رێوڕەسمێن مەزن بۆ مرۆڤێن مەزن
زوهری جەبەلی ئێدلبی
د دیرۆكا هەرێما كوردستانێ و عێراقێدا، لسەر ئاستێ رۆژهەڵاتا ناڤین و وڵاتێن پێشكەفتی، رێوڕەسما سویندخارن و دەستبكار بوونا رێزدار نێچیرڤان بارزانی بۆ سەرۆكاتییا هەرێمێ كێم وێنە بوو، ریێوڕەسمەكێ هەژی كەسایەتییا نێچیرڤان بارزانی بوو، كوو د ڤێ رێوڕەسمێدا پتری 1900 دیپلۆماتكارێن ناڤدار و نوونەرێن وڵاتان و كەسێن خوەدی هێزا كاریگەر ئامادە بوون، د دیرۆكا رۆژهەڵاتا ناڤین یێكەم رێوڕەسمە كوو وڵاتێن دژ هەڤ و بیرو هزرێن سیاسیی یێن جودا خڕڤەبوون، مینا ئیران و ئەمریكا و سعوودیا و توركیا، ئۆل و مەزهەب و نەتەوەیێن جوداجودا و، شیعە و سوننی، لایەنێن جوداخوازێن كوردستانێ و لایەنێن عەرەبێن ئەنتی كورد، حیزبێن ئۆپۆزسیۆن و ئەو حیزبێن پارتی ب حیزبا بنەماڵێ دزانن، ئەو كەسایەتیێن دژی پارتی كار دكەن، ب شێوەیەكێ گشتی مەراسیما سویندخارنا سەرۆكێ هەرێمێ ببوو دیمەنەك كوو هەم ئاشتی تێدا دهات دیتن و هەمیش دیپلۆماسییەت و رەنگ و هزرێن جودا لهەف كۆم ببوون. چەندین دیدارێن سیاسی و دیپلۆماسی ل ڤێ مەراسیمێ هاتن ئەنجامدان. پشتی سویندخارنێ، رێزدار نێچیرڤان بارزانی د گوتارەكا دیرۆكیدا ئامانجێن چار ساڵ كاركرنا خوە د پۆستێ سەرۆكاتییا هەرێمێدا پێشكەشی مێهڤان و جیهانێ كر.
خالەكا هەری گرنگ د گوتارا سەرۆكێ هەرێمێدا ئەڤە بوو كوو سوپاسیا وان كرد كو ئەوێن دەنگ دایێ و ئۆ ئەوێن دەنگ ژی نەدایێ، لێردا دیار بیت كوو كەسایەتییەكێ سیاسی رەوشت بەرز و سینگ فرەهە، سیاسییەكێ ژیر و خوەدی سیاسەتەكا راستەقینەیە، خوە ب سەرۆكێ وان ژی د زانی ئەوێن دەنگ نەدایێ كوو ئەڤ چەندە تشتەك گەڵەك گرنگ بوو، د ڤێ خالێدا دیار بوو كو بەردەوام بوون و سەركەفتنا پڕۆسا سیاسی ل هەرێمێ ژ هەمی تشتەكی گرنگترە. ئۆ رۆڵێ سەرۆك مەسعوود بارزانی ب گرنگ زانی د تێكشكاندنا تیرۆریستا و گەهاندنا هەرێما كوردستانێ بۆ ڤی ئاستێ بلند.
سەرۆكێ هەرێمی خالەكا دی كوو بەحس كری،بەردەوامبوونا پڕۆسا سیاسیی بوو ل هەرێمێ، زۆر كەسایەتی و لایەنێن سیاسی هەولا وێ چەندێ ددەن كوو شكەستێ ب پڕۆسا سیاسی بینن لە هەرێمێ، لێ سەرۆكی ب ڤێ چەندێ هەمی كوردستانی پشتڕاستكرن كە دێ پڕۆسا سیاسی و پێشڤەچۆنا هەرێمێ یا بەردەوام بیت و كەس نەشێت رێكێ ل پێشڤەچۆنا هەرێما كوردستانێ بگریت.ئۆ ژ لایەكێ دیڤە سەرۆك بارزانی بەحسێ دڕندەیا داعشێ و كوشتارا وانا كر، دا زانین كوو نەخۆشترین یادەوەرییە و دڤێت ئەم ئاگەهدار بین جارەكا دی نەهێلین تووشی ئەو هێرشێن هۆڤانە ببینەڤە و دەستێ هەڤدوو بگرین بۆ پاراستنا هەرێمێ ل ڤان هێرشا، ڤیا بیرا خەڵكێ كوردستانێ و جیهانێ بینتەڤە كو تیرۆر هەڕەشەیەكا مەزنە لسەر جیهانێ و دڤێت پێكڤە كار بۆ نەهێلانا داعش و تیرۆرێ بكەین.
سەرۆكێ هەرێمی د گوتارا خوەدا بۆ یەكەم جار ناڤێ پێشمەرگە و هێزێن هەڤپەیمان و حەشدا شەعبی دگەڵ هێزێن عێراقی ئینا، لێرەدا دڤیا بۆ حەشدا شەعبی دیار كەت و دڤێت ئەو نەبنە مەترسی بۆ سەر هەرێما كوردستانێ و دڤێت ببنە بەشەك ژ چارەسەركرنا شاریشێن ئەمنی ل عێراقێ نە بەشێك ژ كێشەیان، چونكی ئەم هەمی پێكڤە قوربانیێن دەستێ تیرۆر و داعشین و دڤێت پێكڤە كار بۆ نەهێلانا مەترسییان بكەین.
سەرۆكێ هەرێمێ شەهید و ماڵباتێن وان ژی ژ بیر نەكرن و دا گوتن كوو كوردان بەرگری كریە ل گەلێ عێراق و شەهید ژی داینە، ئەو بەرگریا مە ل عێراقێ كری بەرگری بوو ل مرۆڤاتییێ و مافێ مرۆڤان ژ بۆ ژیانەكا سەرفراز، دا زانین كوو دڤێت عێراق چیدی نەبیتە گۆڕەپانا یێكلا كرنا كێشەیێن دەرڤە و خەڵكێ خوە نەدەتە شەهید كرن.
سەرۆكی راگەهاند كوو پێشمەرگە دكاری وەكوو هەرگاڤ دێ شیێت دپاشەڕۆژێدا بەرگریێ ل وڵاتی بكەت و ئەم خوەدی هێزەكا سەربازی یا باشین و دێ د كارێ خوەدا هەوڵا رێكخستنا پێشمەرگەی دەت بۆ چێكرنا هێزەكا نشتیمانی و رێكخستی د ئاستێ جیهانیدا، ئۆ دیار كر كوو كورد و هەرێما كوردستانێ دێ بیتە خوەدی سوپایەكێ نشتیمانی و دێ بەرگریێ ل وڵاتێ خوە كەت.
د گوتارا خوەدا رێزدار نێچیرڤان بارزانی بەحسا هەرێما كوردستانێ كرد و دا زانین كوو هەرێما فیدراڵا كوردستانێ بەشەكێ خوەدی هێز و كاریگەرێ عێراقێیە و دڤێت د ناڤ دەستوورێ عێراقێدا بێتر مافێن هەرێمی بێن چەسپاندن، هەم ژ ئالیێ ئەمنیڤە و هەم ژی ژ ئالیێ ئابووریڤە، ژ بلی جێبجێ كرنا مادەیێ 140 و پاراستنا هەرێمێ ژ هەر مەترسییەكا دەرەكی و ناڤخۆیی.
سەرۆكێ هەرێمی دڤێت هەرێما كوردستانێ ببیت هێزەكا یێكگرتی بۆ دەرڤە، دڤێت هەمی ئاڵیێن سیاسی پشكدار بن ل دەستڤەئینانا مافێن گەلێ كورد، لەوما بانگ ل هێزێن سیاسی كر كوو هەمی یێكدەنگ و تەبا بن و ململانێت ناڤخۆیی بهێلن و هێرشێن میدیایی رابگرن، نەخاسمە ئەو لایەنێن خوە ب خەمخۆرێت مللەتی دزانن و ئاواتا وا كۆكبوونا گەلێ وانە، چونكی تنێ تەبایی و یێكبوونێ دێ شێن ئاواتێن مللەتێ خوە دەستڤە بینن، ئۆ ئەگەر بڤێت ئەڤ داخازە نە داخازەكا زەحمەت و مەزنە و بۆ بەرژەوەندییا گشتی دڤێت هەمی ڤێ داخازێ ب جی بینن.
د دووماهیا گوتارا خوەدا رێزدار نێچیرڤان بارزانی جەخت ل چەند خالێن گرنگ كر مینا ئاشتی و دوور بوون ل شەڕی، مێزا گفتگۆیێ و تەبا بوونێ، كار كرن ب دەستووری، دژی تیرۆرێ راوەستان، خزمەتكرنا خەڵكی، ئاسایی كرنا پەیوەندیا دگەڵ وڵاتێن جیران، كار كرن بۆ دەستئینان مافێن رەوایێن خەڵكی و مافێ مرۆڤان.
