكۆشان ده‌كات و قوربانی بۆ ده‌به‌خشی ، به درێژایی مێژوو رووبه‌رووی پیلانگێری و مه‌ترسی گه‌وره بۆته‌وه، به‌ڵام خۆراگری ،قوربانیدان و سیاسه‌تی ژیرانه‌ی سه‌ركردایه‌تی سیاسی گه‌لی كوردو به‌تاییه‌ت سه‌رۆك بارزانی وایكردووه كه كورد خاوه‌ن پێگه‌یه‌كی به‌هێز و متمانه‌بێ له سه ر ئاستی ناوچه‌كه و جیهان حیسابی بۆ بكرێ.
بێگومان جوگرافیا و هێز و سنووری ده‌ستكردی دیاریكراو زۆر هۆكاری تر، ئه‌گه‌رچی له‌چه‌ند ساڵی ڕابردوو زۆر هه‌وڵی كاڵكردنه‌وه‌یان دراوه، به‌ڵام هێشتا بوونیان هه‌یه ئه‌مه ڕاستییه‌كه ده‌بێت بۆهه‌موو ئه‌گه‌رێك و پێشهاتێك ره‌چاوی بكه‌ین و به‌رله‌هه‌ر هه‌نگاوێك ئه‌وه وه‌بیرخۆمان بهێنینه‌وه كه‌هه‌رێمی كوردستان هێشتا له‌قۆناغێكدایه حیسابی و ورد و جددی له‌سه‌ر كاروكاردانه‌وه‌كانی بكرێت ئه‌گه‌رنا كۆی پرۆسه‌ی سیاسی، كه به‌رهه‌می خوێنی هه‌زاران شه‌هید و ڕۆڵه‌ی نه‌ته‌وه‌مانه، به‌و ئاسانییه بینا ناكرێته‌وه.
هه‌مووان ئه‌و راستییه ده‌زانن، چ له‌ناوخۆ و ده‌ره‌وه و له‌ئاستی وڵاتانی زلهێز، هیچ هه‌نگاوێك به‌كرده‌یی جێبه‌جێ نابێت به‌بێ یه‌كڕیزی و یه‌كگوتاری، ئه‌مه حه‌قیقه‌تی پرۆسه‌ی سیاسیی هه‌رێمی كوردستانه. چونكه هه‌رێم به‌رهه‌می خه‌بات و خۆراگریی خه‌ڵكی كوردستانه له‌قۆناغه جیاجیاكاندا. ئه‌م خه‌ڵكه به‌خۆراگریی خۆی توانی ئه‌م واقعه دروست بكات، ئه‌م هه‌رێمه ئێستا له‌ناوچه‌كه و له‌جیهاندا خاوه‌ن پێگه‌ی خۆیه‌تی، بۆیه هه‌ركه‌سێك یان هه‌ر رۆشنبیرێك یاهه‌ر سیاسه‌تمه‌دارێك و شرۆڤه‌كارێك ئه‌گه‌ر په‌رۆشی دۆخی سیاسیی هه‌رێم بێت، ده‌بێ به وردی له‌م قۆناغه بڕوانێت،بێگومان ئه‌و را و بۆچوونانه‌ی كه ده‌خرێنه ڕوو ره‌نگدانه‌وه‌ی واقعه‌كه‌بن. له‌م پێودانگه‌وه، ئه‌گه‌ر هاوكاری و ئازادیی سیاسی و پرۆژه‌ی حكوومه‌ت نه‌بوایه، له‌دروستكردنی ئه‌و فه‌زاسیاسی و ئیقلیمی و نێونه‌ته‌وه‌ییه، ئه‌وا نه‌ده‌تواندرا قورسترین و سه‌ختترین به‌رگریی نه‌ته‌وه‌یی بكه‌ین. لای هه‌مووان ڕوونه، قه‌یرانی سیاسی و مه‌زهه‌بی عێراق، تادێت قووڵترده‌بێت و ئاڵۆزترده‌كرێت.
ئه‌م قه‌یرانه ریشه‌یه‌كی قووڵ و فره‌لایه‌نی هه‌یه له‌كۆی سیسته‌می سیاسی و مه‌زهه‌بییه،له‌م رووه‌وه هه‌ستیاریی دۆخه‌كه واده‌خوازێ، هه‌رێم خاوه‌نی ناوه‌ندێكی به‌هێزی بڕیارده‌ربێ، پێویسته له‌به‌ر رۆشنایی ئه‌م واقعه نوێیه‌ی هه‌رێمی كوردستاندا ئه‌ركه هه‌نووكه‌ییه‌كان دیاری بكرین، ئاماده‌كاری زیاتر بۆ قۆزتنه‌وه‌ی ئه‌و ده‌رفه‌ته‌ی كه بۆخه‌ڵكی كوردستان هاتۆته‌پێش تێپه‌راندنی ئه‌م قۆناغه. دوژمنانی گه‌له‌كه‌مان هه‌موو هه‌وڵه‌كانیان خستۆته‌گه‌رٍ تا خه‌ڵكی كوردستان سه‌رقاڵی ململانێكانیان بكرێن، به‌ڵكو پێویستمان به‌به‌رچاه‌ڕوونییه‌كی باش و ئیراده‌یه‌كی نیشتمانی یه‌كگرتوو هه‌یه. به‌دڵنیاییه‌وه وه‌ك چۆن ئێستا ئه‌و ئارامی و سه‌قامگیرییه‌ی هه‌رێم، له عێراق و وڵاتانی ئیقلیم به‌هێزتره له‌ئاستی نێوده‌وڵه‌تی، بۆیه، دوژمنانی كوردستان ، له رابردوو و ئێستا گشت هه‌وڵه‌كانیان خستۆته‌گه‌ر تا یه‌كپارچه‌یی و یه‌كریزی كوردستان لاواز بكه‌ن و زیان به‌ر كیانی كوردستان بگه‌ێنن ، به‌ێ‌ڵام به‌خۆراگری و ته‌بایی نێوماڵمان گشت پیلانه‌كان تێكده‌شكێنن .
