گۆتنه‌كا كورده‌وراى هه‌یه، كو ژبۆ كه‌سه‌كى یان جهه‌كی دهێته گۆتن، نه مرۆڤ دكاریت دوورى وێ بیت و نه‌ژى دكاریت دگه‌ل دا به‌رده‌وام بیت، ئه‌ڤ یه‌كه د گه‌له‌ك قۆناغان دا بۆ هه‌ولێرێ و به‌غدایێ ژى دروسته، چونكه سه‌ره‌راى كو هه‌ولێر و به‌غدا گه‌له‌ك پێدڤى ب هه‌ڤدوو هه‌یه، هیچ ده‌مه‌كى ژى بێ ئاریشه و ناكۆكى نه‌بووینه، لێ ئایا بۆ نها و پشتى ریفراندۆم و روودانێن شازده‌ى ئیكتۆبه‌رێ دیسان ئه‌م دكارین بێژین، هه‌ولێر و به‌غدا نه دگه‌ل هه‌ڤدوو و نه بێی هه‌ڤدوو دقه‌تینن؟ بێگومان ستراتیژیه‌تا سه‌رۆكێ هه‌رێما كوردستانێ نێچیرڤان بارزانى كو پێشتر وه‌كو سه‌رۆك وه‌زیر ژى گه‌له‌ك كار ل سه‌ر كریه به‌رسڤا ڤێ پرسیارێ دده‌ت، چونكى وى وه‌ها ددیت دڤێت هه‌رێما كوردستانێ به‌رده‌وام عاملێ خێرێ بیت ل ده‌ڤه‌رێ و خوه‌دان باشترین هه‌ماهه‌نگى و په‌یوه‌ندى بیت ل گه‌ل به‌غدا و وه‌لاتێن ده‌وروبه‌ر، هه‌بوونا ڤێ په‌یوه‌ندیا ب هێز بخوه دێ بیته ئه‌گه‌رێ چێبوونا ئابۆره‌كێ ب هێز و كوردستانه‌كا بهێزتر. كه‌واته ئێكه‌م سه‌ره‌دانا نێچیرڤان بارزانى وه‌كو سه‌رۆكێ هه‌رێما كوردستانێ بۆ به‌غدایێ و كۆمبوونا وى ل گه‌ل هه‌رسێ سه‌رۆكاتیێن ئیراقێ ئاماژه‌یێ وێ یه‌كێ دده‌نه مه كو نێچیرڤان بارزانى د پۆستێ خوه یێ نوو دا دێ به‌رده‌وامیێ ب هه‌مان ستراتیژى و دبلۆماسیا به‌ریا نها ده‌ت، كو هه‌رێما كوردستانێ ل گه‌له‌ك كاودان و قه‌یرانێن دژوار پاراست و جاردن ره‌وشه‌كا ئارام ل ڤێ ده‌ڤه‌رێ دروست كه‌ته‌ڤه. ئیدى بۆ چارسالێن بهێت پرسێن گه‌له‌ك گرنگ و هه‌ستیار ل پێشیا به‌غدا و هه‌ولێرێ هه‌نه و هه‌موو ژى ل سه‌ر وێ ئینیه‌تێنه كو دڤێت د ڤان چار سالان دا هه‌موو وان پرسان ب رێكا یاسا و ده‌ستورى بهێنه چاره‌كرن، ژ وان ژى پرسێن سیاسى و په‌ترۆل و بۆدجه و فرۆكخانه و ده‌ریێن سنوری، كو پێشتر هه‌رده‌ما به‌غدا خوه بهێز ل هه‌مبه‌رى هه‌ریما كوردستانێ ددیت، ده‌ست ژ بۆ وان پرسان دبر و هنده‌ك جاران ب سكالا و هنده‌ك جاران ژ ب رێكا رازیكرنا وه‌لاتێن ئیقلیمى گه‌فا گرتنا ده‌ریێن سنورى و داخستنا ئاسمان و رێگرتن ل فرۆشتنا په‌ترۆلێ ره‌وشه‌كا نه‌خواستى و جۆره دو دلیه‌ك دناڤا گه‌لێ كوردستانێ دروست دكر، ئیدى نووكرنه‌ڤا وان ئاریشان مفایێ خوه نینه و سه‌رۆكێ هه‌رێما كوردستانێ و حكومه‌تا نوو یا به‌غدایێ ل سه‌ر وێ باوه‌رێنه كو ل هه‌ڤتێگه‌هشتن و روونشتن و دانوستاندن دێ وان پرسان چاره كه‌ت، به‌غدا دلخوه‌شه كو سیاسه‌تڤانه‌كێ نه‌رم و خوه‌دان دبلۆماسى و عاملێ خێرێ نها ل بلندترین ده‌ستهه‌لاتا هه‌رێما كوردستانێ ده‌ستهه‌لاتداریێ دكه‌ت، ب هه‌مان شێوه ژى بۆ هه‌رێما كوردستانێ هاتنا سه‌رۆچاڤێن نوو بۆ ناڤا حكومه‌ت و په‌رله‌مانێ ئیراقێ جهێ دلخوه‌شیێ یه
کارزان فەقێ
