میر، د پیرۆزباهیا سەرۆکێ هەرێمێ دا
شێرزاد نایف
مژارا ئێزدیان مینا دیاره‌كا سروشتی یه، قه‌ده‌را وان هاتیه كو د گه‌میا مرۆڤاتیێ سوواربن، ل نیڤا ده‌ریایه‌كێ پری پێل و شه‌پۆلدار برێڤه‌بچن، په‌یاما مرۆڤاتیێ یا زیق و دیار و ئاشكرایه، راگرتنا وان هندا زه‌حمه‌ته د ناڤ هۆڤاتیا مرۆڤاتیێ دا، هه‌روه‌كو هنگڤینه‌كێ خومالی پاراستنا وی دهێته‌كرن، ل ڤێره ئه‌ز نه‌چارم میناكه‌كا موسلمانان (ب مه‌جازی) بینه هۆلی، ده‌مێ دبێژن: سیماهم فی وجوههم...!..
هه‌ر تاكه‌كێ ئێزدی د هزار من دا، میره‌كه خامه‌كه، چونكو خومالیبوون تشته‌كێ جوان، چه‌ندی نه‌بیته هه‌جین!. ئه‌ڤه ده‌مه‌كه میرێ مه‌زن وه‌غه‌ركری، ب راستی ژی وه‌غه‌را وی هه‌می ئالیێن جیهانێ خه‌مداركرن، سه‌میانێ ڤی ملله‌تێ مه‌زلۆم ب درێژاهیا سالان، هه‌ر ماله‌ك ل كوردستانا دایك بێزار و خه‌مباركر!.
دوجاران ئێزدی د سته‌ملێكرینه، ئێك ژ به‌ر كو كوردن، و دوژی چونكو ئێزدینه و خوه‌دان عه‌قیده‌نه!. ل ده‌مێ رێوره‌سمێن خاكسپاردنا لاشێ وی، مه‌دیت ئاماژه‌یێن خه‌م ودلژانیێ د دیار و رۆهه بوون ل سه‌ر روویێ سه‌رۆكێ هه‌رێما كوردستانێ نێچیرڤان بارزانی، چونكو هه‌می جۆرێن مه‌زلۆمیه‌تێ دیتینه، و خوه دیتیه سه‌میانێ ملله‌ته‌كی، ژ هه‌ر لایه‌كی گه‌ف و هه‌ره‌شه یێن دهێنی!. و مله‌تێ وی یێ هاوارا خوه دگه‌هینتێ و چ د ده‌ست دا نه، ژ سته‌ما ڤێ جیهانا مه‌زن، له‌ورا ژی ئه‌و قه‌بارێ هندێ مه‌زن ل سه‌ر ملێن وی، بوونه حیكمه‌ته‌ك كو ده‌رگه‌هێن رێیان بۆ ڤی گه‌لێ ته‌په‌رس ڤه‌ببن، سه‌رێ وه‌ریسی هاته گرتن و ڤێراچوو، ئێك ژ وان داخۆیانیێن ل ناڤا وان رێوره‌سمان دا، مه‌دیتن و بیرا مه هه‌میان دهێت، ریسكه‌ك بوو ل ناڤ هۆڤێن دوژمنێن ڤی ملله‌تی..ئه‌ڤ ده‌مێ مایی ئێزدی د بێ میره‌كێ شه‌ره‌عی، ماوه‌كێ سه‌خت بوو و گه‌له‌ك شلق ب وێ ده‌ریایێ كه‌فتن، یا مه ئاماژه پێ كری، ژ به‌ر سینگبه‌رفره‌هیا تاكێ ئێزدی و گیانێ لێبۆرینێ و ئه‌و سیمایێ مرۆڤاتیێ و ره‌وشنبیریا برێڤه‌برنێ، تشته‌كێ جوان مه دیت، بزاڤێن ره‌خنه‌لێگرتنێ ب گیانه‌كێ دیمۆكراسی و ل دووڤ ئێك به‌ردانا ئێكودو، ل دووماهیێ ژی هه‌تا چپكه‌كا هێڤێنێ میراتیێ هاتیه دانان میر حازم به‌گ، قووناغه‌كا هه‌ستیاربوو، ژ به‌ر پیلانێن ل ده‌رڤه دهێنه پێش بێی كه‌سێ های ژێ نه، به‌لێ ئێزدی وه‌كو كانزایێ زێری به‌رزه‌نابن و زێرنگیر زێرێ خوه دنیاسیت!. ئه‌و ماوه‌یێ ڤالاهیێ هاته داگرتن، و ئێكی ئه‌و گه‌می دێ میرێ وان په‌یاما بابێ خوه یا پاك گه‌هینیته مه‌ره‌مێ، بۆ برێڤه‌برنا كاروبارێن وان و به‌ره به‌ره قه‌ره‌بۆكرنا ده‌رده‌سه‌ریێن هاتینه سه‌رێ وان. ل ڤێره تشته‌كی گرنگ بۆ مه خۆیا دبیت، ئه‌و ژی ئێكه‌م كه‌سێ پیرۆزباهی ل میری حازم كری، كه‌سێ نێچیرڤان بارزانی بوو، وێ ئێكێ دگه‌هینیت كو ئه‌و سۆز و گۆتنێن ئاراسته‌ی وان كرین، به‌ری هه‌ر كه‌سه‌كی ل بیره و هه‌رئه‌وه بوویه تێكۆشانێن دانان نڤیسنگه‌ها قورتالكرنا ئێزدیێن ره‌ڤاندی دانایی و چه‌ند ره‌ڤاندی زڤراندین ب هه‌ر رێیه‌كا هه‌بیت، ل ده‌مه‌كی ئه‌ڤێ جیهانێ بێ باوه‌ر قه‌یرانا باوه‌ریێ یه كه‌سێن به‌رپرس ل دووڤ سۆزا خوه بهێن، هه‌كه ئه‌و نه‌با ئه‌رێ كیش لایه‌نێ بیانی یێ ب خوه ب خودانێ ئێزدیان دزانیت كه‌ت؟!، شه‌ره‌فا مرۆڤێ كورد یا عه‌زیزه، كه‌سێ بیانی دبیت د بیاڤه‌كێ نه‌ژادی دا و سه‌رگه‌رمیا نه‌ته‌وه‌ی و پێكڤه‌ژیان، ئه‌و مه‌رجێن كوردبوونێ ل ده‌ف نه‌بن، له‌ورا یێ دكه‌ت هه‌ر بۆ شه‌ره‌فا خوه دكه‌ت.. به‌رده‌وامیدانه بۆ په‌یڤینا جاران یا سه‌رۆك مسعودا بارزانی ده‌مێ گۆتی هه‌تا هه‌تایێ دێ بزاڤێ كه‌ین هه‌ر ئێزدیه‌كێ ره‌ڤاندی بزڤرینن.
