ھەتا پشتی ژناڤچوونا رژێما سەدامی، تشتەک ل ھەرێما کوردستانێ نەبوو ب ناڤێ وەبەرھێنانێ، چونکی سیاسەتا وی دەمی یا ئیراقێ ھەموو دەرگەھـ ل ھەمبەری وەبەرھێنەر و کۆمپانیێن بیانی گرتبوون، تا وی دەمی ھەرێما کوردستانێ ب ئاگرێ سیاسەتا شاش یا رژێما ژناڤچوویا ئیراقێ دھاتە سۆتن. لێ پشتی ئازادیا ئیراقێ، دەستێ حکومرانێن ڤێ ھەرێمێ و ئیراقێ ھاتن ڤەکرن، لێ کیژان ژوان شیا وێ بەرفرەھیێ و رەوشا باش یا ئابوری دخزمەتا گەلێ خوە دا بکاربینیت؟ بێگومان تەماشەکرنا رەوشا خەلکێ ئیراقێ ب بەراورد ل گەل ھەرێما کوردستانێ دێ مە گەھینیتە وێ بەرسڤێ کو ئەوا ل ھەرێما کوردستانێ د بیاڤی وەبەرھێنانێ و ئاڤەدانکرن و پرۆژەیێن خزمەتگۆزاری ھاتیە کرن، نیڤ ھندە ژی ل ئیراقێ نەھاتیە کرن. سەردەمێ زێرینێ ڤێ یەکێ ژی بۆ پشتی سالا ٢٠٠٥ ڤەدگەریت دەما نێچیرڤان بارزانی وەکو سەرۆکێ حکومەتا (ئێکگرتی) یا ھەرێما کوردستانێ یا وی دەمی ھاتی دەستنیشانکرن، وی دەمی سیمایێ ھەموو باژارێن ھەرێما کوردستان، کەڤن و بێ سەر و بەری پێڤە دیاربوو، رێکێن ھاتن و چوونێ ب کێری قەرەبالغیا ترۆمبێلان و بازرگانیێ نەدھات، لێ د پازدە سالێن بۆری دا ھەموو رەوشەک ھاتە بەروڤاژی کرن و ھەرتشتەکێ پێشکەفتن و گھۆرین بخوەڤە دیت. ل ھەرێما کوردستانێ وەزارەتەک ب ناڤێ بازرگانی و پیشەسازی ھەیە، کو رۆلەکێ بەرچاڤ د پیتەپێدانا کەرتێ و ئابۆر و بازرگانیێ ل ھەرێما کوردستانێ ھەیە، دگەل ڤێ یەکێ ژی، بۆ رێکخستنا کارێ بازرگان و کۆمپانیان سێ ژوورێن بازرگانی یێن دھۆک و ھەولێر و سلێمانیێ کو، د ڤان ھەر سێ ژووران دا، ئێکەتیا ژوورێن بازگانی یێن ھەرێما کوردستانێ ھاتیە پێکئنیان، ل گۆری ئامارەکا وەزارەتا بازگانی و پیشەسازی، ھەتا سالا ٢٠١٣ ل ھەر سێ پارێزگەھێن ھەرێما کوردستانێ ٤٤٤ کۆمپانیێن بیانی ھاتینە تۆمارکرن و ٢٦٢٦ تایێن کۆمپانیێن بیانی ل ھەرێمێ کوردستانێ ھەنە، پشکا شێری ژ وان کۆمپانیان بەر ب وەلاتێ تورکیا دکەڤیت، ھەروەسا ل گۆری دابەشبونا وان، پترا وان کۆمپانیان ل سنورێ پارێزگەھا ھەولێرێ کاردکەن، ھەروەسا ١٩٥١٦ کۆمپانیێن ناڤخوەیی ل ھەرێما کوردستا ھاتینە تۆمارکرن، نێچیرڤان بارزانی ل سەردەمێ کابینەیێن خوەیێن حکومەتێ، گەلەک پیتە ب وێ یەکێ دایە، بیاڤێ کارکرنێ بۆ کۆمپانیێن بیانی یێن بازرگانی و وەبەرھێنانێ خوەش بکەت، ھەروەسا د سەردەمێ دەستھەلاتداریا خوە وەکو سەرۆکێ جڤاتا وەزیران دا ئالۆگۆرا بازرگانی د ھەرپێنچ دەرگەھێن ناڤدەولەتی و ھندەک دەرگەھێن نەفەرمی خورتتر لێکر