عوسمانییا ل تورکیا و سەفەوییا ل ئیرانێ و عەرەبان ل عێراق و سووریێ، شەڕی خوە ب کوردان فرۆت، نھا ژی ئاسەوارێن وانا ل کوردستانێ ماینە و ناڤێن گەڵەک گوند و جھا ب زمانێ تورکی یان فارسی مایە، لێ نەکارینە شووناس و ناسنامە و کەلتوورێ کوردان بگۆڕینن. گەڵەک ئاستەنگ د رێکا کوردا و تورکان ھەبوون، تورک و فارس و عەرەبان گەڵەک ڕەنی ب سەر کوردان ئانین و گەڵەک دیوار ب سەردا ھەڕفاندن، لێ دیسان نەکارین کوردان وندا بکەن، چونکی کورد ب خوەشمێر و جوامێر و خوەدی ھێز و نەترس تێن ناس کرن.
دەسەڵاتدارێن ئەو دەوڵەتێن کورد ب سەردا پارڤەکرنە، جانتا و بەرووکێن وان پڕ بوون ژ ژەھر و باڕووت و خەنجەران ژ بۆی کوردان، لێ بەرووڤاژی کوردان ھەرگاڤ مرۆڤاتی و وەفا و راستی بۆ وانا دناڤ جانتاندا برییە و ھەرگاڤ سەرێ وانا بڵند بوویە، نھا ژی جانتا سەرۆکێ ھەرێمێ تنێ مافێ کوردا تێدا نییە و، مافێن کەلتووری و زمان و نەتوەیێن ئاشۆری و کلدان و ئێزدی و موسمان ھەمی ئایین و نەتەوێن ل کوردستانێ دژین د بەرنامێن کارێ سەرۆکێ ھەرێمێدانە و، دڤێت ب رێکا جانتا دیپلۆماسی مافێن کوردان بدەست بینیت.
ھەرێما کوردستانێ سنوورەکێ جۆگرافییێ بەرچاڤە کو ئەم بشێن وەک میناک بەحس بکەین، کوو چاوا مافێن ھەمی نەتەوە و ھەمی ھزر و ئایدیایێن جودا تێدا تێن دیتن و، ھەمی ئەو نەتەوە و ئایین و ھزرێن جودا شاھدی بۆ ڤێ چەندێ دایە کو، حکومەتا ھەرێمێ مافێن وانا پاراستینە و چ جوداھی دناڤبەرا ئایین و نەتەوێن جودا دا نینن. د ئیدارەیێن میری و ھێزێن پێشمەرگە و حیزبێن سیاسیدا ھەمی رەنگێن نەتەوە و ئایینان بێ جوداھی تێدا ھەنە، نەخاسمە حکومەتا ھەرێمێ چ کێماسی نەبووینە بۆ وەڵاتیێن ھەرێمێ. نھا ژی دەما سەرۆک نێچیرڤان بارزانی بەحسێ مافێن گەلێن ھەرێمێ دکەت و دەری ب دەری ل دووف مافێن وانا دگەڕیت، کلدان و ئاشوور، ئێزدی و موسلمان و ھەمی نەتەوە و ھزرێن جودا، ھەست ب ئارامی و دڵگەرمیێ دکەن و پشتڕاستن کوو کەسەک ھەیە ھێژایە و لدووف مافێن وانا دگەڕێت.
ھەر وڵاتەک سەرۆک بارزانی بچیت و دگەڵ ھەر کەسایەتییەکێ سیاسی کۆمبوونان بکەت، دەما بەحسێ ھەرێمێ و مافێن سرووشتی یێن کوردان تێن کرن، مافێن رەگەزنامە و کەلتووری، زمان و ژیان و ئەمنییەت، خۆشگوزەرانی و ئاسوودەیی، مافێن ئابووری و سنوور و ئەنفال و شەھیدان تێن بەحس کرن و سەرۆکێ ھەرێمێ ب رژدی تێکەز لسەر تەف مافێن گەلێن کوردستانێ دکەت.
جانتا دیپلۆماسییا سەرۆکێ ھەرێمێ پڕە ل رێکێن چارەسەرا کێشەیێن نافخۆیی و دەرڤە، دڤێت تەف لایەنێن سیاسی یێن ھەرێمێ ھەڤکار بن بۆ چارەسەرا پرسا نەتەوەیی و نشتیمانی، پرسێن سیاسی و ئابووری، پرسێن سنوور و مەترسیێن دەڤەرێ و ئاریشێن دگەڵ بەغدا و وڵاتێن جیران، گۆڕانکاریێن ل رۆژھەڵاتا ناڤەڕاست تێن کرن، چونکی سەرۆکێ ھەرێمێ کەسایەتییەک نێزیک و تێکەڵە دگەڵ ھەمی ئالیێن سیاسی و کەسایەتیێن بڕیار بدەست، لەوما چارەسەر کرنا ھەر ئاریشەکێ دێ ب ساناھی بیت ئەگەر دەستەکێ دەرەکی ل پشت نەبیت.