دابەشکرنا کوردستانێ ل سەر وەلاتێن دەڤەرێ ژ ئالیێ مەزنە ھێز و دەولەتێن جیھانێ و دیف بەرژەوەندیا خوە و بێ گوھدانە خواستێن کوردستانیان, رەوشەک زەحمەت و کارەساتبارئافراندیە دناڤبەرا ھەر چوار پارچێن کوردستانێ دا ب درێژاھیا ڤان سەد سالێن رابوری. ھەبونا رژێمێن سیاسیێن جودا دگەل مەزھەب و ئول و و نەتەوێن تورک و عەرەب و فارس د ڤێ دەڤەرێ دا , بو دەمێ زێدەتر ژ چەرخەکێ رەنگ ڤەدەنەک نەرێنی ل گەلێ کورد ژی کریە د ھەمی بیاڤەکێ ژیانێ دا. ھەردەم ئەڤ دەولەتێن داگیرکەر ژی ئێک ھەلویست بوینە ل دژی پرسا کوردی و بزاڤ شورەشێن کوردستانی بدژی بەرژەوەندیێن خوەیێن بلند دیتینە و ل ھەر پرسەکێ جودا بن ل پرسا کوردی دا ھەڤرانە و د زھنیەتا وان دا تشتەک نینە بناڤێ مافێن کوردان. ڤێ رەوشا کو کوردستان پێ کوت و بەندکری ھەتا نھا ژی سەردەستێن دونیایێ و ئیقلیمی ب ھەمی شیان بەرەڤانیێ ژێ دکەن. د چوار وەلاتێن جودا دا و پرانیا سالوخەتاندگەل ئێک جودانە و ھەر ئێک خوەدی دەستور و یاسا و ئارمانج و سیاسەتەک جودایە , وی دەمی ل سەر گەلێ کورد ژی فەرزدکەت د ھەر پارچەکا کوردستانێ دا دیتنەک تایبەت بو رەوشێ ھەبیت و یا نھا کوردستانا باشور پێ دا دەرباز دبیت باکور و روژھەلات و روژئاڤا پێ نەگەھشتینە و ئەڤ چەندە دبیتە ئەگەرێ ھندێ کو رەوشا ھەرێما کوردستانێ ل بەرچاڤ بێتە وەرگرتن تایبەت د ڤێ قویناغێ دا کو سەروکاتیا ھەرێمێ ھاتیە کاراکرن و نێچیرڤان بارزانی ھاتیە ھەلبژاردن وەک سەروکێ ھەرێمێ و قویناغەک نوی ل حوکرانیێ دەستپێکریە و ھیڤیەک باش ھەیە کو بارزانی رولەکێ کاریگەر ببینیت ل نیزیک کرنا ئالیێن شەری( پەپەکە و تورکیا).
وەک ئێک ژ مەزنە دەولەتێن دەڤەرێ تورکیا ل سەر میراتێ خیلافەتا ئوسمانی ھاتیە ئاڤاکرن و نھا ژی سەردارێن تورکیا خوەدیێ ھەمان دیتنن بو رەوشا دەڤەرێ و بەردەوام پێکولا بەرفرەە خوازیێ دکەن و خەونان ب ئیمپراتوریەتا ئوسمانی ڤە دبینن !! لێ نە ئەو دەم و نە ئەو میتود ل بەردەستن بو گەھشتن ب وێ خەونێ. بەلێ ژ ئالیێ نەتەوەپەرێسێن تورکیا نوی ڤە ل سەد سالا بیستان وەرە ھەتا نھا بەردەوام ل دروستکرنا دوژمنان گەریاینە و ھندەک جاران دوژمنێن وەھمی بو پاراستنا دەولەتا خوە دروستکرنە و ھەتا دەست وەردانێ ل دەرڤەی سنوران بکەن.
توپبارانا بەردەوام یا ھێزێن تورک بو سەر ھەرێما کوردستانێ ھیجەتەک ھەیە ئەو ژی ھەبونا پەکەکێ یە ل ھەرێمێ دا و ئەنجامدانا چالاکیێن سەربازیە دژی تورکیا و ڤەگەریان بو ڤان جھان تایبەت قەندیل . لێرەدا ئەزمونێ حوکمداریا کوردستانێ ب ھەمی کێم و کورتیێن خوە ڤە لێ شیایە ل ئاستێ نەتەوەی دا کوردان ب جیھانێ بدەتە نیاسین و بویە مالا مەزن بو ھەمی کوردەکێ و ڤێ چەندێ سەر ئێشە بو تورکیا و ئیرانێ دروستکریە و چو ھیجەتەک ل دەستی دا نینە کو بشێن ئەزمونێ کوردستانێ پێخنە مەترسیێدا ژ بلی ھیجەتا ھەبونا ھێزێن پەکەکێ . ئەڤ چەندە یا روون و ئاشکرایە و ھندی پەکەکە ل چیایێن ھەرێما کوردستانێ بن توپباران دێ بەردەوام بن ئەڤ چەندە ژی دبیتە ئەگەرێ مەترسی ئێخستنە سەر ھەرێما کوردستانێ .
ئەگەر ھەلویستێ حکومەتا ھەرێما کوردستانێ بخوینن کو زور جاران ژ ئالیێ پەکەکێ و ئالیگرێن وێ ڤە ل ھەرێما کوردستانێ ریبریێ رەخنەیێن توند دبیت ھەمبەر ھێرشێن تورکیا , وەسا دیار دبیت کو حکومەتا ھەرێما کوردستانێ وەک خوەدیێ بەرپرسیاریێن سیاسی و یاسایی و دەستوری دڤێت ببیتە باشترین ھەفسی بو وەلاتێن دەوروبەر دناڤ واندا تورکیا کو زور ھەفپشکی ل گەل ھەنە تایبەت ل بیاڤێ ئابوری دا و مەزنترین دەرگەھێ ئابوریە د گەل دەرڤە . ھەروەسا حکومەتا ھەرێمێ نونەرێ گەلەکێ بن دەست و خوەدیی کێشەیەکا نەتەوەیە پێتڤی ب پەیوەندیێن دبلوماسێن (سفر کێشەیە) ل گەل دەولەتێن جیھانێ تایبەتی وەلاتێن ھەفسی و ب تێکچونا ڤێ ھەرێمێ ئەو دەرگەە ژی نامینیت کو دەنگێ کوردان ب جیھانی بگەھیت. ژ ئالیێ دیتر ڤە خەلکێ ھەرێمێ پێتڤی ب قوتێ روژانەیە و پرانیا بەرھەمان و بازرگانیا نەفت و گازا ھەرێمێ ل گەل تورکیایە و ئەڤ چەندە ژی پێتڤی ب ھەبونا پەیوەندی و ھەفسیەتیەکا باش ھەیە بو ھندێ پێگەھێ سیاسی و ئابوری یێ ھەرێما کوردستانێ ل عیراق و جیھانێ دا یێ بھێز بیت.
ئارامی ل بەرژەوەندیا ھەمی کوردەکێ یە و تورکێن فاشیست ئەڤ چەندە نەڤێت ھەروەسا ئەو رولێ کورد نھا ل دەڤەرێ دبینن ب مانەڤا ھەرێمەکا بھێز ڤەگرێدایە . ژ بلی ھندێحکومەتا ھەرێما کوردستانێ چەندین جاران پێکولا ھندێ کریە کو ببیتە فاکتەرێ چارەسەریێ ل باکورێ کوردستانێ , و فەرە بژاردەیا سیاسی ببیتە ستراتیجا پەکەکێ و رێکێ ب ھێزێن سیاسیێن باکور بدەت پرسگرێکا نەتەوەی پێش ببەن و رێزێ ل سەروەریا ھەرێما کوردستانێ بگریت و وێ بیانویێ ب دەستێ تورکیا نەدەت کو ھێرشی ئەزمونێ ھەرێما کوردستانێ بکەت .