ئاشتیخوازه‌ك د هه‌وارا گه‌له‌كێ بن ده‌ست دا
کارزان فەقێ
كورد ل هه‌ر جهه‌كى بن، ئیدى مه‌حكومن د خه‌ما برایێ خوه‌یێن كورد بن یێن ل وه‌لاته‌كێ دى دژین، واته تا چه‌ند سنورێ وه‌لاتان دناڤبه‌را كوردان ب هێز و خورت بن ژى، لێ هه‌ر دكارن كاریگه‌رى و باندۆر ل سه‌ر هه‌ڤدوو هه‌بن، كورده‌ك ل ئه‌رمه‌نستانێ د كێشه و ئاریشه‌یێن نه‌ته‌وى دا بنالیت؛ ژ بۆ كورده‌كێ رۆژهه‌لات یان ژى هه‌ر پارچه‌كا دى یا كوردستانێ جهێ دلته‌نگیێ ییه، نها هه‌رێما كوردستانێ تاكه قه‌واره و ئه‌ردێ نشتیمانیێ كوردانه كو كورد ب ئازادانه دناڤدا دژین، لێ هیچ ده‌ما ئاكنجى و ده‌ستهه‌لاتدارێن وێ، خه‌م و ئاریشه‌یێن كوردێن دى یێن بنده‌ست و ژێر ئه‌شكه‌نجه ژ بیر نه‌كرینه و به‌رده‌وام د هه‌ولا چاره‌كرنا ئاریشه‌یێن وان دا بوویه، ئه‌گه‌ر باكورێ كوردستانێ بكه‌ینه نموونه، د قۆناغێن شه‌رێ توركیا و په‌كه‌كێ دا، سه‌ركردایه‌تیا سیاسى یا هه‌رێمێ گه‌له‌ك جاران ناڤبژیكارى و رێخۆشكه‌رێ پرۆسه‌یێن ئاشتیێ بوویه، تا وى ده‌مى ئاماژه‌یێن گه‌له‌ك دلخۆشكه‌ر بۆ پرسا كوردى ل باكورێ كوردستانێ و توركیا چێبووینه. كوردێن باكور و حزبێن وێ یێن سیاسى ژى باش گه‌هشتینه وێ راستیێ كو هه‌رچه‌نده كوردان ب ته‌نێ هه‌رێمه‌ك هه‌یه، لێ پێگه‌ها ڤێ هه‌رێمێ ژ یا وه‌لاته‌كى كێمتر نینه و دكارێت دناڤا ئاریشه‌یان و گهۆرینا هاوكێشه‌یان دا، رۆلێ چاره‌سه‌ریێ و ئێكلاكه‌ر ببینیت. داوى سه‌ره‌دانا شاندا بلند یا پارتیا دیموكراتیكا گه‌لان هه‌ده‌پێ بۆ هه‌رێما كوردستانێ ژى به‌لگه‌یه كو هه‌رێما كوردستانێ ب وێ په‌یوه‌ندیا ل گه‌ل توركیا هه‌ى، دكاریت ده‌ستێ ئاشتیێ بۆ وێ ده‌ڤه‌رێ درێژكه‌ت، داخازیا هه‌ڤسه‌رۆكێ هه‌ده‌پێ ژبۆ سه‌رۆكێ هه‌رێما كوردستانێ كو بزاڤێن ده‌ستپێكرنا پرۆسه‌یا ئاشتى ل توركیا بكه‌ت؛ وێ چه‌ندێ دگه‌هینیت كو پێگه‌ها سیاسه‌تڤانێن هه‌رێما كوردستانێ ل سه‌ر ئاستێ هه‌رێمى و ناڤنه‌ته‌وى كێمتر نینه ژ یا وان وه‌لاتێن هه‌رێمى كو به‌رده‌وام دژى هه‌موو پێشكه‌ڤتن و گهۆرینه‌كێنه كو د به‌رژه‌وه‌ندیا خه‌لكێ ڤێ هه‌رێمێ دا بیت. لێ كو نها په‌یوه‌ندیا حكومه‌تا توركیا دگه‌ل پارتێن سیاسى یێن كوردان ل وى وه‌لاتى د خرابترین ئاست دایه، هه‌رێما كوردستانێ و سه‌رۆكێ وێ دكاریت چ گهۆرینه‌كێ د وێ پرسێ و هاوكێشێ دا بكه‌ت؟ بێگومان به‌رسڤ گه‌له‌ك ب ساناهى یه، چونكى به‌ریا ئاریشه‌یێن حكومه‌تا توركیا ل گه‌ل وان پارتان بگه‌هیته ئاستێ نها، نێچیرڤان بارزانى سه‌رۆكێ نهایێ هه‌رێما كوردستانێ و سه‌رۆكێ به‌رێ یێ حكومه‌تا هه‌رێمێ كوردێن باكور و رۆژئاڤا ل هه‌موو وان شاشیان هایداركربوون كو ره‌نگه ببنه ئه‌گه‌رێ دروست كرنا ئالۆزیان. له‌ورا ده‌ستپێكرنه‌ڤا پرسه‌یا ئاشتیێ كو ب كوشتنا دوو پۆلیسێن توركیا ژ لایێ په‌كه‌كێ ڤه تێكچوویه، ب تنێ ب وان سیاسه‌تڤانێن كورد دهێته كرن كو خوه‌دان په‌یوه‌ندى یێن بهێز بن ل گه‌ل توركیا و سه‌ربۆره‌كا درێژ د حكومرانى و سیاسه‌تى دێ هه‌بیت، ژبه‌رهندێ ئاراسته‌كرنا داخوازیا هه‌ده‌پێ ژبۆ نێچیرڤان سه‌رۆكێ هه‌رێما كوردستانێ گه‌له‌ك درسته و ئه‌گه‌ر ئاماژه‌یه‌كێ ده‌ستپێكرنا پرۆسه‌یا ئاشتیێ ل توركیا هه‌بیت، ب تنێ ئه‌و دكاریت پێنگاڤێن وێ پرۆسێ بده‌ته‌ڤه كارى و رێك ل شه‌رێ چه‌ندین سالێن وى وه‌لاتى بگریت.
