لە وەڵامی لێدوانێکی سەرۆک بارزانی لەسەر داگیرکردنی کەرکوک لە لایەن حەشدی شەعبییەوە، عەلی حوسێنی وتەبێژی میحوەری باکووری حەشدی شەعبی دەڵێ: حەشدی شەعبی خەونی بارزانی بۆ درووستکردنی دەوڵەتی کوردی تێکشکاند، هەروەها دەڵێ: ئاشکرایە لای هەموان لە سەرەتای درووستبوونی حەشدی شەعبی بە فتوای مەرجەعیەتی باڵاوە، مەسعود بارزانی بەردەوام تۆمەت رووبەڕووی حەشدی شەعبی دەکات، چونکە حەشد بووە مایەی تێکدانی بیر و خەونەکانی لە رووی بنیاتنانی دەوڵەتەوە.
پێش هەموو شتێک درووستکردنی دەوڵەتی کوردی خەون نییە و خەونیش نابێ و هیچ هێزێکیش ناتوانێ ئەو خواستە رەوایە بکات بە خەون، ئەوە راستییەکە و دەیان ساڵە خەباتی بۆ دەکرێ و قوربانی بۆ دەدرێت، جگە لەوەش ئەوە حەشدی شەعبی نەبوو خەونی درووستکردنی دەوڵەتی تێکشکاند و ئەو خەونە بە هیچ هێزێک تێکناشکێندرێ و سەدام حوسێن و حزبی بەعس و ئەوانەی پیش ئەویش پێیان تێکنەشکێدرا و بە حەشدی شەعبی و ئەوانەی دوای ئەویش تێکناشکێندرێ، درووستکردنی دەوڵەتی کوردی خواستی نەتەوەیەکی ژێردەستەیە و درەنگ یان زوو هەر درووست دەکرێ، ئەوەی ئەو خەونەی بە شێوەیەکی کاتی تێکشکاند پیلانێکی هەرێمی و خیانەتی ناوخۆ بوو، بۆیە هەڵەیەکی گەورەیە کە عەلی حوسێنی وتەبێژی میحوەری باکووری حەشدی شەبێ پێیوابێ حەشدی شەعبی خەونی درووستکردنی دەوڵەتی کوردی تێکشکاندووە.