هه‌كه سنۆرێ جوگرافی یێ خه‌باتا حزبا كرێكارێن كوردستانێ و مه‌ره‌ما وان بۆ وێ پارچه‌یا ئه‌ردی بیت، و دوژمنێ وان یێ هه‌ره سه‌ره‌كی ده‌ستهه‌لاتا توركیا و له‌شكرێ توركیا بیت، به‌لێ خوه‌جهیا وان یا بێ مۆله‌ت و ره‌وا شاخ و داخێن هه‌رێما كوردستانا عیراقێ بن، به‌لێ ئه‌و گوند و ده‌ڤه‌رێن جهنشین كه‌فتیه ل ژێر گه‌فێن لێدانا وان ژ لایێ سوپایێ توركیا و بۆردۆمانێن فرۆكه‌یێن توركیا رۆژانه خه‌لكێ بێگونه‌ه دبیته قوربانیێن وان، دبیته كه‌یس و تێكدانا ئارامیا ڤان ده‌ڤه‌ران، وه‌كو بۆیه‌را ڤان رۆژان هاتیه روودان ل ده‌ڤه‌را سیار و سپیندارێ تووشی بۆردۆمانكرنا فرۆكێن توركیا بوو، ژ به‌ر لێگه‌ریا چه‌كدارێن گه‌ریلا، رۆژ بۆ رۆژ یێن بزاڤ و لڤین و باره‌گایێن خوه نێزیكی باژاران و جهێن ئاكنجیان دبن وج جهێن شارستانی و گه‌شتوگوزاری و تێكدانا ئارامیا هه‌رێما كوردستانێ، چه‌ندین جاران ده‌سهه‌لاتا هه‌رێما كوردستانێ داخواز ژ په‌كه‌كێ كریه كو ره‌وشا هه‌رێما كوردستانێ ل به‌ربه‌رچاڤوه‌ربگریت كو چو هێجه‌تان بۆ ده‌ستهه‌لاتا توركیا په‌یدا نه‌كه‌ت، به‌لێ هه‌روه‌كو ره‌فتارێن په‌كه‌كێ بۆ نه‌هێلانا ئه‌زمۆنا هه‌رێما مه یا كوردستانێ یه كو باشتر نه‌بیت، و قوربانی و تێكۆشینا گه‌لێ هه‌رێمێ ب هه‌روه بچیت، بێهنا تێكده‌ریێ ژ ڤان جۆره ره‌فتاران دهێت، وه‌كو وی كریارا تیرۆستی یا ل ریستورانتا هه‌ولێر هاتیه كرن، و ل چ جهێن دیتر نه‌هاتیه كرن، ب راستی جهێ سه‌ر راوه‌ستانێ یه، پێنه‌ڤێت بۆ پێشێلكرنا وێنه‌یێ هه‌رێمێ و حوكمه‌ت و سه‌رۆكاتیا وێ یه. یا ژ هه‌میێ بالكێشتر دروستكرنا هێزه‌كا نوویا په‌كه‌كێ یه بۆ ئاژاوه‌كرنا هه‌رێمێ، یان هه‌كه بیرا خوه بینین ل بۆیه‌را شنگالێ یا به‌ری چه‌ند ساله‌كان بۆ تێكدانا ره‌وشا ده‌ڤه‌رێ و تێهه‌لچوونا هێزێن حه‌شدێ و پێشمه‌رگه‌ی و دروستكرنا گرژی و ئالۆزیان، بۆ هه‌ر ده‌لیڤه‌كا ب ڤی ره‌نگی هه‌رده‌م سه‌رۆكێ هه‌رێما كوردستانێ به‌رێز نێچیرڤان بارزانی هاتیه سه‌ر خه‌ت و ئاریشه چاره‌سه‌ركرینه ب حیكمه‌ت و سیاسه‌تا خوه یا نه‌رم، ئه‌ڤ جاره د هانا ڤێ مژارێ هات، و ئه‌و دۆخێ گه‌رم سڤككر و نه‌خاسمه پشتی ده‌سته‌ره‌ركرنا تاوانبارێ كریارا تیرۆركرنا جێكرێ كونسلێ توركیا ل هه‌ولێر،.. ل دووماهیێ دبێژینه په‌كه‌كێ: هه‌كه هه‌رێما كوردستانێ بۆ هه‌ر كورده‌كی ده‌ستكه‌فت بیت، چویچكه‌ك د ده‌ستێ مرۆڤی دا بیت باشتره ژ ده‌هێن ل سه‌ر چقێ دارێ..!! بهێلن ئه‌ڤا مه هه‌ی ب كێمترین راده و هه‌رنه جهێ ئارمانجێن خوه یێن ستراتیژی و نه‌ته‌وی و جوگرافی شه‌رێ خوه بكه‌ن، و نه‌بنه ئه‌گه‌رێ قوربانیكرنا خه‌لكێ مه یێ بێگونه‌ه ل سه‌ر ئه‌رد و زه‌ڤیێن خوه و كشتوكال و ئاژه‌لێ خوه ژیانا خوه ببه‌نه سه‌ری و نانه‌كێ ته‌نا و ئارام بخۆن.. دووماهیا په‌كه‌كێ وه‌سا دیار دبیت كو ببیته بهانه‌ك بۆ مایتێكرنێن سه‌ربازی یێن مه‌زنتر ژ ئه‌ڤا د ناڤبه‌را توركیا و په‌كه‌كێ دا به‌لكو ئیران و ئه‌مریكا و رۆسیا و توركیا ژی بكه‌ڤنه دهێله‌كا گه‌رم دا و په‌كه‌كه ببیته نێزیكترین رێك بۆ هاتنا توركیا و هه‌روه‌سا رۆسیا بهێته سه‌ر خه‌ت و هاوكێشه مه‌زنتر لێ بیت و ئه‌م ژی وه‌كو عه‌فرینێ لێ بهێین؟! دڤێت مله‌ت ژی هاریی ده‌سهه‌لاتێ بكه‌ت بۆ چاره‌سه‌ركرنا ده‌ستێوه‌ردانێن په‌كه‌كێ ل ده‌ڤه‌رێ!!
رێژین نھێلی
