به‌رێوه‌به‌رى قوتابخانه‌ ته‌وه‌ری سه‌ركییه‌ له‌ پرۆسه‌ى كارگێڕى په‌روه‌رده‌یی

به‌رێوه‌به‌رى قوتابخانه‌ ته‌وه‌ری سه‌ركییه‌ له‌ پرۆسه‌ى كارگێڕى په‌روه‌رده‌یی

فه‌یله‌سوفی به‌ناوبانگى فه‌ره‌نسی مونتیسكو ده‌لێ" ئه‌گه‌ر ویستت ره‌وشتى یه‌كێك بزانی، ئه‌وا ده‌سه‌ڵاتى بخه‌ره‌ ژێر ده‌ست و ئینجا سه‌یری بكه‌ و بزانه‌ چۆن هه‌ڵسوكه‌وت ده‌كات".
به‌رێوه‌به‌رى قوتابخانه‌ ته‌وه‌ری سه‌ره‌كی و هه‌ره‌ گرنگه‌ له‌ پرۆسه‌ى كارگێڕى و په‌روه‌رده‌یی، له‌ هه‌مان كاتدا كۆله‌گه‌ و ئه‌ستونده‌ی به‌هێز و بنه‌ڕه‌تییه‌ له‌ هه‌ستانه‌وه‌ و گه‌شه‌پێدانى پرۆسه‌ى په‌روه‌رده‌ و فێركردن و كاریگه‌ری راسته‌وخۆ و ئه‌رێنى هه‌یه‌ له‌ سه‌ر ته‌واوى پرۆسه‌ى كارگێڕى و په‌روه‌رده‌یی له‌ قوتابخانه‌دا، كه‌ سه‌ركه‌وتن و سه‌رنه‌كه‌وتنی پرۆسه‌ى كارگێڕى په‌روه‌رده‌یی ده‌وه‌ستێته‌ سه‌ر به‌رێوه‌به‌رى قوتابخانه‌، بۆیه‌ هه‌ر كار به‌جێ هێنان و كار راپه‌ڕاندنى باش و رۆڵى سه‌ركه‌وتووی به‌رێوه‌به‌ر مه‌رجی سه‌ره‌كییه‌ له‌ سه‌ركه‌وتنى پرۆسه‌ى په‌روه‌رده‌ و كارگێڕى له‌ قوتابخانه‌دا، به‌ پێچه‌وانه‌شه‌وه‌ راسته‌ هه‌ر له‌به‌ر ئه‌وه‌شه‌ گوتویانه‌" به‌رێوه‌به‌رێكى سه‌ركه‌وتووم بدێ و قوتابخانه‌یه‌كى نموونه‌ییت ده‌ده‌مێ".
ئه‌لێره‌وه‌ گرنگه‌ وه‌زاره‌تى په‌روه‌رده‌ له‌ رێگاى لیژنه‌یه‌كى باڵاوه‌ سه‌رپه‌رشتى دانان و لادانى به‌رێوه‌به‌رى قوتابخانه‌كان بكات، چونكه‌ گرنگى و سه‌ركه‌وتنى كۆی پرۆسه‌ى په‌روه‌رده‌ و فێركردن به‌ ستراوه‌ته‌وه‌ به‌ سه‌ركه‌وتنى رۆڵى به‌رێوه‌به‌رى قوتابخانه‌كان، وه‌ زۆربه‌ى هه‌ره‌ زۆرى لێكۆلینه‌وه‌ و توێژینه‌وه‌ په‌روه‌رده‌ییه‌كان ده‌ریده‌خه‌ن كه‌ سه‌ركه‌وتنى پرۆسه‌ى په‌روه‌رده‌ و فێركردن له‌ قوتابخانه‌كان به‌ستراوه‌ته‌وه‌ به‌ سه‌ركه‌وتنى رۆڵى به‌رێوه‌به‌رى قوتابخانه‌ و به‌رپرسیاریه‌تى به‌رێوه‌به‌ر له‌ پرۆسه‌ى په‌روه‌رده‌، بۆیه‌ پێویسته‌ به‌ ووردی و به‌رپرسیاریه‌تى په‌روه‌رده‌یی چاودێری به‌رێوه‌به‌رى قوتابخانه‌كان بكرێت و كه‌سانى شاره‌زا و به‌ ئه‌زموون و دڵسۆز بكرێته‌ به‌رێوه‌به‌ر دوور له‌ بیركردنه‌وه‌ى كه‌سى و به‌رژه‌وه‌ندى كه‌سى و هه‌موو به‌رژه‌وه‌ندییه‌كى تر، به‌ڵكو تاكه‌ به‌رژه‌وه‌ندى ره‌چاو بكرێ به‌رژه‌وه‌ندی په‌روه‌رده‌ و فێركردنه‌ له‌ پرۆسه‌كه‌، بۆیه‌ گرنگه‌ له‌لایه‌ن په‌روه‌رده‌ى قه‌زاكان و به‌رێوه‌به‌رایه‌تى په‌روه‌رده‌یی گشتى پارێزگاكان پایه‌ی به‌رێوه‌به‌ر و یاریده‌ده‌رى قوتابخانه‌ به‌ تاله‌كان دیارى بكرێت و پالێوراوه‌كان(سیڤی) كه‌سى پێشكه‌ش بكه‌ن، هه‌روه‌ها تاقیكردنه‌وه‌ى پێشبڕكێ و چاوپێكه‌وتن رابگه‌یه‌نرێ بۆ نموونه‌ (سیڤی له‌ سه‌ر 40نمره‌ بێت، چاوپێكه‌وتن له‌سه‌ر 30نمره‌ بێت، تاقیكردنه‌وه‌ش له‌سه‌ر 30نمره‌ بێت) و له‌لایه‌ن لیژنه‌یه‌كى باڵا له‌ وه‌زاره‌تى په‌روه‌رده‌ سه‌رپه‌رشتى بكرێت و نوێنه‌رى په‌روه‌رده‌ی قه‌زا و پارێزگاكانیش له‌و لیژنه‌یه‌ بێت، هه‌ڵسه‌نگاندنى ساڵانه‌ى به‌رێوه‌به‌ر و كه‌سایه‌تى و كۆمه‌لێ پێوه‌رى په‌سند دابنرێ، تا بتوانین گرنگى و بایه‌خی زیاتری به‌ پایه‌ی به‌رێوه‌به‌رى قوتابخانه‌ بده‌ین، هه‌موو كه‌س نه‌بێته‌ به‌رێوه‌به‌ر و به‌رێوه‌به‌ره‌ دڵسۆز و چالاك و خۆنه‌ویسته‌كانیش نه‌هێلین ده‌ست به‌رداری به‌رێوه‌به‌رى قوتابخانه‌كان بن.
ئه‌گه‌ر قوتابی ئه‌مانه‌تى كۆمه‌ڵگه‌ بێت لای په‌روه‌رده‌ و په‌روه‌رده‌كاران، په‌روه‌رده‌ش به‌رپرسیاریه‌تییه‌كى مێژوویی و ره‌وشتى بێت، ئه‌وا پێویسته‌ هه‌موومان ئه‌وانه‌ى له‌ په‌روه‌رده‌ به‌رپرسیاریه‌تیمان هه‌یه‌ ده‌بێ هه‌وڵ بده‌ین به‌رێوه‌به‌ره‌ دڵسۆز و سه‌ركه‌وتوو ماندوونه‌ناسه‌كان گرنگى و بایه‌خیان پێ بده‌ین و هاوكارییان بكه‌ین و جیایان بكه‌ینه‌وه‌ له‌و به‌رێوه‌به‌رانه‌ى كه‌ به‌رده‌وام گله‌یی و سكالایان له‌ سه‌ر هه‌یه‌ له‌لایه‌ن قوتابیان و مامۆستایان و كه‌س وكاری قوتابیان و بگره‌ هه‌ندێ له‌ به‌رپرسانى په‌روه‌رده‌ییش، جگه‌ له‌وه‌ش قوتابخانه‌كانیان وه‌كو پێویست ئاستیان به‌رچاو نه‌بووه‌.
بۆیه‌ له‌ كۆتاییدا جارێكى تر جه‌خت له‌وه‌ ده‌كه‌مه‌وه‌ گه‌ر بمانه‌وێ قوتابخانه‌كانمان نموونه‌یی و سه‌ركه‌وتووبن ئه‌وا ده‌بێ به‌رێوه‌به‌ره‌كان دڵسۆز و په‌روه‌رده‌یی و شیاو و ماندوونه‌ناس بن.

به‌رێوه‌به‌رى گشتى چالاكى وه‌رزش و هونه‌ر
ماسته‌ر له‌ كارگێڕى په‌روه‌رده‌یی
Top