رۆلا سەرکردەیان ژ رزگارکرنا وەڵاتی و دیارکرنا ئۆمێدا نەتەوەیی و رێبەرایەتیکرنا وان بەرەڤ ئارمانجێن بلند د دیرۆکا گەلاندا بەرچاڤە، نەتەوەیا کورد ژی د بەردەوامیا خەباتا خوە یا سەد ساڵاندا، گەڵەک سەرکردە و کەسایەتی یێن بھێز ھەبوونە، لێ ئەگەر بەحسا رۆلا رێزدار نێچیرڤان بارزانی چ وەک سەرۆک وەزیران چ وەک کەسایەتی سیاسی نەھێ کرن، دێ بیتە نادادی د دیرۆکا گەلێ کوردستانێ و دەڤەرێدا، کو شیایە ب سەدەمێن خودی و بابەتی ئارمانجێن گەلێ کوردستانێ پێشڤە ببەت و ژ خەونێن سەد ساڵان نێزیک بکەت.
د وارێ سیاسیدا، نێچیرڤان بارزانی پشتی سەرھەلدانێ تا نھا رۆلەکا سەرەکی و یەکئالی ھەبوویە ژ پێشڤەبرنا پرۆسەسا سیاسی و بھێزکرن و بنیاتنانا بنگەھێن حوکمڕانیا دروست ل ھەرێما کوردستانێ، بێ ھەبوونا کەسایەتییەکی ب ڤی ئاوایی، ئەستەم بوو ھەرێما کوردستانێ شیابا د ناڤا ڤان ھەمی یاری یێن سیاسی و بەرژەوەندی یێن ل دژی ئێک و ل دژی گەلێ کوردستانێ خۆ رابگریت و، بەردەوام بیت ژ مانێ و پتر کرنا بدەستخستیان.
د وارێ دیپلۆماسیدا، نھا پتری ٤٠ کونسولخانە و نوونەرایەتی یێن وەڵاتان ل ھەولێرا پایتەختا ھەرێما کوردستانێ ھەنە، د ناڤا وان دا ژی کونسولخانەیێن پێنج ئەندامێن ھەرتمی یێن جڤاتا ئاسایشا ناڤنەتەوەیی. بەشداریا نێچیرڤان بارزانی د کۆنفرانسێن گرنگ یێن ناڤنەتەوەیی یێن وەکی ناتۆ و داڤۆس و میۆنشن و ھەژمارەکا دیتر، سەرەدەری کرن دگەڵ نێچیرڤان بارزانی وەک سەرکردەیەکێ بەرچاڤ ب باندۆر د وان کۆنفرانسادا، ژبلی کۆمبوونێن فەرمی دگەڵ سەرۆک و سەرکردەیێن وەڵاتێن جیھانێ، بۆ پێکەە و رۆلا نێچیرڤان بارزانی وەک سەرکردەیەکێ بەرنیاس یێ جیھانێ و، رۆلا وی د ھەڤکێشێن ھەرێمی و جیھانیدا ڤەدگەڕێت.
د واری ئابووریدا ژی، کۆمپانیایێن ھەری مەزن د بیاڤێ پەترۆلێدا وەک ئیکسۆن مۆبیل یا ئەمەریکی و جیھانی و، کۆمپانیا تۆتال یا فەرەنسی و کۆمپانیایێن رووسنەفت و گازپرۆم یێن رووسی ل ھەرێما کوردستانێ، ڤەبەرھینانێ د وارێ پەترۆلێدا دکەن. تێ پێشبینیکرن رێککەفتنا ڤێ دوماھیێ یا رووسنەفت، ھەرێما کوردستانێ ل پەستۆیێن ھەرێمی و قەیرانا دەرباز بکەت، ئەڤ ژی ژبلی سەدان کۆمپانیایێن دی یێن وارێ ڤەبەرھینانێ بەلگەنە لسەر وێ یەکێ کو، ھەرێما کوردستانێ ب ھزر و دووربینیا نێچیرڤان بارزانی د گۆڕەپانا ھەڤرکی یێن بەرژەوەندی یێن ناڤنەتەوەیی بوویە جھەکێ ئارام و تەنا، یا ب یەکگەھشتنا بەرژەوەندییان کو د ئەنجامدا ب قازانجێ ئاشتی و سەقامگیریا دەڤەرێ و ب تایبەت ھەرێما کوردستانێ بدوماھی دھێت.
د وارێ لەشکریدا، ھەرێما کوردستانێ ل ساڵا ٢٠٠٣ بەشداری د پرۆسەسا ئازادکرنا عێراقێدا کر دگەڵ ھەڤپەیمانا و بناخەیەکێ بھێز د وارێ سەربازیدا داڕێت، پاشتر ژی، د شەڕێ ل دژی رێخستی یا تەرۆریست یا داعشێدا سەلماندا کو، گەڵەک باشترە ژ لەشکرێ عێراقێ و وەک ھێزەکا نیزامیا ناڤنەتەوەیی لسەر ئاستا جیھانێ تێ ناسکرن کو، پارێزەرێ بەھایێن دیموکراسی و مرۆڤی و مەدەنیەتێیە، ئیرۆ ژی پڕانیا وەڵاتێن رۆژئاڤا (ئەڵمانیا، ئەمریکا، کەنەدا، رووسیا، فەرەنسا، بەریتانیا و ئۆسترالیا) مەشق و راھێنانێن سەربازی ب ھێزێن پێشمەرگە دکەن و، ب باندۆرا ھێزێن پێشمەرگە دۆزا گەلێ کوردستانێ رەوایەتییەکا پتر د دیتنا گشتی یا جیھانێ دا مسۆگەر کریە و، نێچیرڤان بارزانی ژی پشکا شێر ژ ڤان سەرکەفتنا و موکمکرنا پەیوەندییان بەرکەفتیە.
ب رۆلا خۆ یا ب باندۆر و دیپلۆماسییەتێ، نێچیرڤان بارزانی سەقایەکێ ئەرێنی ل پارچەیێن دی یێن کوردستانێ چێکر و پرۆسەسا ئاشتی یێ ل تورکیا و، پێشڤەبرنا دەستکەفتێن گەلێ کورد ل رۆژئاڤایا کوردستانێ دەستکەفتێن دیرۆکی بوون کو، دۆزا گەلێ کورد ل وان جھان ژی د دیرۆکێ دا ھۆسا پێشڤەنەچوویە.
د وارێ ناڤخۆ یا ھەرێما کوردستانێ دا ژی، ئالییێن سیاسی ڤەگەڕیانە سەر مێزا گفتۆگۆ و چارەسەرکرنا کێشەیان ل ژێر سەرپەرشتیا نێچیرڤان بارزانی، نیشانێن گەڵەک یێت ھەی کو، ئەو رەوشا راستی ھەرێما کوردستانێ ھاتی چارەسەر ببیت و، کابینەیا نوو یا حکومەتا ھەرێما کوردستانێ و کێشەیا کەرکوکێ و پەیوەندی دگەڵ بەغدایێ ژی دێ چارەسەر بن.
دیرۆک ڤی رۆلێ سەرۆکێ ھەرێمێ دێ تۆمار کەت بۆ نفشێ داتێت و، دێ دیار کەڤیت کو، پارتی ب گشتی و بارزانی ب تایبەتی ئالیگرێ ئاشتی و سەقامگیریێیە، کو شانازییەک مەزنە بۆ جیھانا راستەقینایە مرۆڤاتیێ.